விஞ்ஞானத் திரித்தல்கள் – முடிவுரை – பகுதி 23

விஞ்ஞானம் என்பது பொதுவெளியில், ஒரு சக்தியாக, கடந்த 170 ஆண்டு காலமாகத்தான் வலம் வந்துள்ளது. அதுவரை,, விஞ்ஞானம் பத்தோடு பதினொன்றாக வலம் வந்த ஒரு துறையாகவே இருந்தது. அங்கீகாரத்துக்கே ஏங்கிய காலம் மாறி, இன்று, அளவிற்கு அதிகமாகவே மேற்குலகில் ஒரு சக்தியாக வலம் வருகிறது. மனித குலம், விஞ்ஞானம் மற்றும் தொழில்நுட்பத்தால், பல நன்மைகளைப் பெற்றாலும், கூடவே அதன் தீயமுகமும் ஏதோ ஒரு வகையில் மனிதகுலத்தை பாதித்துள்ளதை மறுக்க முடியாது.

முதலில், அரசாங்கங்களின் பார்வை விஞ்ஞானம் பக்கம் திரும்பக் காரணமே யுத்தங்களில் வெல்ல அது ஒரு நல்லக் கருவி என்பதாலே! இன்று, உலகம் வியக்கும் நோபல் பரிசின் அடித்தளம், வெடிமருந்து வியாபாரம் என்றால் பாருங்களேன். 20 –ஆம் நூற்றாண்டிலிருந்து, வியாபாரங்களின் பார்வை, மெதுவாக, விஞ்ஞானத்தை ஒரு லாபமீட்டும் சக்தியாக பார்க்கத் தொடங்கியதால், விஞ்ஞானத்தின் சக்தி, இன்னும் பெரிதாகியது.

விஞ்ஞானத்திற்கு பல முகங்கள் இருந்தாலும், யுத்தம் மற்றும் லாபம் என்ற இரு பெரும் மனித வேட்கைகளால், திர்த்தல்களுக்கு ஆளானது என்பது என் கருத்து. உண்மையான விஞ்ஞானக் குறிக்கோளான, இயற்கையைப் புரிந்து கொள்ளுதல் என்ற பாதையிலிருந்து விலகியதும் இதனாலேயே. இன்று, பல நோய்களுக்கு மருந்து மற்றும் சிகிச்சைகள் மனிதகுலத்திற்கு உதவினாலும், பருவநிலை மாற்றத் தடுப்பு முயற்சிகளில், மனிதகுலம் தடுமாறுவதும் இந்த இரு தீய வேட்கைகளினாலேயே.

21 –ஆம் நூற்றாண்டிலும், இந்தப் போக்கின் வேகம் குறையவில்லை என்பதே வேதனையான விஷயம். கடந்த 70 ஆண்டுகளாக, தொல்லெச்ச எரிபொருளுக்கு மாற்று என்பதில், மனிதகுலம் கவனம் செலுத்தாததன் மூலம், இதையே நிரூபிக்கிறது.

ஒரு கட்டுரை தொடரின் முடிவுரை எழுதும் பொழுது, ஒரு நிறைவான செய்தியை பெரும்பாலும் சொல்லப் பார்ப்பது வழக்கம். ஆனால், கடந்த இரண்டு ஆண்டுகளுக்கு மேலாக, 53 கட்டுரைகள் எழுதிய பின்னும், இந்த விஷயத்தில் ஒரு நிறைவு இல்லை என்பதே உண்மை. ஆரம்பத்தில் 25 கட்டுரைத் தொடர் இவ்வளவு வளர்ந்தும் இந்தக் குறை சற்று வியப்பளிக்கிறது. இதற்குப் பல காரணங்கள் உண்டு.

  1. மிகப் பெரிய அளவில் விஞ்ஞானத் திரித்தல்கள் நடக்கும், மருந்து தயாரிப்பு/வியாபாரம் பற்றி எழுதாதது மிக முக்கிய காரணம். இந்தத் துறையில் எனக்கு பரிச்சயம் இல்லாததால், இத்துறையை விட்டு விட்டேன்
  2. யுத்த ஆயுதங்கள் என்பது, ஒரு ராட்சச லாப நோக்கம் கொண்ட ஒரு தொழில். இதில் விஞ்ஞானத் திரித்தல்கள் மிகச் சாதாரணம். இந்தத் துறையப் பற்றி எழுதுவதில் பல சிக்கல்கள் உள்ளன. பொது வெளியில், இத்துறை பற்றிய விவரங்கள் மிகக் குறைவு. மேலும், இதன் அடிப்படைத் தொழில்நுட்பம் ரகசியங்களில் மறைந்து கிடக்கும் ஒரு துறை. இதனால், இத்துறை, இந்தக் கட்டுரைத் தொடரில் இடம் பெறவில்லை. 
  3. இன்னும் பலத் துறைகளில் நடக்கும் விஞ்ஞானத் திரித்தல்கள் இந்தக் கட்டுரைத் தொடரில் இடம் பெறவில்லை. உதாரணம் – கனிமத் துறை, வட அமெரிக்காவின் இரு பெரும் துறைகள் – லாரிகள் மற்றும் காட்டு மரங்களை அறுக்கும் தொழில், அணு மின் உற்பத்தி, உணவுத் துறை என்று இந்தப் பட்டியல் நீளும்
  4. பல விஞ்ஞான சாட்சிகள் மற்றும் ஆவணங்கள் மேற்குலகில் நடக்கும் விஞ்ஞானத் திரித்தல்களை வெளிச்சம் போட்டுக் காட்ட உதவுகின்றன. ஆரம்பக் கட்டுரையில் சொன்னது போல, எந்த ஒரு நாடும் இந்த விஷயத்தில் உத்தமம் இல்லை. மற்ற வளரும் மற்றும் பின்தங்கிய நாடுகளில், சரியான நிகழ்வுப் பதிவு மற்றும் விஞ்ஞான அலசல் இல்லாததால், அவற்றில் எந்த விஞ்ஞானத் திரித்தல்களும் நிகழவில்லை என்று அர்த்தமில்லை
  5. சைனா, வட கொரியா மற்றும் ரஷ்யா போன்ற நாடுகளில் நடக்கும் விஞ்ஞானத் திரித்தல்கள், பொதுவெளிக்கு வராமல் இந்த நாடுகள் பார்த்துக் கொள்கின்றன. சைனா மற்றும் ரஷ்யாவில் விஞ்ஞான முன்னேற்றம் சற்று பயமளிக்கும் அளவிற்கு வளர்ந்துள்ளது. மேற்குலகில் நடக்காத புதிய தில்லாலங்கடிகள் வெற்றிகாமாக இங்கு நடந்து கொண்டிருக்கலாம். இவை நமக்குத் தெரிய வாய்ப்பில்லை

இந்தக் கட்டுரைத் தொடரை எழுதத் தொடங்கிய நாட்களில், புனைப் பெயரில் எழுதலாமா என்ற ஒரு எண்ணமும் இருந்தது. ஆனால், இன்று விஞ்ஞானத் திரித்தல்களைப் பற்றி வியாபாரங்கள் கவலப்படுவதே இல்லை என்ற அளவிற்கு இந்த நோய் பரவி விட்டதால், அதைக் கைவிட்டேன். 

இந்தக் கட்டுரைத் தொடரில் உள்ள சில விஷயங்கள் சிலருக்கு நெருக்கமாகப் புரிய வாய்ப்புண்டு, மற்றவை, வாசகர்களின் வாழ்க்கையில் கட்டுரை சார்ந்த நிகழ்வைச் சந்தித்தால், அக்கட்டுரையுடன் ஒரு தொடர்பு ஏற்பட வாய்ப்புண்டு. டால்கம் பவுடர் திரித்தல்கள் பற்றிய ஒரு கட்டுரையைப் படித்த வாசகர், எனக்கு, தனிப்பட்ட முறையில், பவுடரைப் பயன்படுத்தும் பழக்கத்தை விட்டு விடுவதாக எழுதியிருந்தார். இப்படி எழுதிய இத்தனை கட்டுரைகளை வாசித்த வாசகர் சிலருக்கு இப்படி ஒரு விழிப்புணர்வு ஏற்பட்டால், அதை இந்த கட்டுரைத் தொடரின் உண்மையான வெற்றியாக நினைக்கிறேன்.

பருவநிலை மாற்றம் சார்ந்த திரித்தல்கள் கட்டுரைகளில், பல விஞ்ஞான பதிவுகள் மற்றும் இணைய தளங்களில் இந்த ஆராய்ச்சி மேற்கொள்ளப்பட்டது. மேலும், இத்துறையில் உங்கள் அறிவை வளர்த்துக் கொள்ள, சில முக்கிய சுட்டிகள் இங்கே:

நட்சத்திரமதிப்பீடுவிளக்கம்
*ஆரம்பநிலை புரிதலுக்கான சுட்டி
**சற்று விவரமானது. அவ்வளவு டெக்னிகல் அறிவு தேவையில்லை
***மிகவிவரமானது. கொஞ்சமாவது டெக்னிகல் அறிவு தேவை
****மிகவும்டெக்னிகலான ஆராய்ச்சிக்கட்டுரை
திரித்தல் தலைப்புசுட்டிநட்சட்த்திர மதிப்பீடு
பருவநிலை மாற்றம்/ புவி சூடேற்றம்https://climate.nasa.gov/evidence/***
https://earthobservatory.nasa.gov/features/GlobalWarming***
https://www.skepticalscience.com/argument.php**
https://www.americanrivers.org/2019/09/climate-change-understanding-the-science-behind-it/***
https://www.scientificamerican.com/article/science-behind-climate-change/**
https://royalsociety.org/topics-policy/projects/climate-change-evidence-causes/basics-of-climate-change/**
https://www.metoffice.gov.uk/weather/climate/science/the-science-behind-climate-change**
https://www.ipcc.ch/site/assets/uploads/2018/03/ar4-wg1-chapter1.pdf****
https://www.edf.org/climate/9-ways-we-know-humans-triggered-climate-change**
https://www.forbes.com/sites/jamestaylor/2015/02/09/top-10-global-warming-lies-that-may-shock-you/#b4e0d9753a5a*
https://www.youtube.com/watch?v=8vP00TP6-p0*
https://static.berkeleyearth.org/pdf/skeptics-guide-to-climate-change.pdf**
https://www.wwf.org.uk/updates/10-myths-about-climate-change**
https://en.wikipedia.org/wiki/Global_warming_controversy**
https://insideclimatenews.org/news/03102017/infographic-ocean-heat-powerful-climate-change-evidence-global-warming*
https://citizensclimatelobby.org/laser-talks/basic-science-climate-change/**
https://www.ipcc.ch/site/assets/uploads/2018/02/ipcc_wg3_ar5_summary-for-policymakers.pdf****
https://www.ipcc.ch/2019/09/25/srocc-press-release/**
https://www.carbonbrief.org/qa-how-do-climate-models-work***
கங்கை நதிhttps://www.dw.com/en/ganges-under-threat-from-climate-change/a-41084925**
https://www.creativeboom.com/inspiration/a-10-year-photographic-journey-along-the-ganges-that-documents-the-effects-of-pollution-industrialisation-and-climate-change/**
https://climate.nasa.gov/climate_resources/111/ganges-river-delta/***
https://rmets.onlinelibrary.wiley.com/doi/pdf/10.1002/joc.732***
காற்று மண்டலம்https://www.mrgscience.com/ess-topic-61-introduction-to-the-atmosphere.html*
https://globalwarmingsolved.com/2013/11/summary-the-physics-of-the-earths-atmosphere-papers-1-3/****
https://www.nationalgeographic.org/encyclopedia/atmosphere/**
http://samples.jbpub.com/9781284030808/9781284027372_chapter01_secure.pdf***
https://www.slideshare.net/MarkMcGinley/earths-atmosphere-a-basic-intro***
https://www.uccs.edu/Documents/chuber/ges1000/Chapt3-McK10.pdf****
http://acmg.seas.harvard.edu/people/faculty/djj/book/bookchap7.html****
https://www.nature.com/scitable/knowledge/library/introduction-to-the-basic-drivers-of-climate-13368032/***
https://eesc.columbia.edu/courses/ees/climate/lectures/radiation/****
https://www.youtube.com/watch?v=t0izmfTLzU8*
https://www.youtube.com/watch?v=OWXoRSIxyIU*
மீதேன் மற்றும் நைட்ரஸ் ஆக்ஸைட்https://www.osti.gov/pages/servlets/purl/1265530**
https://www.tandfonline.com/doi/full/10.1890/EHS14-0015.1***
https://en.wikipedia.org/wiki/Atmospheric_methane***
https://www.wired.com/story/atmospheric-methane-levels-are-going-up-and-no-one-knows-why/**
புவி சூடேற்றம் – நிலத் தாக்கம்https://www.ipcc.ch/site/assets/uploads/2019/08/4.-SPM_Approved_Microsite_FINAL.pdfhttps://www.lincolninst.edu/publications/conference-papers/impact-climate-change-land****
https://www.usgs.gov/faqs/how-do-changes-climate-and-land-use-relate-one-another-1?qt-news_science_products=0#qt-news_science_products**
https://www.climatehotmap.org/global-warming-effects/plants-and-animals.html**
https://www.nrdc.org/stories/global-warming-101**
பருவநிலை மாற்றக் கட்டுப்பாடு – பரிந்துரைhttps://www.ucsusa.org/climate/science**
https://www.ucsusa.org/climate/solutions**
https://www.science.org.au/learning/general-audience/science-climate-change/9-what-does-science-say-about-climate-change-options**
https://davidsuzuki.org/what-you-can-do/top-10-ways-can-stop-climate-change/**
https://www.washingtonpost.com/news/opinions/wp/2019/01/02/feature/opinion-here-are-11-climate-change-policies-to-fight-for-in-2019/**
https://www.curbed.com/2017/6/7/15749900/how-to-stop-climate-change-actions**
https://www.activesustainability.com/climate-change/6-actions-to-fight-climate-change/*
https://www.vox.com/2018/10/10/17952334/climate-change-global-warming-un-ipcc-report-solutions-carbon-tax-electric-vehicles***
https://youmatter.world/en/actions-companies-climate-change-environment-sustainability/**
https://www.bbc.com/news/science-environment-52719662**
https://www.edf.org/climate/india-development-while-fighting-climate-change*
https://debunkingdenial.com/climate-change-problem-solving/***
http://www.icrisat.org/Building-climate-smart-farming-communities/Futuristic-multi-model-approach.html***
https://www.youtube.com/watch?v=2J05vC3umE0**
https://www.youtube.com/watch?v=PraDOusY87g**
https://www.drawdown.org/****
புவி சூடேற்ற அரசியல்https://www.skepticalscience.com/argument.php*
https://www.forbes.com/sites/jamestaylor/2015/02/09/top-10-global-warming-lies-that-may-shock-you/#b4e0d9753a5a*
https://static.berkeleyearth.org/pdf/skeptics-guide-to-climate-change.pdf*
https://en.wikipedia.org/wiki/Global_warming_controversyhttps://www.aei.org/carpe-diem/there-is-no-climate-emergency-say-500-experts-in-letter-to-the-united-nations/*
பருவநிலை ஆர்வலர்கள்https://www.yesmagazine.org/environment/2020/09/21/intergenerational-climate-activism/
https://www.teenvogue.com/story/teen-climate-activists-fighting-future-of-the-planet
https://fortune.com/2020/08/19/generation-z-climate-change-activism/
https://www.businessinsider.com/greta-thunberg-bio-climate-change-activist-2019-9?op=1#on-september-20-2019-thunberg-led-a-worldwide-climate-strike-that-included-4-million-people-across-161-countries-14
https://www.technologyreview.com/2019/09/24/65283/climate-activism-is-now-a-global-movement-but-its-still-not-enough/
https://www.huffingtonpost.ca/entry/20-champions-of-climate-change_n_564cbf1be4b00b7997f89738?ri18n=true
https://nypost.com/2019/10/12/climate-change-activists-are-focused-on-all-the-wrong-solutions/
https://www.globalcitizen.org/en/content/female-activists-saving-planet/https://plan-international.org/youth-activism/climate-change-activists

புவி சூடேற்றத்துக்கான தீர்வுகள் – பகுதி 22

இதுவரை நாம், இயற்கைக்கு எப்படி கரியமில வாயுவை உட்கொள்ள உதவுவது என்று பார்த்தோம். இன்று, பல விஞ்ஞானிகளின் பார்வையில், இயற்கை சார்ந்த முயற்சிகள் மட்டுமே நம்மைச் சூழ்ந்திருக்கும் அபாயத்திலிருந்து காப்பாற்ற முடியாது. கடந்த 170 ஆண்டுகளில், காடுகளை அழிப்பதை மட்டும் செய்யவில்லை நாம். பல மில்லியன் ஆண்டுகளாக பூமி புதைத்து வைத்த காடுகளையும் தொல்லெச்ச எரிபொருள் என்ற பெயரில் எரித்து, நம் காற்று மண்டலத்தில் கரியமில வாயுவைக் கலந்து விட்டுள்ளோம். இது நம்முடன், பல நூறு ஆண்டுகள் பயணம் செய்யும்.

சற்று, சர்ச்சைக்குள்ளான விஷயமென்றாலும், செயற்கையான கரியமில குறைப்பு விஞ்ஞான முயற்சிகளை எப்படி இந்தக் கட்டுரைத் தொடரில் விட்டுவிட முடியும்? அதையும் பார்த்து விடுவோம். சரி, இந்த விஞ்ஞான ரீதியான முயற்சியில் அப்படி என்ன சர்ச்சை?

  • மனித செயற்கை முயற்சிகள், அரசாங்கம் மற்றும் விஞ்ஞானத்தின் போக்கைப் பற்றிய வலுவான சந்தேகத்தைக் கிளப்புவதே காரணம். செயற்கை முறைகளின் பால் கவனம் திரும்பினால், நாம், தொல்லெச்ச எரிபொருள் பயனிலிருந்து விடுபடவே மாட்டோம். அத்துடன், மேலும் இயற்கையை அழிக்க இது ஒரு சாக்காக அமையலாம்
  • இன்றைய செயற்கை முயற்சிகளில், எண்ணெய் நிறுவனங்கள், அதிக முதலீடு செய்வது சந்தேகத்தை மேலும் வலுப்படுத்துகிறது. கடந்த 60 ஆண்டுகளாக எந்தப் புவி சூடேற்ற விஞ்ஞான முயற்சியையும் தவிடு பொடியாக்கிய திரித்தல் மன்னர்கள் இந்த எண்ணெய் நிறுவனங்கள். தங்களுடைய லாபம் மேலும் தொடர எடுக்கும் முயற்சிதான் இந்த செயற்கை முயற்சிகளோ என்ற சந்தேகம் ஏற்படுவது இயற்கை
  • பல அரசாங்கங்கள், எப்படியோ தங்கள் நாட்டின் கரியமில உமிழைக் குறைத்து விடுவோம் என்று ஒப்பந்தங்களில் கையெழுத்திட்டு விட்டன. இதனால் ஏற்படும் நெருக்கடியை சமாளிக்க எப்படியோ எண்ணெய் நிறுவனங்களுடன் அரசாங்கங்கள் நடத்தும் நாடகம், இந்த செயற்கை விஞ்ஞான முயற்சிகள் என்ற கருத்தும் உள்ளது

எது எப்படியோ, ஒன்று மட்டும் நிச்சயம். காடுகளை உருவாக்குவதாலோ, கார்களைக் குறைப்பதாலோ, கரியால் இயங்கும் அனல் மின்நிலையங்களை மூடுவதாலோ, அல்லது காற்று, சூரிய ஒளி மற்றும் நீரால் இயங்கும் சக்தியைப் பயன்படுத்தினாலோ புவி சூடேற்றத்திலிருந்து நாம் தப்ப முடியாது. நம்மால் முயன்ற, நமக்குத் தெரிந்த முயற்சிகள் அனைத்தையும் செய்தால்தான் ஓரளவு சரிகட்ட முடியும். வருடம் 40 கிகா டன்கள் கரியமில வாயுவைக் காற்றில் கலக்கிறோம். எல்லா முயற்சிகளும், இதைக் குறைக்கத் தேவை.

மிக முக்கியமாக, செயற்கை கரியமில வாயுக் கட்டுப்பாடு பற்றி இங்கு நாம் விவாதிக்க, மூன்று முக்கிய காரணங்கள் உள்ளன:

  1. எண்ணெய் நிறுவனங்கள், இவ்வகை முயற்சிகளில் ஈடுபடுவதற்கு முக்கிய காரணம், இவர்களிடம், புவியியல் நிபுணத்துவம் உள்ளது, 150 ஆண்டுகளாக, நிலத்தைத் தோண்டித்தான் தொல்லெச்ச எரிபொருளை வெளியே எடுத்து வந்துள்ளார்கள். கரியமில வாயுவை பூமிக்கடியில் மீண்டும் புதைக்க இவர்களது நிபுணத்துவம் தேவை
  2. ஐக்கிய நாடுகளின் புவி சூடேற்ற நிபுணர் குழுவான IPCC, செயற்கை கரியமில வாயு குறைப்பு தொழில்நுட்பம் தேவை என்று சொல்லியுள்ளது. நாம் எட்ட வேண்டிய இலக்கை அடைய எல்லா முயற்சிகளும் தேவை
  3. சில தொழில்நுட்பங்கள் விரைவில் மேம்பட்டால், ஒரு கணிசமான அளவு கரியமில வாயுவை காற்று மண்டலத்திலிருந்து நீக்க வழி வகுக்கும். அத்துடன், நீர், காற்று மற்றும் கதிரொளி மின்பலகைகளை நிறுவ இயலாத ஏழை நாடுகளுக்கு இந்த தொழில்நுட்பங்கள் உதவக்கூடும்

மேல்வாரியாகச் சொல்லப் போனால், இந்தத் தொழில்நுட்பங்கள் யாவும், காற்றில் கலந்துள்ள கரியமில வாயுவை ரசாயன முறைகளில் உள்வாங்கி, பூமிக்கடியில் புதைக்கும் முயற்சிகள். சில தொழில்நுட்பங்கள், தாங்கள் உருவாக்கிய கரியமில வாயுவைக் கொண்டு, மற்ற பயன்களுக்கு உதவுவது. இதனால், கரியமில வாயு தேவைப்படும் தொழில்கள், இயற்கையை அழிக்கத் தேவையில்லை. உதாரணத்திற்கு, உலகில் ஏராளமாக விற்கும் குளிர்பானங்கள் கரியமில வாயுவைக் கலந்துதான் விற்கின்றன!

விவரமாக இந்த்த் தொழில்நுட்பங்களை ஆராயுமுன், சில முக்கிய விஷயங்களை தெளிவாக்குதல் அவசியம்:

  1. இந்தத் தொழில்நுட்பப் போட்டியில், இங்கு விளக்கப்படும் சில நுட்பங்கள் பல பொருளாதாரக் காரணங்களால் தோற்றுப் போகலாம்
  2. சில நல்ல ஐடியாக்கள், வெற்றி பெறாமல் முதலீடில்லாமையால் முடங்கிப் போகலாம்
  3. சில தொழில்நுட்பங்கள், பெரிய அல்வில் ஒரு நாட்டிற்கு தேவையான அளவில் செயல்படுவதில் தடுமாறலாம்
  4. சில முயற்சிகள் சோதனைச் சாலையைத் தாண்டி வெளியே வராமலும் போகலாம்

இந்த்த் தொழில்நுட்பங்களுக்கு மிகப் பெரிய ஊக்கம், ஈலான் மஸ்க் அறிவித்திருக்கும் 100 மில்லியன் டாலர் கரிம எக்ஸ் பரிசு. உலகின் மிகச் சிறந்த செயற்கை கரிமகுறைப்பு தொழில்நுட்பத்திற்கு இந்த பரிசு என்று அறிவித்துள்ளார் மஸ்க். இதில், தனியார் நிறுவனங்கள், பல்கலைக்கழகங்கள் யார் வேண்டுமானாலும் எந்த நாட்டிலிருந்தும் போட்டியிடலாம்.

சட்டென்று இந்த கரிமகவர்வு விஷயத்தின் பின்னணியைப் பார்த்து விடுவோம். இது புதிய தொழில்நுட்பமல்ல.

  1. 1938 -ல். முதல் முயற்சி
  2. 1972 -ல், டெக்ஸாஸை சேர்ந்த ஒரு அனல் மின் அமைப்பு, பூமிக்குள் கரியமில வாயுவை எப்படிப் புதைப்பது என்ற தொழில்நுட்பத்தில் முதன்முறையாக வெற்றி பெற்றது.
  3. 1990 -ல், நார்வேயைச் சேர்ந்த ஸ்கிப்னர் கடலடியே எப்படி கரியமில வாயுவை புதைப்பது என்று உலகிற்கு செய்து காட்டியது
  4. இதன் பின் சோகக் கதைதான். உலகம், இந்த முயற்சிகளை மறந்து, தொல்லெச்ச எரிபொருளை எரித்து, எண்ணெய் நிறுவனங்களை கொழுத்த பண்முதலைகளாக்குவதிலேயே கவனம் செலுத்தின
  5. சொன்னால் நம்ப மாட்டீர்கள். இன்று உலகின் கரியை எரிக்கும் அனல் மின் நிலையங்கள் இரண்டில் மட்டுமே கரிமக்கவர்வு தொழில்நுட்பம் உள்ளது உலகில் கிட்டத்தட்ட 6,000 கரியால் இயங்கும் அனல்மின் நிலையங்கள் உள்ளன.
  6. இந்த இரண்டு கரிமக் கவர்வு அனல் மின் நிலையங்களைச் சொல்ல வேண்டியது அவசியம். அமெரிக்காவில் உள்ள NRG Petronova மற்றும் கனடாவில் உள்ள SaskPower in Boundary Dam
  7. இன்று, உலகில், 18 தனிப்பட்ட கரிமக்கவர்வு (Carbon Capture) அமைப்புகள் இயங்கி வருகின்றன.
  8. எல்லா அமைபுகளும் சேர்ந்து உட்கொள்ளும் கரியமில வாயு 35 மில்லியன் டன்கள். நாம் காற்றில் கலப்பதோ 40 கிகா டன்கள். அதாவது .1% குறைக்க, இந்தத் தொழில்நுட்பம் உதவுகிறது. 2060 -க்குள், ஒரு கணக்கு, சரியான தொழில்நுட்பத்துடன் நாம் 115 கிகா டன்களை வருடத்திற்கு உறிஞ்சும் திறம் பெற்று விடுவோம் என்று ஒரு அறிக்கை சொல்கிறது. காத்திருந்து,, எவ்வளவு தூரம் உண்மையாகிறது என்று பார்ப்பதைத் தவிர வேறு வழியில்லை

இந்த விஷயத்தில் ஏன் துரிதமாக உலகம் செயல்படவில்லை? முதல் காரணம், எண்ணெய் நிறுவனங்கள், வெற்றிகரமாக, விஞ்ஞானத்தைத் திரித்து, வெற்றி பெற்று, ஏராளமான லாபம் சம்பாதித்தார்கள். இரண்டாவது காரணம், இவ்வகை முயற்சிகளுக்கு அரசாங்கங்கள் அதிக ஊக்கம் அளிப்பதில்லை. இதில் விதிவிலக்கு, கலிஃபோர்னியா மாநிலம். புதிய சட்டத்தின் மூலம், கரிமக்கவர்வுக்கு ஊக்கமளிக்க உள்ளது. இன்றும் அந்த நிலை தொடருகிறது. இன்று, பல முயற்சிகள், கரியமில வாயுவை ஒரு லாப நோக்குடைய கருவியாக பயன்படுத்துதலையே முன் வைத்து முன்னேறுகின்றன. உதாரணத்திற்கு,

  1. சில அமெரிக்க எண்ணெய் நிறுவனங்கள், இவ்வகை முயற்சிகளை முன் வைத்து, இன்னும் அதிகமாக எண்ணெய் கிணறுகள் தோண்ட உரிமம் பெறுகின்றன
  2. ஸ்விஸ் நிறுவனமான க்ளிம்வர்க்ஸ், தன்னுடைய கரிமகவர்வு தொழில்நுட்பம் மூலம் உருவாக்கப்பட்ட கரியமில வாயுவை உரம் மற்றும் குளிர்பாண நிறுவனங்களுக்கு விற்கிறது
  3. சில நிறுவனங்கள், புதிய கட்டிட மூலப்பொருள் உருவாக்கத்திற்கு, கவர்ந்த கரியமில வாயுவை பயன்படுத்துகின்றன. ஈரமான கான்க்ரீக்ட் பதப்படுவதற்கு, இந்தக் கரியமில வாயுவைப் பயன்படுத்துகின்றன. இவ்வகைப் பயன்பாட்டினால், ஒரு கெட்டியான கட்டிட மூலப்பொருள் அதிக சக்தி செலவில்லாமல் உருவாக்கலாம்

கரிமக் கவர்வு என்பது மிகவும் சிக்கலான ஒரு பிரச்சினை. ஒரு அனல் மின்நிலையம் அருகில், காற்றில், 10 முதல் 20 சதவீதம் கரியமில வாயு இருக்கக்கூடும். இந்த சூழலுக்காக உருவாக்கப்பட்ட கரிமக் கவர்வு எந்திரம் அந்த சூழலில் மட்டுமே இயங்கவல்லது. மற்ற இடங்களில், கரியமில வாயுவின் அடர்த்தி, வெறும், 0.04% மட்டுமே. இவ்வளவு சன்னமான வாயுவை கவர்வது சற்று சிக்கலான விஷயம். இன்னொரு முக்கிய புரிதலும் இதற்குத் தேவை. இது, மரம் நடுவதைச் சார்ந்த விஷயம். மண்ணிற்கு கீழே உள்ள கரியமில வாயுவை 170 ஆண்டுகளாக காற்றில் மிதக்க விட்டதன் விளைவு இது.

  • உலகில் உள்ள காடுகளின் பரப்பில் 25% நம்மால், மனது வைத்தால், அதிகப்படுத்த முடியும் – இது வெறும் கோட்பாடு என்று விரைவில் புரிய வரும்!
  • அதாவது, 900 மில்லியன் ஹெக்டேர் அல்லது 2.2 பில்லியன் ஏக்கரை காடுகளாக மாற்றுவது வழி என்று வைத்துக் கொள்ளலாம்
  • ஏன் இதைச் செய்ய வேண்டும்? ஏனென்றால், 205 கிகா டன் அதிக கரியமில வாயுவை புதிய காடுகள் உள்வாங்கும். இதைச் செய்வதில் என்ன பிரச்சினை இருக்கப் போகிறது? விடிந்தால் சுபிட்சம் என்று சொல்லிவிட்டு, இழுக்கிறாரே என்று பார்க்கிறீர்களா?
    • அதாவது 500 பில்லியன் மரங்களைப் பற்றி இங்கு சொல்லியுள்ளோம்
    • இத்தனை மரங்கள் நட்டு அவை வளர்ந்து பயன் தர எத்தனை நாட்கள், வருடங்கள் ஆகும்? 2,000 வருடங்கள்!

ஏன் கரிமக் கவர்வு தொழில்நுட்பம் தேவை என்று IPCC சொல்லுகிறது என்று புரிந்திருக்கும். புதிய கரிமக் கவர்வு முயற்சிகள் சிலவற்றைப் பார்ப்போம்.

  1. நார்தர்ன் லைட்ஸ் ப்ராஜக்ட், (Project Northern Lights) நார்வே நாட்டின் மேற்கில் கடலில் உள்ள ஒரு பன்னாட்டு அமைப்பு. நிலத்தில், தொழிற்சாலைகளின் கரியமில வாயு உமிழைக் கவர்ந்து, கடலில் இருக்கும் இந்த அமைப்பிற்கு கப்பல் மூலம் அனுப்பப்படுகிறது. இந்த அமைப்பு, வடக்கு கடலின் அடியைத் தோண்டி, கரியமில வாயுவை புதைத்து விடும் திட்டம்.
    https://northernlightsccs.com/what-we-do/
    இதில், வருடத்திற்கு ஐந்து மில்லியன் டன் வரை இவ்வாறு புதைக்கப்படும். இதன் அடுத்த கட்ட திட்டம், கப்பலுக்கு பதி, கடலாழ குழாய்கள் மூலம், கரியமில வாயுவைக் கொண்டு செல்லுவது. கப்பல் மூலம் புதைக்கும் வேலை இன்று தொடங்கி விட்டது.
  2. ப்ராஜக்ட் டண்ட்ரா (Project Tundra, ND) வடக்கு டெகோடா மாநிலத்தில், நிலத்திற்கு அடியில் உமிழ் கடியமில வாயுவைப் புதைக்கும் திட்டம். இதன், வடிவைப்பாளர்கள், அந்த மாநிலத்தின் புவியமைப்பு, இவ்வகை புதையலுக்கு உதவும் என்று சொல்லுகிறார்கள். பல அடுக்குகளாக இருக்கும் பாறைகளைத் தோண்டி, கரியமில வாயுவைப் புதைத்து, துவாரத்தை மூடிவிட்டால், பாறைகளுக்கு இடையே வாயு தங்கி விடும்
    https://www.projecttundrand.com/
    வருடத்திற்கு 4 மில்லியன் டன்கள் கரிமக்கவர்வு இந்த அமைப்பில் சாத்தியம்.
  3. இன்னொரு சோதனை முயற்சி, அமின் என்ற ரசாயனத்தைக் கொண்டு, உமிழ் கரியமில வாயுவைக் கவர்வது. குறிப்பாக, மோனோஈதலினமின் (monoethanolamine (MEA) பெரிய நம்பிக்கையை உருவாக்கியுள்ளது. அதிகமாக உமிழும் தொழிற்சாலைகள் இதை நிறவுவது எளிது. இன்னும் பெரிய அளவில் வளர வாய்புள்ள தொழில்நுட்பம்.
    https://www.carbonclean.com/blog/solvent-based-carbon-capture
  4. எம்.ஐ.டி யின் ஆராய்ச்சி ஒன்று பல விஞ்ஞானிகளின் கவனத்தைக் கவர்ந்திருக்கிறது. இந்த தொழில்நுட்பத்திற்கு, Electroswing absorption technology என்று பெயர். இதன் முக்கிய அம்சம், மில்லியனில் நானூறு பங்கு கரியமில வாயு இருந்தாலும், அதை தனிப்படுத்தும் திறம் வாய்ந்த தொழில்நுட்பம்.
    https://news.mit.edu/2019/mit-engineers-develop-new-way-remove-carbon-dioxide-air-1025
    இது மின்கலன் போன்ற அமைப்புடையது. மின்னேற்றம் மற்றும் மின்னிறக்கம் இரண்டும் இதில் உண்டு, இந்த தொழில்நுட்பத்தில், மின்முனையில் ஒரு polyanthraquinone என்ற ஒரு கரிம நுண்குழாயால் அமைந்த (carbon nanotube) ஒரு பூச்சு, காற்றில் உள்ள கரியமில வாயுவுடன் மின்னேற்ற சமயத்தில் ரசாயன மாற்றமடைகிறது. இப்படி ரசாயன மாற்றமடைந்த கரியமில வாயு தனியொரு அமைப்பிற்கு கொண்டு செல்லப்படுகிறது. மின்னிறக்கத்தின் போது,சேர்க்கப்பட்டுள்ள கரியமில வாயு தனியாக ஒரு சேமிக்கும் சிலிண்டருக்கு மாற்றப்படலாம். இது சாதாரண வெப்பத்தில் இயங்கும் கருவி.கரியமில பயனாளர்கள், இந்த அமைப்பை எளிதாக தங்களுடைய தயாரிப்பு தொழிற்சாலையில் பயன்படுத்தலாம். எம்.ஐ.டி., இந்த தொழில்நுட்பம், தனிப்பட்ட பெரிய அளவு கரிமக் கவர்வுக்கு எளிதாகப் பயன்படுத்தலாம் என்கிறார்கள்
  5. கனடாவின் கார்பன் எஞ்சினியரிங் நிறுவனம், சாதாரண காற்றை உள்வாங்கி, மிக அதிக வெப்பத்திற்கு உள்ளாக்கி, ஹைட்ராக்ஸைடுடன் கல்யாணம் செய்து, எரிபொருளை (திரவம்) குழந்தையாக உருவாக்குகிறார்கள்.
    https://carbonengineering.com/
    எரிபொருளை விமானங்களுக்காக விற்கிறார்கள். இந்த நிறுவனம், தன்னுடைய ஒவ்வொரு தொழிற்சாலையும் 40 மில்லியன் மரங்கள் செய்யும் வேலையைச் செய்யும் என்கிறது. அதாவது, இது போல, 4,000 தொழிலகங்களை நிறுவினால், உலகின் காற்றுமண்டலத்திலிருந்து 160 பில்லியன் டன் கரியமில வாயுவை வருடத்திற்கு வெளியேற்றி, புதைக்கலாம். இதற்கான முதலீடு கிடைத்தால்,இது சாத்தியமாகலாம்
  6. ஆஸ்த்ரேலியாவைச் சேர்ந்த ஆர்தனா (Airthena) இதன் கரியமில வாயு விவாகரத்து தொழில்நுட்பம் Metal Organic Framework (MOF) என்கிறது.
    https://www.csiro.au/en/work-with-us/ip-commercialisation/marketplace/co2gen
    இந்த அமைப்பின் நோக்கம், கரியமில வாயு பயன் தொழிற்சாலைகளுக்கு, இந்த அமைப்பை விற்பது.

கரிமக்கவர்வு ஆராய்ச்சி இன்று திரிதமாக முன்னேறி வருகிறது. உரங்கள், கட்டிட கச்சா பொருட்கள், ப்ளாஸ்டிக் மற்றும் பெட்ரோல் யாவற்றையும் தயாரிக்க மண்ணைத் தோண்டத் தேவையில்லை. காற்றில் அபரிதமாக இருக்கும் கரியமில வாயுவைப் பயன்படுத்தினாலே போதும் என்பது ஒரு சார் ஆராய்ச்சியாளர்களின் வாதம். ஒரு அளவிற்கு மேல், ஏழை நாடுகள் மாறாத பட்சத்தில், இவ்வகை தொழில்நுட்பங்கள் நிச்சயமாக பயனளிக்கும். உலகின் மிகப் பெரும் கரி மற்றும் பெட்ரோல் பயனாளர்கள் இந்தியா மற்றும் சைனா. இந்த இரு நாடுகளிடமும் கச்சா எண்ணெய் கிணறுகள் அதிகமில்லை. இந்தத் தொழில்நுட்பங்கள் இந்த இரு நாடுகளின் போக்கை மாற்றினாலே போதும். உலகின் பாதி மக்கட்தொகை வாழும் இந்த இரு நாடுகளின் வாழ்க்கைத் தரம் உயரும். இதன் ஒரு பக்க விளைவாக, காற்று மாசும் ஏராளமாகக் குறையும்.

புவிச் சூடேற்றத்திற்கான தீர்வுகள் – பகுதி 21

இதுவரை நாம் விவரித்த தீர்வுகள், எப்படி உமிழைக் குறைக்கலாம் என்பதைப் பற்றியது. இவற்றை மட்டுமே செய்தால், நாம் தப்பிக்க முடியாது. இன்னொரு முக்கிய தீர்வு முறையையும் அதே நேரத்தில் நாம் மேற்கொள்ளுதல் அவசியம். நாம் உமிழும் கரியமில வாயுவை உட்கொள்ளும் இயற்கை முறைகளை மேலும் துரிதப்படுத்த உதவுதல் இரட்டிப்பாகப் பயனளிக்கும்.

முன்னமே பார்த்தது போல, இயற்கை, எப்பொழுதும் கரியமில வாயுவை, பல பில்லியன் ஆண்டுகளாக உள்வாங்கிக் கொண்டு வந்துள்ளது.

  • 24% – காடுகள் மற்றும் மரங்கள் நாம் உமிழும் கரியமில வாயுவை உள்வாங்கி, ஒளிச்சேர்க்கை மூலம் ஆக்ஸிஜனாக மாற்றுகின்றன
  • 17% – கடல், நாம் உமிழும் கரியமில வாயுவை உள்வாங்கிக் கொள்கிறது. இதனால், நாளுக்கு நாள், கடலின் அமிலத்தன்மை அதிகமாகிக் கொண்டு வருவதை முன்னம் பார்த்தோம்
  • 59% – மேல் சொன்ன இரண்டு இயற்கை முறைகளும் உள்வாங்கிக் கொண்ட பாக்கி கரியமில வாயு, நம் காற்று மண்டலத்தில் கலந்து இந்த பூமியைச் சூடேற்றுகிறது. விண்வெளிக்கு வெளியேற்றும் வெப்பம் அதிகமாகி வருவதற்கு இதுவும் முக்கிய காரணம்
  • பாவி மனிதன் இப்படி இயற்கையை சிதறடிப்பான் என்று ஒரு 150 வருடங்களுக்கு முன்கூட யாரும் யோசிக்க வில்லை

இந்தப் பகுதியில் நாம் பார்க்கப் போவதுஇயற்கை உள்வாங்கும் 41% கரியமில வாயுவை மேலும் எப்படிக் கூட்டலாம்?

நாம் எவ்வளவு முயன்றாலும், இந்த விஷயத்தில், இயற்கையைப் போன்ற அளவை நம்மால் எட்ட முடியாது – அது ஒரு 4 பில்லியன் ஆண்டுகளாகத் தொடர்ந்து முன்னேற்றப்பட்ட விஷயம்! இயற்கையின் இந்த அருமையான சேவையைக் குலைத்த நம்மால்அதற்கு உதவவும் முடியும். முதல் காரியமாக, இயற்கையிடம் மிஞ்சியிருக்கும் கரியமில வாயு உள்வாங்கும் அளவை மேலும் குறைக்க மாட்டோம் என்று ஒவ்வொரு மனிதனும் நினைக்க வேண்டும். இன்னொரு யதார்த்தையும் நாம் ஒப்புக் கொண்டே ஆக வேண்டும். மனிதர்கள், நிலப் பிராணிகள். கடல் நமது வீடல்ல. அதனால், 17% உள்வாங்கும் கடலுக்கு உதவுவதை விட 24% சதவீதம் உள்வாங்கும் நிலத்திற்கு மேலும் உதவுவது நமக்கு சாத்தியம்!

இன்னும் நான்கு முக்கிய விஷயங்களையும் நாம் மனதில் கொள்ள வேண்டும். இவற்றை மனதில் கொள்ளாததால் வந்த பிரச்சினையே இது.

  • புதிய உள்வாங்கும் முறைகள் (உதாரணம், காடுகள் வளர்ப்பது) பயனில் வருவதற்கு காலமாகும்
    • உள்ளூர் அனல் மின் நிலையத்தை மூடினால், இன்றே பயன். காடு வளர்த்தால், குறைந்த பட்சம் 30 ஆண்டுகளுக்குப் பின்னே பயன்
  • இயற்கை உள்வாங்கிகளுக்கு ஒரு எல்லை உண்டு. உதாரணத்திற்கு, புதிய முறைகளில் ஒரு விவசாயி, விவசாயம் செய்யத் தொடங்கலாம். அது தொடரும் என்று நிச்சயமில்லை. அவரது சந்ததியினர், இந்த முறைகளை கைவிடக்கூடும், அல்லது, விவசாயத்தையே துறக்கவும் வாய்ப்புண்டு
  • சில உள்வாங்கும் முறைகள் நிரந்தரமானவை அல்ல. நாம் வளர்க்கும் காட்டின் பங்கு அடுத்த வறட்சி அல்லது காட்டுத்தீ வரைதான்
  • நம்முடைய நிரந்தர கரியமில உள்வாங்கும் முறைகள், ஐஸிற்கு அடியில் உறைந்த நிலம், பாறைகள், பவளத்திட்டுகள்

இன்னும் சற்று விவரமாக ஒவ்வொரு நாடும் இயற்கைக்கு உதவ வேண்டிச் செய்ய வேண்டியவை:

  • இருக்கின்ற காடுகளை அழியாமல் பாதுகாப்பது. பிரேஸில் போலத் தொடர்ந்து காடுகளை அழிக்காமல், மற்ற நாடுகள் பாதுகாக்கச் செயலாற்ற வேண்டும். அப்படியே செயலாற்றினாலும், பிரேஸிலின் அமேஸான் அழிவுப் பாதையை ஈடு கட்ட முடிமா என்ற சந்தேகம் வருவது நியாயம். எல்லா நாடுகளும், பிரேஸில் இயற்கை மீது செலுத்தும் பயங்கரவாத அழிப்பை நிறுத்த வழிகள் உருவாக்க வேண்டும்
  • நம்முடைய கிராமப் பகுதிகளில், கால்நடைகள் மேய இருந்த நிலம் குறைந்து வருகிறது. இதை grasslands என்று சொல்வதுண்டு. மேய்ப்பு நிலங்கள் அதிகரிப்பது, விவசாயத்திற்கு நல்லது. இது புவி சூடேற்றத்தையும் சற்றுக் குறைக்கும். இயற்கைக்கும் கரியமில வாயுவை உட்கொள்ள உதவும்
  • நாம் சேற்று நிலங்களை (peat land) அதிகம் மதிப்பதில்லை. இதன் முக்கிய உதாரணம் மும்பை. அங்கு, தானேவைத் தாண்டினால், சேற்று நிலங்கள் அதிகம் காணப்படும். மும்பையின் பல (மும்பை ஒரு 7 தீவுகளின் கூட்டணி) பகுதிகளில், இன்னும் சேற்று நிலங்களில், வீட்டைக் கட்டி காசு பண்ணுகிறார்கள். சென்னையிலும், இந்த நிலை இருக்கத்தான் செய்கிறது. கடும் புயல் மற்றும் உயரும் கடல் அள்வுகளிலிருந்து ஓரளவு நாம் தப்பிக்க இயற்கை உருவாக்கியது சேற்று நிலங்கள். கடலோரப் பகுதிகளில் சேற்று நிலங்களை அப்படியே பாதுகாத்தால், இரட்டிப்பு நல்ல விஷயங்கள் அதில் அடங்கியுள்ளது. முதல் விஷயம், சேற்று நிலங்களில் வாழும் உயிரினங்கள் காக்கப்படும். இரண்டாவது விஷயம், இந்த சூழலில் உள்ள பல்லுயிர்கள், பல கோடி சின்ன செடிகளை, தண்ணீருடன் வளர உதவுவதோடு, இயற்கைக்கு கரியமில வாயுவை உள்வாங்கவும் உதவுகிறது. இனிமேல் சேற்று நிலங்களில், வீடு கட்ட, கடலோர நகரங்களில் அனுமதிக்கக் கூடாது
  • காடு மீட்புப் பணிகள் குளிர் மற்றும் வெப்பப் பகுதிகளில் (tropical and temperate forestry) உடனே துரிதப் படுத்த வேண்டும். காடுகளின் விளிம்பில் ஆரம்பித்து, மெதுவாக பழைய காட்டுப் பகுதிகள் மீட்கப்பட வேண்டும். இங்கு குடியிருப்புகள் இருந்தால், மிகவும் சிக்கலான பிரச்சினையாக இது மாற வாய்ப்புண்டு. விவசாய நிலமாக இருந்தால், விலங்குத் தீனிக்காக உருவாக்கிய விவசாய நிலத்தை இவ்வகை விவசாய நிலத்துடன் மாற்ற வழி செய்தால், காடுகளுக்கு விளிம்பு நிலங்களைத் திருப்ப முடியும். இன்னொரு வகை விளிம்பு மீட்பு நடவடிக்கையும் சாத்தியம். காட்டில் ஓடும் நதி அல்லது ஏரியை சரியாகப் பராமரித்தால், விளிம்புக் காடுகளை மீட்பதும் சில தருணங்களில் சாத்தியம்
  • முன்னமே சொன்னது போல, புதிய விவசாய முறைகள், தண்ணீரை சேமிப்பதுடன், விவசாயம் சார்ந்த கரியமில வாயுவையும் குறைக்க வழி செய்யும். சில நாடுகளில் மீளாக்க விவசாயம் (regenerative agriculture) மூலம், பல பயிர்களை விளைவிப்பதோடு, அனாவசியமாக, கரியமில வாயுவை காற்று மண்டலத்தில் கலப்பதையும் இதனால் குறைத்து வெற்றி பெற்றுள்ளார்கள்
  • உணவுக் கழிவைக் குறைக்க பல வழிகள் உள்ளன. வளரும் நாடுகளில், எங்கு பயிர் வளர்க்கப்படுகிறதோ, அந்த இடத்திலிருந்து (குறிப்பாக பழங்கள்) ஒரு 50 கி.மீ சுற்று வட்டாரத்தில், அதற்கான நுகர்வோர் அல்லது தொழிற்சாலையைச் சென்றடைய வேண்டும். கரும்பு விவசாயம் இதை அருமையாகச் செய்து வந்துள்ளது. சர்க்கரை ஆலையின் அருகே இந்த கரும்பு விவசாயம் பெரிதாக நடக்கிறது. இதனால், விவசாயிக்கும் நல்லது, சர்க்கரை ஆலைக்கும் போக்குவரத்து செலவு மிச்சம். பயிரும் வாடாது. அமெரிக்காவின் சோளப் பயிர் இந்த மாதிரிதான் இன்றைய ராட்சச நிலையை அடைந்தது
  • வளர்ந்த நாடுகளில், உணவுக் கழிவைக் குறைக்க வேண்டிய வழிகள் பற்றிய விழிப்புணர்வு தேவை. எத்தனையோ ஆண்டுகளாக கழிவைப் பற்றிக் கவலைப்படாத ஒரு நாகரீகத்தை மாற்றுவது அவ்வளவு எளிதல்ல. மேற்குலகில் பெரிய உணவு விடுதிகள், மீதப்படுத்திய உணவை, நுகர்வோர் கேட்டால், பொட்டலமாக்கி கொடுத்து விடுகிறார்கள். ஆனால், இதைப் பரவலாக பின்பற்றப்படுவதில்லை. மேலை நாடுகளில் உள்ள இந்திய உணவு விடுதிகள், பெரும்பாலும் வாரக் கடைசி நாட்களில், பஃபே என்று எவ்வளவு வேண்டுமானாலும் உணவு என்ற ஒரு முறையைப் பின்பற்றுகிறார்கள். என் பார்வையில், ஏராளமான உணவு இங்கு விரயப்படுத்தப்படுகிறது. நான் சென்ற ஒரு இந்திய உணவகம், ‘தட்டில் உணவுடன் மிச்சம் வைத்தால், அதற்கு $2 வசூலிப்போம்’ என்று அறிவித்து, இந்த விரயத்தைக் குறைத்துள்ளது. இதைப் போல, அனைத்து விடுதிகளும் தைரியமாக செயலில் இறங்க வேண்டும்

நாம் இங்கு சொன்ன விஷயங்களை எல்லா நாடுகளும் சொஞ்சம் சீரியஸாக எடுத்துக் கொண்டு செயலில் இறங்கினால், நிலத்தின் பங்கான 24% -ஐ, நிச்சயமாக 30% முதல் 35% ஆக அடுத்த பத்தாண்டுகளில் உயர்த்த முடியும். அப்படியே நாம் செய்தாலும், நம்மை சூழவிருக்கும் அபாயத்திலிருந்து தப்ப முடியுமா? நிச்சயமாகச் சொல்வதற்கில்லை இன்னும் இதை மேலும் துரிதப்படுத்த, மனித முயற்சிகள் தொடருகின்றன. அதாவது, பொறியியல் மற்றும் தொழில்நுட்பம் கொண்டு காற்றில் கலந்துள்ள கரியமில வாயுவை உள்வாங்கி, மண்ணின் அடியில் சேமிப்பது, மற்றப் பயன்பாட்டிற்குப் பயன்படுத்துவது என்று பல புதிய முயற்சிகளில், பொறியாளர்கள் மற்றும் விஞ்ஞானிகள் செயல்பட்டு வருகிறார்கள். இதில், தொல்லெச்ச எரிபொருளை விற்ரு காசு பண்ணும் திரித்தல்காரர்களும் சேர்ந்துள்ளார்கள். எது எப்படியோ, இந்த முயற்சிகளும் தேவை. இதைப் பற்றி விவரமாக அடுத்த பகுதியில் பார்ப்போம்.

புவிச் சூடேற்றத்திற்கான தீர்வுகள் – பகுதி 20

சென்ற பகுதியில், நாம் முன்வைத்த ஒரு விஷயம், பூமியின் காற்று மண்டலத்தில் கலக்கும், கரியமில வாயுவின் முக்கிய காரணம், தொல்லெச்ச எரிபொருள் எரிப்பது – அதாவது 62%. ஆக, முதலில் நாம் இந்த 62% எப்படி உருவாகிறது என்று பிரித்துப் பார்த்தால், எந்த மூலத்திலிருந்து உருவாகும் கரியமில வாயுவைக் குறைத்தால், நல்ல பயன் கிடைக்கும் என்று பார்ப்போம். இதன் வெவ்வேறு பாகங்கள்:

  • 25% – மின்சக்தி உற்பத்தி மற்றும் பயன்
  • 24% – உணவு உற்பத்தி மற்றும் நிலப்பயன்/ விவசாயம்
  • 21% – பொருட்களை உற்பத்தி செய்யும் தொழிற்சாலைகள்
  • 14% – போக்குவரத்து – பைக், கார், பஸ், லாரி, விமானம், கப்பல் எல்லாம் இதில் அடங்கும்
  • 6% – கட்டிடங்கள் – வணிக கட்டிடங்கள் மற்றும் வீடுகள்
  • 10% – மற்ற சக்தி சார்ந்த உமிழ்கள் (பெட்ரோல் சுத்திகரிப்பு, இயற்கை வாயு தயாரிப்பு, தார் மண் கச்சா எண்ணெய் தயாரிப்பு)

இதை முன் பகுதியில் பார்த்தோம். மிக முக்கியமான விஷயம், நாம் முதல் 5 விஷயங்களை மட்டும் சமாளித்தால், 90% சத்வீத பாகங்களை கட்டுப்படுத்த முடியும்.

முதல் விஷயமான மின்சக்தி உற்பத்தி மற்றும் பயன்பாட்டை விவரமாக கவனிப்போம்.

  • மின்சக்தியில் உள்ள மிகப் பெரிய பிரச்சினை, மின்சக்தி உற்பத்திக்கான மூலப்பொருள். உலகில், இன்னும் பெரும்பாலான நாடுகள், கரி மற்றும் இயற்கை வாயுவைப் பயன்படுத்தி, வெப்பத்தை உண்டாக்கி, அந்த வெப்பத்தைக் கொண்டு நீரை நீராவியாக்கி, நீராவியால், டர்பைனை சுழலவிட்டு மின்சாரம் உற்பத்தி செய்வதுதான். இந்த இரண்டு வகை மின் உற்பத்தியும் அனல்மின் சக்தி என்று சொல்லப்படுகிறது.
  • ஏன் கரியையும், இயற்கை வாயுவையும் தனிமைப்படுத்திக் காட்டுகிறோம்?
    • கரியை எரித்து மின்சக்தி உற்பத்தி செய்தால், கிலோவாட் ஒவ்வொன்றிற்கும் 2.2 பவுண்டு கரியமில வாயுவை சராசரியாக, காற்று மண்டலத்தில் நாம் கலக்கிறோம். கலந்த கரியமில வாயு, காற்று மண்டலத்தில் சில நூறு ஆண்டுகள் பூமியைச் சூடேற்றும்
    • இயற்கை வாயுவை எரித்து மின்சக்தி உற்பத்தி செய்தால், கிலோவாட் ஒவ்வொன்றிற்கும் 1.2 பவுண்டு கரியமில வாயுவை சராசரியாக, காற்று மண்டலத்தில் நாம் கலக்கிறோம். கலந்த கரியமில வாயு, காற்று மண்டலத்தில் சில நூறு ஆண்டுகள் பூமியைச் சூடேற்றும்
    • நீர், கதிரொளி மின்பலகை (Solar panels), காற்றுச் சுழலிகள், அல்லது அணு சிதறல் மூலம் மின்சக்தி உற்பத்தி செய்தால், கிலோவாட் ஒவ்வொன்றிற்கும் 0 பவுண்டு கரியமில வாயுவை சராசரியாக, காற்று மண்டலத்தில் நாம் கலக்கிறோம். அதாவது, நம்முடைய காற்று மண்டலம் விரும்பும் வழிகள் இவை
  • மின்சக்தி உற்பத்தியில் கரி மிகவும் மலிவான மூலப்பொருள். பல நாடுகள், கரியை நம்பிய நாடுகள். அனல் மின் நிலையங்களை மூடினால், தகுந்த மாற்று அமைப்பு உருவாக்குவது மிகவும் கடினமான விஷயம். உதாரணத்திற்கு, சமீப இந்திய மின்சார விரிவாக்கம், பெரும்பாலும், இயற்கை வாயுவை மூலமாகக் கொண்டது. சைனா, இன்னும் தன்னுடைய ராட்சச கரி சார்ந்த மின் நிலையங்களை மூடத் தொடங்கவில்லை. சொல்வது எளிது. ஆனால், செய்வது மிகவும் கடினம். நீர், காற்று மற்றும் சூரிய ஒளி குறைந்த பகுதிகள், அணு மின் நிலையம் ஒன்றே வழி. இதற்கான முதலீடு அதிகம்

இந்தப் பிரச்சினையின் இன்னொரு முகம், மின்சக்திப் பயன்பாடு. நாம் எவ்வாறு உருவாக்கிய மின்சக்தியைப் பயன்படுத்துகிறோம்?

  • இது போன்ற இந்திய புள்ளி விவரங்கள் இந்திய வீடுகள் பற்றி இல்லாததால், ஒரு சராசரி அமெரிக்க வீட்டில் எவ்வளவு மின்சக்தியைப் பயன்படுத்துகிறார்கள் என்று பார்ப்போம். வடக்கு அமெரிக்கா மற்றும் கனடாவில் குளிர்காலத்தில் சூடேற்ற, ஏராளமான சக்தி தேவை. அமெரிக்கத் தென் பகுதிகளில், நீண்ட கோடை காலத்தில், குளிர்சாதன மின்சாரத் தேவை அதிகம். ஆக, சராசரி வருடம் ஒன்றிற்கு, 12,000 கிலோவாட் மின்சக்தியைப் பயன்படுத்துகிறார்கள். இது வருடத்திற்கு 16,900 பவுண்டு அல்லது 8 டன் கரியமில வாயுவை காற்றுமண்டலத்தில் கலக்கும். வட அமெரிக்காவில் 200 மில்லியன் வீடுகள் என்று வைத்துக் கொண்டால், இதன் மொத்த கரியமில வாயுவின் அளவு 1.6 கிகா டன். இன்னும் தென் அமெரிக்கா, ஆசியா, யுரோப், ஆஸ்த்ரேலியா எல்லாவற்றையும் சேர்த்தால், இந்த கணக்கு எளிதில் 10 கிகா டன்னைத் எட்டிவிடும்

இதிலிருந்து ஒன்று மட்டும் நிச்சயம். மின்சக்தி உற்பத்தியை மாற்றுவதை விட, உடனே பயனளிக்கவல்லது, மின்சக்திப் பயன். இதனால்தான், அரசாங்கங்கள், உலகெங்கும், பல்வேறு ஊக்கங்களைத் தருகின்றன:

  • எல்.ஈ.டி விளக்குகள், 6 வாட் சக்தியில், கம்பி விளக்கின் 60 வாட் ஒளியைத் தருகின்றன. இவற்றைப் பயன்படுத்தினால், நாம் இந்தப் பிர்சிசினையைக் கட்டுக்குள் கொண்டுவர உதவுகிறோம்
  • வீட்டில், வெப்பம் மற்றும் குளிரைக் கட்டுப்படுத்தும் வெப்ப சீர்நிலைக்கருவி (thermostat) நாம் சூடேற்றத்திற்கோ, குளிர்விப்பதற்கோ பயன்படுத்தும் மின்சக்தியை மிச்சப்படுத்தும்
  • இந்தியாவில் அதிகம் பயன்படுத்தும் சூரிய வெப்ப நீர் சூடாக்கி, மின்சாரத்திற்கு பதில் இயற்கையைப் பயன்படுத்தும் எளிமையான பயன்பாடு
  • குளிர் பகுதிகளில் உள்ள மிக முக்கிய பிர்ச்சினை, வெப்பக்காப்பு (heat insulation). சரியான ஜன்னல், கதவு போன்ற கட்டிட பகுதிகளில் வெப்பக்காப்பு சரியாக இல்லையெனில், அதிக இயற்கை வாயு மற்றும் மின்சாரம் வீட்டை/ வியாபாரத்தை சூடேற்றுவதில் செலவாகும். இதனால், அரசாங்கங்கள் சரியாக கட்டிடங்களை வெப்பக் காப்பு செய்வதற்கு பல வகை ஊக்கங்கள் (வரிச்சலுகை) அளிக்கின்றன. இந்த விஷயம், குளிர்காப்பிற்கும் சூடான பகுதிகளில் பொருந்தும் வியாபார கட்டிடங்களில், பெருவாரியாக கண்ணாடி வெளிப்புறத்தில் பயன்படுத்தப்படுகிறது. எல்லா கண்ணாடிகளும் ஒன்றல்ல. சில உயர்தர கண்ணாடிகள், சூரிய வெப்பத்தை அதிகம் கட்டிடத்திற்குள் அனுமதிக்காது. இதனால், குளிர்விக்கும் மின்சாரச் செலவு குறையும். கட்டிட கண்ணாடிக்கான செலவு ஒரு முறைதான். ஆனால், மின்சார செலவு மிச்சம், மாதா மாதம் என்பதை வியாபாரங்கள் நினைவில் கொள்ள வேண்டும்.
  • அமெரிக்காவின் வட பகுதி மற்றும் கனடாவில், வீடுகளில், குளிர்கால வெப்பக்காப்பு மிகவும் முக்கியம். இங்கு ஜன்னல் கண்ணாடிகளின் அமைப்பில் இரண்டு அடுக்குகள், இடையே வெற்றிடத்துடன் உருவாக்கப்படுகிறது. இவ்வகை கண்ணாடிகள், 10 முதல் 15 வருடத்திற்கு ஒரு முறை மாற்றப்பட வேண்டும். இவற்றின் செயல்திறன் நாளடைவில் குறைந்து, மின்சாரப் பயன் அதிகரித்துக் கொண்டே இருக்கும்
  • கட்டிடங்களின் கூரையின் மேல், வளர்க்கப்படும் செடிகொடிகள், கட்டிடம் உள்வாங்கும் வெப்பத்தைக் குறைக்கும். இதனால், கட்டிடங்களின் குளிர்ச்சி மற்றும் அதற்கான மின்சாரத் தேவையும் வெகுவாகக் குறையும்.

சற்று நேரம் அதிகமானாலும், மின்சக்தி உற்பத்தித் துறையிலும் செயல்திறன் கூட்டுவது மற்றும், தெல்லெச்ச எரிபொருளைக் குறைப்பதும் அவசியம். சில நடந்துவரும் முயற்சிகளின் பட்டியல்:

  • கடந்த 120 ஆண்டுகளாக நாம் உருவாக்கிய மின்சாரமும் இன்றையத் தேவையும் வெவ்வேறு. நம்முடைய வழக்கமான முறை, டில்லி அருகே புகையை கக்கும் NTPC அனல் மின் நிலையம் முழு டில்லிக்கும் மின்சாரத்தை வழங்கி, காற்றை மாசுபடுத்துவது
  • மாறுபட்ட சிந்தனையில் ஒன்று, அடர்த்தியான கதிரொளி மின்பலகைகள் மூலம், வெப்பத்தை உண்டாக்கி, நீரை ஆவியாக்கி, ண்-நீராவி சுழலிகள் மூலம் மின்சாரம் தயாரித்தல்
  • பல்லாயிரம் கதிரொளி மின்பலகைகள் மூலம், வெப்பத்திற்கு பதில், ஒளியை மின்சாரமாக்குதல். இது ஒன்றும் புதிய ஐடியா அல்ல. புதியது இது: ஒரு கரி அல்லது இயற்கை வாயு மின் உற்பத்தி நிலையத்தில், படிப்படியாக அதன் உற்பத்தியைக் குறைக்கும் பொழுது, கதிரொளி மின்பலகைகளை சேர்த்துக் கொண்டே போனால், மின்சார நுகர்வோர் பாதிக்கப்பட மாட்டார்கள்
  • சிறு காற்றுச் சுழலிகள் மூலம், 100 அல்லது 200 நுகர்வோர் உள்ள கிராமங்களுக்கு மின்சாரம் வழங்குதல்
  • கடலில் உள்ள காற்றுச் சுழலிகள் மூலம் மின்சக்தியை உருவாக்கி, கடலோரப் பகுதிகளுக்கு மின்சாரம் வழங்குதல்
  • சாணம், சமயல் குப்பை போன்ற விஷயங்களை இயற்கையை எரிவாயுவாக மாற்ற வைத்து, சின்ன கட்டிடங்களுக்கு மின்சாரம் வழங்குதல். இது இந்தியா மற்றும் வளரும் நாடுகளில் பின்பற்றப்பட்டு வந்துள்ளது

மேலே சொன்ன முறைகள், உறபத்தி விரிவாக்க முறைகள். உற்பத்தியான மின்சக்தி, விரயம் ஆகாமல் பார்த்துக் கொள்லுதல் மிக அவசியம். அங்கங்கு மின்சக்தி உருவாக்கப்பட்டால், கம்பிகள் மூலம் மின்கடத்துதலில் ஏற்படும் நஷ்டம் குறையும். இது பெரிய நாடுகளின் மிகப் பெரிய பிரச்சினை. இன்னொரு முக்கிய தேவையான முன்னேற்ற்ம், உருவாக்கிய மின்சக்தியைத் தேக்குதல். இன்றைய மின்கலன்கள் ஏராளமாக முன்னேறினால் மட்டுமே இது சாத்தியம். ஒரு காரை இயக்கலாம், ஆனால், இன்றைய மின்கலன்கள், ஒரு ஊரை இயக்குமா என்பது சந்தேகமே.

இதுவரை நாம் பார்த்தது, மின்சார உற்பத்தி மற்றும் பயனில் எப்படியெல்லாம் தொல்லெச்ச எரிபொருளைக் குறைப்பது என்பது. இன்று 25%, என்றிருக்கும் இந்த அளவை, இன்னும் 10 ஆண்டுகளில், நாம் மனது வைத்தால், 10% ஆகக் குறைக்க முடியும். அதற்கான தொழில்நுட்பம் இன்று நம்மிடம் உள்ளது. இதில் உற்பத்தியாளர்கள் மற்றும் நுகர்வோர், இருவரின் பங்கும் முக்கியம்.

தொல்லெச்ச எரிபொருளை நம் காற்றுமண்டலத்தில் கலப்பதில், மின்சக்தி உற்பத்தி மற்றும் பயனுக்கு அடுத்தபடியாக, நாம் சமாளிக்க வேண்டிய விஷயம், உண்வு உற்பத்தி (24%). இந்த 24% -தை பிரித்துப் பபார்ப்போம்:

  • 9%, – காடுகளை அழித்து, மற்றும் நிலத்தை தரிசலாக விடுவதால்
  • 6% – விவசாய விலங்குகள் காற்றுமண்டலத்தில் கலக்கும் மீதேன் வாயு. இதில் 1%, அரிசியிலிருந்து.
  • 4% – அதிகபட்ச உரத்திலிருந்து நீரில் கலந்து, காற்று மண்டலத்தில் இறுதியாகக் கலக்கும் நைட்ரஸ் ஆக்ஸைடு
  • 5% – மற்ற விவசாயக் காரணங்கள்

என்ன செய்தால், இந்தக் காரணிகளைக் குறைக்க முடியும்?

  • முதல் இரண்டு காரணிகள் தொடர்புடையவை. மாமிசத்திற்காக, ஆட்டையும் கோழியையும், மாட்டையும் வளர்க்கிறோம். இவற்றிற்கு தீனி போட காடுகளை அழிக்கிறோம். காடுகளை அழித்து, விவசாயம் செய்து, பயிர்களை கால்நடைகளுக்குக் கொடுக்கிறோம். இது ஒரு முடிவில்லா சங்கிலி. இதை உடைக்க ஒரே வழி, அடுத்த பத்தாண்டுகளில், மனிதர்கள் பெரிய அளவில் மாமிசத்தை உணவில் குறைக்க வேண்டும். நம்புவதற்கு கடினமாக இருக்கும் – மாமிசத்தைத் துறந்தால், ஏராளமான புதிய காடுகளை நாம் மீண்டும் உருவாக்கத் தொடங்கலாம். இவை பயன் தர பல ஆண்டுகள் ஆகலாம். ஆனால், தொடர் புவி சூடேற்றம் குறைவது நிச்சயம். மாடுகள் வெளியேற்றும் மீதேன் வாயு, அவை உண்வு உண்டுவிட்டு விடும் ஏப்பத்தால்.
  • இன்னொரு மிகப் பெரிய விவசாயம் சார்ந்த விஷயம், விவசாயக் கழிவுகள். இது ஏழை மற்றும் பணக்கார நாடுகளில் இரண்டு வெவ்வேறு முறைகளில் வியாபிக்கிறது. பணக்கார நாடுகளில், அதிகமாக உணவை விரயம் செய்வதால் உருவாகும் கழிவு குறைக்கப்பட வேண்டும். வேண்டாத உணவை வாங்குவது, அதை உண்ணாமலே தூக்கி எறிவது, என்பது பணக்கார நாடுகளில் சகஜம். பெரும் சூப்பர் மார்கெட்டுகள், மிகப் பெரிய பொட்டலங்களில், எப்படியோ உண்வை/உண்வுப் பொருட்களை, நுகர்வோர் தலையில் கட்டி விடுகின்றன. தேவைக்கு அதிகமாக வாங்கப்படும் உணவுப்பொருள் மற்றும் உணவு, கழிவாவதில் என்ன வியப்பு? ஏழை நாடுகளில், பெரும் பிரச்சினை, விளைந்த காய்கள், பழங்களை சந்தைக்குக் கொண்டு செல்ல வசதி இல்லாதது. ஒரேடியாக பழுத்த வாழைப்பழம், மாம்பழம் அல்லது காய்கறிகள், தகுந்த குளிர்சா்ன வசதி இல்லாததால், வழியிலேயே அல்லது விவசாய நிலத்திலேயே கழிவாகின்றன. இந்த கழிவுப் பிரச்சினை ஒரு உலகளாவியப் பிர்ச்சினை. ஒரு புறம் உண்வுப் பற்றாக்குறை, மற்றொறு புறம், உணவுக் கழிவு என்பது நாம் அன்றாடம் பார்க்கும் முரண். கழிவாக மாறும் உணவு, காற்றுமண்டலத்தில் சூடேற்ற வாயுக்களை சேர்ப்பது உண்மை. இதைக் குறைப்பது மிகவும் அவசியம்
  • உரங்களைப் பெருவாரியாகத் தெளிப்பது அல்லது தூறுவது எளிதான விஷயம். ஆனால், மண் ஓரளவிற்கே, கொடுக்கப்பட்ட உரத்தைப் பயன்படுத்தும், அதிகமாக இருக்கும் உரம், நீருடன் கலந்து, அந்த நீர் ஆவியாகும் பொழுது,, நம் காற்றுமண்டலத்தில் நைட்ரஸ் ஆக்ஸைடாகக் கலக்கிறது. சரியான அளவு உரங்களைப் பயன்படுத்தினால், உர உற்பத்தியையும் குறைக்கலாம் (இது ஒரு ஏராளமான சக்தியை உறிஞ்சும் உற்பத்தித் தொழில்), காற்றில் கலக்கும் வெப்பமேற்றும் வாயுவையும் குறைக்கலாம்.
  • பல புதிய விஞ்ஞான ரீதியான விவசாய முறைகள், மேலும், இருக்கும் நிலத்தை மேலும் அதிக பயந்தருமாறு செய்யலாம்:
    • காப்பு வேளாண்மை (conservation agriculture)
    • மீளாக்க வேளாண்மை (regenerative agriculture)
    • நீர்பாசன செயல்திறன் (irrigation efficiency)

நாம் இங்கு பட்டியலிட்ட விஷயங்களை தீவிரமாக காரியத்தில் இறங்கினால், நிச்சயமாக, 24% பங்களிப்பை, 10% முதல் 14% -ற்கு, அடுத்த பத்தாண்டுகளில் சாத்தியம்.

அடுத்த, முக்கிய கரியமில வாயுக் காரணி, தயாரிப்புத் தொழில். ஊசியிலிருந்து ராக்கெட் வரை தயாரிப்பு என்பது ஒரு நாட்டின் பொருளாதார முன்னேற்றத்தின் அடையாளமாலிவிட்டது. ஆனால், இதன் காற்றில் கலக்கும் கரியமில பங்கு 21%. வழக்கம் போல, இந்த 21% -ஐ, பிரித்து ஆராயலாம்:

  • 5% எஃகு மற்றும் இதர உலோகங்கள் தயாரிப்பு. இவை ஏராளமான மின்சக்தி மற்றும் எரிபொருளைப் பயன்படுத்தும் தொழில்
  • 3% – சிமெண்ட் தயாரிப்பு. சிமெண்ட தயாரிப்பு, காற்றில், எஃகை விட அதிகமாக, கரியமில வாயுவை கலக்கும் ஒரு தேவையான, ஆனால், சுற்றுச்சூழலை மாசுபடுத்தும் தொழில்
  • 3% – ரசாயனத் தயாரிப்பு – இதில், உரம், வண்ணப்பூச்சு, அமிலம் மற்றும் பல தயாரிப்புகள் காரணிகள்
  • 3% – நாம் தூக்கி எறியும் பொருட்களை எரிப்பது அல்லது புதைப்பதற்கான தொழில் உருவாக்கும் கரியமில வாயு
  • 8% – மற்ற தொழில்கள் – பெட்ரோலிய, ப்ளாஸ்டிக், வாகனங்கள் என்று இந்தப் பட்டியல் மிக நீண்டது

இன்னொரு மிக முக்கிய தயாரிப்பு சார்ந்த விஷயம், குளிர்விக்கும் திரவங்கள் சார்ந்த விஷயம். நாம் ஓஸோன் அடுக்கு பகுதியில் எப்படி CFC குளிர்திரவங்கள் ஓஸோன் அடுக்கை பாதிக்கிறது மற்றும் மாண்ட்ரீயல் ஒப்பந்தப்படி எப்படி, உலகம் ஒன்று சேர்ந்து அதை தடுத்து வெற்றி கண்டது என்று பார்த்தோம். CFC குளிர்திரவங்களுக்கு மாற்றாக, HFC குளிர்திரவங்கள் அறிமுகப்படுத்தப்பட்டன என்றும் பார்த்தோம். இது தலைவலி போய் திருகுவலி வந்த கதையாகியுள்ளது. HFC குளிர்திரவங்கள், ஓஸோன் அடுக்கை குலைக்காவிட்டாலும், ஏராளமாக நம் காற்றுமண்டலத்தில், கரியமில வாயுவை கலக்க வழி செய்கிறது. தொழிற்சாலைகளில் குளிர்திரவங்களின் கசிவு அதிகம்.

இதற்கான தீர்வு என்ன?

பல வழிகள் தயாரிப்பு தொல்களுக்கு இன்று உள்ளது உண்மை:

  • ப்ளாஸ்டிக், உலோகங்கள் மற்றும் சிமெண்ட் ஆகிய மூன்று பொருட்களுக்கும், மாற்றுப் பொருள்கள் இன்று உருவாக்கப்பட்டுள்ளன. நுகர்வோர் பயன்பாடு அப்படியே இருக்க, இவை, குறைந்த சக்தியோடு, குறைந்த கரியமில வாயுவை காற்றில் கலக்கும் வழிகள் உள்ளன. அரசாங்கங்கள், இந்த மூன்று தயாரிப்பாளர்களையும் மாற்ற, தடாலடி நடவடிக்கை எடுக்க வேண்டும்.
  • முன்னமே சொன்னது போல, கழிவுகளைக் கொண்டு, புதிய பொருட்களை உருவாக்கலாம். எரிக்கப்படும் குப்பையிலிருந்து, மின்சக்தியையும் உருவாக்கலாம்
  • குளிர்படுத்தும் ரசாயன வாயுக்களை, அப்புறப்படுத்த்ப்படும் பொழுதும், பயன்படுத்தப்படும் பொழுதும், இவை காற்றுமண்டலத்தில் கலாக்காமல் பார்த்துக் கொள்ளுதல் மிகவும் அவசியம். இன்னும் சில ஆண்டுகளில் (சில நம்பிக்கையூட்டும் அராய்ச்சி), இவை புதிய ரசாயனங்களுக்கு (புவி சூடேற்றா குளிர்சாதன வாயுக்கள்) மாறுதலும் முக்கியம்
  • மாற்று முயற்சி ஆராய்ச்சிகள் துரிதப்படுத்தப்படும் அதே நேரத்தில், இருக்கும் தயாரிப்பு அமைப்புகளின் செயல்திறன் (அதாவது கரியமில வாயு கண்ணோட்டத்தில்) அதிகப்படுத்தப்பட வேண்டும்

இந்த முயற்சிகள், 21% பங்கீட்டை, 12% முதல் 15% -ற்கு, அடுத்த பத்தாண்டுகளில் செய்து முடிக்க நம்மிடம் வழிகள் உள்ளன. அரசாங்கங்களின் தொலைநோக்கு மற்றும் செயல்பாடு ஒன்றே குறை.

அடுத்த முக்கிய காரணி, நாமெல்லாம் அன்றாடும் பார்க்கும், போக்குவரத்துத் தொழில். 14%, தொல்லெச்ச எரிபொருளை எரித்து, கரியமில வாயுவை காற்றுமண்டலத்தில் கலக்கும் இந்தத் தொழில், மூன்றாவது பெரிய காரணி என்பது சற்று வியப்பளிக்கக்கூடும். இதையும் பிரித்துப் பார்த்து விடுவோம்:

  • 10% – சாலைப் போ்க்குவரத்து
  • 2% – விமானப் போக்குவரத்து – வணிக மற்றும் ராணுவப் போக்குவரத்து
  • 2% – மற்றப் போக்குவரத்து – கப்பல், ரயில் இதில் அடங்கும்

சாலைப் போக்குவரத்தை நாம் முதலில் சமாளித்தால்தான், இந்தன் பங்கீட்டைக் குறைக்க முடியும். சில முக்கிய விஷயங்கள் இங்கு மனதில் கொள்ள வேண்டும்

  • வட அமெரிக்காவில், சரக்கு ரயில்கள் டீசலில் இயங்குகின்றன. சரக்குப் போக்குவரத்து, பெரும்பாலும், வட அமெரிக்காவில் லாரிகளின் மூலம் நடக்கிறது. பல லட்சம் லாரிகள், ஒவ்வொரு நாளும் கனடா மற்றும் அமெரிக்காவில் சரக்குகளை துறைமுகத்திலிருந்து சில்லரை வியாபாரங்கள், தொழிற்சாலைகளுக்கு எடுத்துச் செல்லுகின்றன. இதன் பங்கு கார்களை விட பல மடங்கு அதிகம். டெஸ்லா நிறுவனம், மின்சார லாரிகளை அறிமுகப்படுத்துவதாகச் சொல்வது சற்று நம்பிக்கை அளிக்கிறது
  • கார்களுக்கு வருவோம்.
    • சராசரி கார் ஒன்று, வட அமெரிக்காவில், வருடத்திற்கு 24,000 கி.மீ. பயணிக்கும்.
    • ஒவ்வொரு லிட்டர் பெட்ரோலை எரிக்கையில், சராசரி 2.37 கிலோ, கரியமில வாயுவை காற்றில் கலக்கிறது
    • ஒவ்வொரு லிட்டருக்கும், சராசரி கார், 10.55 கி.மீ தூரம் போகிறது. அதாவது, 24,000 கி.மீ. பயணத்திற்கு, ஏறக்குறைய 2,400 லிட்டர் பெட்ரோல் தேவை. இதை இன்னொரு கோணத்தில் பார்த்தால், 2,400*2,37 = 5,688 கிலோ கரியமில வாயுவை காற்றில் கலக்கிறோம். இது, காற்று மண்டலத்தில் கலந்து, பல நூறு ஆண்டுகள், நம் பூமியைச் சூடேற்றும்
    • சராசரி காரின் எடை 2 டண். காரின் எடையை விட மூன்று மடங்கு ஒவ்வொரு ஆண்டும், ஒவ்வொரு காரும் கரியமில வாயுவை காற்றில் கலந்து விடுகின்றன
  • இதற்கு என்ன தீர்வு?
    • முதல்படியாக, ஹைப்ரிட் கார்கள் அல்லது மின்சாரக் கார்கள், இவை இரண்டு மட்டுமே விற்கப்பட வேண்டும். ஹைப்ரிட் கார்கள், பேட்டரி உதவியுடன், கொஞ்ச தூரம் பயணிக்கும். பிறகு, வடிவமைப்பிற்கு தகுந்தாற்போல, மின்சாரம் மற்றும் தொல்லெச்ச/ எரிபொருள் மூலம் கணினி உதவியுடன் பயணத்தை மாற்றிக் கொண்டே வரும். வெறும் தொல்லெச்ச எரிபொருள் கார்களை விட இவை குறைவான பெட்ரோலையே பயன்படுத்தும். இந்தியா, சைனா போன்ற தேசங்கள் பல்லைக் கடித்துக் கொண்டு இதைச் செய்யத்தான் வேண்டும். மேற்குலகம், இதற்கு முன்னுதாரணமாய் அடுத்த 2 ஆண்டுகளில் செயலிறங்க வேண்டும்
  • மின்சாரக் கார்கள் இன்று விலை அதிகமாக உள்ளன. சற்று அரசாங்க ஊக்கம்/ வரிச் சலுகை இருந்தால், இவற்றை மேலும் விலை குறைக்க முடியும். இது நடந்து வருகிறது. மேலும் துரிதப்படுத்தப்பட வேண்டும்
    • சில சோதனை முயற்சிகளில், 400 கி,மீ தூரம் பறக்கும் மின்சார விமானங்கள் வெற்றி பெற்றிருப்பது நம்பிக்கை அளிக்கிறது
    • SUV -களுக்கு 500% அதிக வரி விதித்து அவற்றை மிக அதிக விலை உயரச் செய்ய வேண்டும்
    • மின்சாரப் பொதுப் போக்குவரத்து அதிகமாக்கப்பட வேண்டும்

இங்கு சொல்லியுள்ள யோசனைகள் எல்லாம் இன்றைய சாத்தியம். பெட்ரோல் கார்களை கொஞ்சம் கொஞ்சமாக துறக்க வேண்டும். அடுத்த பத்தாண்டுகளில், இந்த 14% பங்கீடு, 7% ஆக குறைப்பது சாத்தியம்.

கடைசியாக, நாம் பார்க்கப் போகும் காரணி, 6% பங்கிடு உள்ள கட்டிடங்கள். கட்டிடங்கள், கரியமில வாயு விஷயத்தில் இரண்டு கோணங்களில் பார்ப்பது அவசியம். இவை, ஏராளமான சக்தியை பயன்படுத்துவதோடு, கரியமில வாயுவையும் உமிழும் காரணிகள். vஅழக்கம் போல, பிரித்து ஆராய்வோம்:

  • 2% – வணிகக் கட்டிடங்கள்
  • 4% – குடியிருப்புகள்

ஒரு சராசரி வட அமெரிக்க (மன்னிக்கவும், இந்தியப் புள்ளி விவரங்கள் இந்த விஷயங்களில் மிகவும் வீக்) வீடு வெளியேற்றும் கரியமில வாயு, வருடத்திற்கு 6,000 கிலோ. இது பெரிய விஷயமா என்று தோன்றலாம். சராசரி வீட்டில் இரண்டு கார்கள் என்று வைத்துக் கொண்டால், இந்த வீட்டின் வருடாந்திரப் பங்கு 18 டண் கரியமில வாயு! இது போல, 200 மில்லியன் வீடுகள் வட அமெரிக்காவில் இருக்கிறது என்று வைத்துக் கொள்வோம். நாம் இங்கு பார்ப்பது 3.6 கிகா டண் கரியமில வாயு.

இதற்கு என்ன தீர்வுகள்?

  • வீட்டில் உள்ள உலை, கொதிகலன்கள், குளிர்சாதன எந்திரங்கள், செயல்திறன் அதிகமானதாக மாற்றப்பட வேண்டும். மேலும், வீட்டின் வெப்பம் மற்றும் குளிர்காப்பு திறன் அதிகப்படுத்தப்பட வேண்டும். அரசாங்கங்கள், இவ்வகை மாற்றங்களுக்கு மேற்குலகில் சலுகைகள் அளிக்கின்றன
  • வீடுகளில், திறன் வெப்ப மற்றும் குளிர் கட்டுப்பாட்டுக் கருவிகள் நிறுவப்பட வேண்டும்
  • குளிர் பகுதிகளில், கட்டிடத்தில் பயன்படுத்தப்படும் கண்ணாடிகள் குளிர் மற்றும் வெப்பக் கட்டுப்பாட்டிற்கு உதவும் ரகமாக இருக்க வேண்டும். கட்டிடங்களில், விரயத்தால் நிறைய சக்தி வீணாகிறது
  • முன்னமே சொன்னது போல, கூரைகளில் சின்ன செடிகள் குளிர்விப்பதற்காக நிறுவப்பட வேண்டும்
  • சூரிய வெப்ப நீர்கொதி எந்திரங்கள், மின்சாரத்தை உறிஞ்சாமல், நீரைச் சூடாக்குகின்றன

ஆக, இந்தப் பகுதியில் நாம் விவரமாகப் பார்த்தது, 62% தொல்லெச்ச எரிபொருள் கார்ரணியை எப்படி எல்லாம் நாம் கட்டுக்குள் கொண்டு வர முடியும் என்பது. இதில் உள்ள பெரும்பாலான இன்றைய தொழிநுட்பங்களைப் பயன்படுத்தினால், இந்த பங்கீட்டை, 25% முதல் 30% ஆகக் குறைக்க முடியும்.

அடுத்த பகுதில், நாம் பார்க்கப் போவது, இந்த கரியமில வாயுவை உட்கொள்ளும் இயற்கைக்கு நாம் எப்படி உதவுவது என்பதைப் பற்றியது. காரணிகளை மட்டும் சமாளித்தல் போதாது. இயற்கையின் உள்வாங்களுக்கும் உதவுதல் அவசியம். அப்பொழுதுதான், நாம் இந்தப் பிர்ச்சினையை ஓரளவிற்கு சமாளிக்க முடியும்.

புவிச் சூடேற்றத்துக்கான தீர்வுகள் – பகுதி 19

சிலர், மரம் வளர்த்தால், எல்லாம் சரியாகிவிடும் என்கிறார்கள். இன்னும் சிலர், கார்கள், லாரிகள் குறைந்தால், காற்று மாசும் குறையும், புவி சூடேற்றமும் சரியாகிவிடும் என்கிறார்கள். இன்னும் சிலர், இதோ, காற்றில் உள்ள கரியமில வாயுவை ஒரு எந்திரத்தைக் கொண்டு சரி செய்யலாம் என்கிறார்கள். பில் கேட்ஸ், மரங்களின் ஒளிச்சேர்கையை துரிதப்படுத்தினால், எல்லாம் சரியாகிவிடும் என்கிறார். இன்னும் சில ஆர்வலர்கள், சூரிய பலகம் எல்லாவற்றையும் சரி செய்து விடும். சூரிய ஒளியை மின்சாரமாக்கும் மின்கலன்களின் செயல்திறன் கூடியுள்ளது. அதைப் பயன்படுத்தினாலே இந்தப் பிர்ச்சினையை தீர்க்க முடியும் என்றும் சொல்கிறார்கள்.

தலை சுற்றுகிறது அல்லவா?

ஒரு உத்தரவாதம் அளிக்கிறேன். அடுத்த சில கட்டுரைகளை வாசித்தால், உங்களது இந்தக் குழப்பம் முற்றிலும் குறையும். அதற்கு முன்னர், சில விஷயங்களை இந்த உலகப் பிரச்சினையில் நாம் அனைவரும் ஒப்புக் கொள்ள வேண்டும்.

  1. எந்த ஒரு தீர்வும் இந்தப் பிரச்சினையைத் முழுவதும் தீர்க்கப் போவதில்லை. இந்த ராட்சச பிரச்சினையை, பல தீர்வுகள் கொண்டே கட்டுப்பாட்டுக்குள் கொண்டு வர முடியும்
  2. சில தீர்வுகள், உடனே பயனளிக்கும் (பைக்கைத் துறந்து சைக்கிள்), மற்றவை சில ஆண்டுகளுக்குப் பிறகு பயனளிக்கும் (மரங்கள்).
  3. சில தீர்வுகள், மிகவும் அதிகமாக செலவாகும், மற்ற சில தீர்வுகள் எளிமையாக அனைவருக்கும் பொருந்தும்.
  4. இந்தியா போன்ற நாடுகள், முதலீடுக்கு எங்களிடம் பணமில்லை என்று சொல்லி பல தீர்வுகளை புறக்கணிக்கக் கூடும். இது போன்ற நாடுகளுக்கு எதில் முதலீடு செய்தால், எப்பொழுது என்ன பயன் விளைவிக்கும் என்பதைப் புரிய வைக்க வேண்டும்.
  5. ஏன் ஒரு பிரச்சினை உருவானது என்பதைப் புரிந்து கொண்டாலே, அதைத் தீர்க்க முடியும்.

ஆக, இந்தப் பகுதியில், மிகச் சுருக்கமாக, எப்படி இந்தப் பிரச்சினையில் மனிதகுலம் மாட்டிக் கொண்டு விட்டது என்பதைப் புள்ளி விவரங்களோடு பார்ப்போம். அதன் பின், எந்தத் தீர்வுகளில் நாம் கவனம் செலுத்த வேண்டும் என்றும் பார்ப்போம். ஒன்று மட்டும் நிச்சயம். இதைப் படிக்கும் ஒவ்வொருவருக்கும், ஏதோ ஒரு விஷயத்தில், உங்களது புரிதல், முற்றிலும் ஒரு புதிய பாதையில் பயணிக்கும். இது என் உத்தரவாதம்.

எப்படி மாட்டிக் கொண்டோம்?

  • நம்முடைய மூதாதையினர், தங்களுடைய நடவடிக்கைகளால், சின்ன சின்ன சுற்றுச்சூழல் மாறுதல்களை தங்களுடைய குறுகிய சுற்று வட்டாரத்தில் உருவாக்கினர்
  • கடந்த 200 ஆண்டுகளாக, நம்முடைய நடவடிக்கைகள், சுற்று வட்டாரத்திலிருந்து, உலகளவில் சுற்றுச்சூழல் மாற்றங்களை உருவாக்கத் தொடங்கியது
  • இன்று, உலகில் 7.5 பில்லியன் மனிதர்கள் வசிக்கிறோம். அதில் 50% மனிதர்கள், நகரங்களில் வசிக்கிறார்கள்
  • கடந்த 50 வருடங்களில், உலகின் மக்கட்தொகை இரட்டிப்பானது. உலகின் பொருளாதாரத்தில் அளவு 5.5 மடங்கு அதிகரித்தது. இரட்டிப்பு மனிதர்களுக்கு 5.5 மடங்கு பொருளாதார வளர்ச்சி!
  • கடந்த 50 ஆண்டுகளில், நமது தண்ணீர் தேவை 1.8 முறை அதிகமானது, தொல்லெச்ச எரிபொருள் தேவை 2.8 முறை அதிகமானது, நமது உணவுத் தேவை மூன்று மடங்கானது!
  • கடந்த 50 ஆண்டுகளில், வெப்ப மண்டலக் காடுகள், 30% குறைந்து விட்டன.
  • அதே 50 ஆண்டுகளில், உலகத்தின் மிகப் பெரிய காடான அமேசான் காட்டில் 25%, விவசாய நிலமாக மாற்றப்பட்டது. எதற்கு? சீனாவில் உள்ள பன்றிகளுக்கு உணவாக சோயா வளர்ப்பதற்கு!
  • கடந்த 50 ஆண்டுகளில், உலகின் 35% முதல் 40% நிலம், விவசாயத்திற்காக அழிக்கப்பட்டுள்ளது (இவை காடுகளாக முன்னம் இருந்தவை)
  • உலகின் 70% குடிநீர், விவசாயப் பாசனத்திற்கு பயன்படுத்தப்படுகிறது
  • நம் பூமியில் கடந்த 6 மில்லியன் வருடங்களாக நடக்காத மாற்றம், கடந்த 50 ஆண்டுகளில் நிகழ்ந்துள்ளது!

அப்படி என்ன கிழித்தோம்?

கடந்த 50 ஆண்டுகளில், மனித முன்னேற்றம், முன்னம் இருந்த காலங்களை விட பல விதத்திலும் துரிதமானது.

  • சராசரி மனிதனின் வாழ்நாள் 55 -லிருந்து 71 ஆக உயர்ந்தது. உலகளவில் மருத்துவ முன்னேற்றம் இதற்கு முக்கிய காரணம்.
  • பெண்கள், சராசரி 5 குழந்தைகளிலிருந்து, இன்று 2.4 குழந்தைகளுக்குத் தாயாகிறார்கள். இதற்கு முக்கிய காரணம், வளர்ந்து வரும் (பெண்) கல்வி அறிவு மற்றும் மருத்துவம்.
  • உலகின் சராசரி எழுத்தறிவு 50% -லிருந்து 86% -ற்கு உயர்ந்தது. இதற்கு முக்கிய காரணம், கல்வி என்பது உலகின் பல கீழ்மட்ட மனிதர்களுக்கும் எட்டியதுதான்.
  • கடந்த 6 மில்லியன் ஆண்டுகளைக் காட்டிலும் அதிகமாக, மனிதர்களுக்குள் போக்குவரத்து, மற்றும் தொடர்பு வளர்ந்து விட்டது. கடந்த 15 ஆண்டுகளாக, சமூக வலைத்தளங்கள் இதை மேலும் ஊக்கி வைத்துள்ளன. இதற்கு முக்கிய காரணம், மலிவான கார்கள், உயரும் வாழ்க்கைத் தரம், மின்னணுவியல் மற்றும் கணினித் துறை முன்னேற்றங்கள்.
  • கடந்த 50 வருடங்கள், மனித சரித்திரத்தில், மிகவும் அமைதியான காலம். பெரும் உயிரிழப்பு நேரும் போர்கள் மிகவும் குறைவான ஒரு காலகட்டம்.
  • இந்த முன்னேற்றங்களுக்கு, பொறுப்பில்லாமல் நாம் கொடுத்த விலைதான் புவி சூடேற்றம்.

பிரச்சினையின் உயர்நிலைப் புரிதல்

  • ஏராளமான கரியமில/மீதேன் வாயு காற்று மண்டலத்தில் கலந்ததுதான் காரணம் என்று பல முறை சொல்லியாகிவிட்டது. இந்த ஏராளத்தை சற்று பிரிக்கலாமா?
    • 62 % – தொல்லெச்ச எரிபொருள் எரிப்பதால் உருவாகும் கரியமில வாயு
    • 16% – மாடுகள் மற்றும் இதர பிராணிகள் விவசாயத்தில் (தொழில்/பரம்பரை) உருவாக்கும் மீதேன் வாயு
    • 11% – காடுகளை அழிப்பதால் உருவாகும் கரியமில வாயு
    • 3% – சிமெண்ட்/எஃகு மற்றும் தொழில் ரசாயனங்களால் உருவாகும் கரியமில வாயு
    • 8% – மற்ற காரணிகளால் உருவாகும் கரியமில மற்றும் இதர வாயு
      • 2% – குளிர்சாதனங்களிலிருந்து கசியும் HFC வாயுக்கள்
    • ஆக மொத்தம், ஒவ்வொரு ஆண்டும், 7.5 பில்லியன் மனிதர்கள் உருவாக்கும் புவி சூடேற்ற வாயுவின் அளவு 52 கிகா டன். அதாவது, ஏறக்குறைய ஒவ்வொரு மனிதனுக்கும் சராசரி 7 டன்

தொல்லெச்ச எரிபொருள், விவசாயம் மற்றும் காடுகள், இந்த மூன்று விஷயத்தில் நாம் கவனம் செலுத்தினால், பிர்ச்சினையின் ஏறக்குறைய 90% தாக்குதலை சமாளிக்க முடியும் என்று சொல்ல நாம் ஒரு விஞ்ஞானியாக இருக்கத் தேவையில்லை. உடனே தொல்லெச்ச எரிபொருள் பக்கம் சாய்வதற்கு முன்னர், ஒன்றைப் புரிந்து கொள்ளுதல் அவசியம். எல்லா புவி சூடேற்ற வாயுக்களும் ஒன்றல்ல.

  • மீதேன் வாயு காற்று மண்டலத்தில் கலந்து ஒரு பத்தாண்டுகளில் மறைந்துவிடும். கரியமில வாயு, காற்றுமண்டலத்தில் கலந்தால் பல நூறு வருடம் அங்கேயே நம் குடியைக் கெடுக்கும்
  • இதையே இன்னொரு கோணத்தில், புவி சூடேற்றத்தில் மீதேன் வாயுவை நாம் பார்க்கலாம்:
    • 16% – அடுத்த 100 வருடங்களில்
    • 32% – அடுத்த 20 வருடங்களில்
  • ஆக, அடுத்த 20 ஆண்டுகளில், மீதேனின் தாக்கம் ஏராளமாக இருப்பதால், அதை சமாளிக்கும் முயற்சியை தள்ளி வைக்க முடியாது. கரியமில வாயுவை விட அதிக சூடேற்றும் தன்மை கொண்டது மீதேன் என்று பார்த்தோம்

பிர்ச்சினையை முழுவதும் மேல்வாரியாகப் புரிந்து கொள்ள இன்னொரு விஷயம் எஞ்சியுள்ளது. நம்முடைய பூமி, இத்தனை புவி சூடேற்ற வாயுவை எப்படி சமாளிக்கிறது? வெளியேற்றப்படும் புவி சூடேற்ற வாயுவில்:

  • 24% – நிலம் சார்ந்த உட்கொள்ளல் (land based GHG sinks)
  • 17% – கடல் சார்ந்த உட்கொள்ளல் (ocean based GHG sinks)
  • 59% – பூமிஉட்கொள்ள முடியாமல் தவித்துகாற்றில் கலக்கிறதுஇன்னும் சில நூறு ஆண்டுகள் தொடர்ந்து நம் பூமி சூடேறும்.

தீர்வுகளுக்குப் போகு முன், இங்கு இரு பெரிய விஷயங்களைச் சொல்லியுள்ளதை கவனித்திருப்பீர்கள்.

ஒன்று, புவிசூடேற்ற வாயுக்களின் வெளியேற்றல் (இதை மனிதர்கள் தங்களது நடவடிக்கைகளால் ஏராளமாக அதிகரித்து விட்டனர்).

இரண்டாவது, இயற்கை புவிசூடேற்ற வாயுக்களை உள்வாங்கல். அதாவது, உங்களது கட்டிடத்தின் மேலே உள்ள ஒரு தண்ணீர் தொட்டியில் நீரை மோட்டார் மூலம் நிரப்பிக் கொண்டே இருக்கிறோம் என்று வைத்துக் கொள்ளுங்கள். கட்டிடத்தில் உள்ள வீடுகள் தண்ணீரைப் பயன் படுத்திக் கொண்டே வருகின்றனர் என்று வைத்துக் கொள்வோம். இந்த இரு நிகழ்வும் சரியாக நடந்தால் பிரச்சினை இல்லை. ஆனால், அந்த தண்ணீர் இறைக்கும் மோட்டார் ஓடிக் கொண்டே இருக்கிறது என்று வைத்துக் கொள்வோம். ஆனால், வீட்டில் வசிப்பவர்கள், எல்லா குழாயையும் மூடிவிட்டு தூங்கப் போய்விட்டார்களானால், என்ன நடக்கும்?

இதுவே நம்முடைய புவி சூடேற்ற இன்றைய நிலை. இந்த உதாரணத்தில், அதிகபட்ச நீர், மண்ணுடன் கலந்து ஓடிவிடும்; ஆனால், புவி சூடேற்ற வாயுக்கள், இங்கேயே நம் காற்று மடலத்தில் நமக்கு அழிவின் பாதையில் எடுத்துச் செல்லுகின்றன.

இந்த இக்கட்டான சூழலில் மாட்டிக் கொண்டுவிட்ட நாம், என்ன செய்ய வேண்டும்? இரண்டு வழிகள் தான் உள்ளன:

  1. புவி சூடேற்ற காரணிகளில் பெரிய காரணிகளைக் குறைக்க வேண்டும்இது நம் உதாரணத்தில் தண்ணீர் இறைக்கும் மோட்டாரின் வால்வைக் கட்டுப்படுத்தி, குறைந்த அளவு தண்ணீரைத் தொட்டியில் சேர்ப்பதைப் போன்றது
  2. இயற்கையின் சூடேற்ற உள்கொள்ளலை அதிகரிக்க உதவுவது. இது நம் உதாரணத்தில் தண்ணீரைப் பயன்படுத்தும் வீடுகளில், தண்ணீரை அதிகமாகப் பயன்படுத்த முயவதைப் போன்றது. இதிலும் எல்லா பயன்களும் ஒரே அளவில் தண்ணீரைப் பயன்படுத்துவதில்லை. எந்தப் பயனில் அதிக தாக்கம் இருக்கிறதோ, அதையே முதலில் செய்ய வெண்டும்.

முதல், பெரிய காரணியான, தொல்லெச்ச எரிபொருள் என்ற விஷயத்தை மேலும் அலசி, அதில் உள்ள காரணி விதங்களைப் பார்ப்போம்.

  • 25% – நம் கண்ணுக்குத் தெரியாத மின்சார உற்பத்தி. இதில், கரி, இயற்கை வாயு மற்றும் டீசல் அடங்கும்
  • 24% – நம் கண்ணுக்குத் தெரியும் உணவு உற்பத்தி மற்றும் நிலப்பயன். இதில், கால்நடை, மற்றும் உரம் அடங்கும்
  • 21% – எஃகு, சிமெண்ட், ரசாயனத் தயாரிப்பு இதில் அடங்கும்
  • 14% – பைக், கார், லாரி, கப்பல், விமானம் இதில் அடங்கும்
  • 6% – கட்டிடங்கள், தனியார் மற்றும் வணிக கட்டிடங்கள் இதில் அடங்கும்
  • 10% – பெட்ரோலிய தயாரிப்பில் உருவாகும் இதர கழிவு எரிப்பு இதில் அடங்கும்
  • இவை எல்லாம் சேர்ந்து தொல்லெச்ச காரணியான 62% அடங்கும்
  • இந்த தொகுதி காரணிகளில், மின்சாரம், நிலப்பயன், தொழிற்சாலை, போக்குவரத்து மற்றும் கட்டிடங்கள் 90% காரணிகள்

அடுத்த பகுதியில், இந்த 62% தொல்லெச்ச எரிபொருள் சார்ந்த கரியமில வாயு வெளியேற்றலை எப்படியெல்லாம் பிரித்து, கரியமில வாயு உமிழைக் குறைக்கலாம் என்று புரிந்து கொள்ள முயற்சிப்போம். சில அரசாங்க முயற்சிகள், புகைக்கும் டீசல் லாரி போல இல்லாவிட்டாலும், புவி சூடேற்றத்தைக் குறைக்க எப்படி வழி செய்கிறது என்பது தெளிவாகும். “அரசாங்க பஸ்கள் டீசல் புகை மண்டலத்தில் இயங்குகையில், நான் மட்டும் ஏன் விலை அதிகமான எல்.ஈ.டி விளக்குகளை வாங்க வேண்டும்?” என்று நீங்கள் கோபப்படுவது நியாயமாக இருந்தாலும், எப்படி இந்தச் சிறுசிறு முயற்சிகள் உதவும் என்பது தெளிவாகும்.

புவிச் சூடேற்றம் – உலகைக் காப்பாற்றிக் கொள்ளும் நான்கு நடவடிக்கைகள் என்ன? – பகுதி 18

சென்ற பகுதியில், ஒன்பது எல்லைகளில், 6 எல்லைகளை கடந்த 60 ஆண்டுகளில் மீறிவிட்டோம் என்று பார்த்தோம். 2021 முதல் 2030 வரை நாம் எடுக்கும் ஒவ்வொரு முடிவும், நாம் இந்த எல்லை மீறல்களிலிருந்து மீள முடியுமா என்பதைத் தீர்மானிக்கும்.

நல்ல வேளையாக, நாம் செய்ய வேண்டியவை, அவ்வளவு கடினமான விஷயம் ஒன்றும் இல்லை. என்ன செய்தால், மீள முடியுமென்று பார்ப்போம்.

நடவடிக்கை 1: தொல்லெச்ச எரிபொருள் ஊர்த்திகளைப் பயன்படுத்தாதீர்கள். 

சொல்வது எளிது. ஆனால், நடைமுறைச் சிக்கல்கள் ஏராளம். பெட்ரோல் கார்/ஊர்த்தி தயாரிப்பிலும், பயனிலும் உலகின் உச்சியில் இருக்கும் இரு நாடுகள் சைனா மற்றும் இந்தியா. இரண்டிலும் உலகின் பாதி மக்கட்தொகை அடங்கும். வளர்ந்த நாடுகள், பொது நலம் கருதி, இந்த இரு நாடுகளையும் பெட்ரோல் போதையிலிருந்து காப்பாற்ற வேண்டும். இன்னும் பத்து வருடம் என்ற பட்சத்தில், இந்தியா இந்தப் பிரச்சினைக்கு ஒரு தீர்வு காணும் என்ற நம்பிக்கை போய்விட்டது. அடுத்த தெருவில் இருக்கும் நண்பனைப் பார்க்க பைக் எடுக்காதீர்கள். பள்ளிகளில், கல்லூரிகளில், பைக் மற்றும் கார் நிறுத்த பெரிய கட்டணம் வசூலிக்க வேண்டும். இதற்குப் பொதுப் போக்குவரத்தே மேல் என்று நினைக்கும் இளைஞர்கள் கூடினால், பெட்ரோல் போதை கொஞ்சம் குறையும். பெட்ரோல் போதை குறைந்தால், எந்த எல்லைகளை நல்விதமாக பாதிக்கும்?

  1. பனியுறைவு அளவு – காற்றில் கலக்கும் கரியமில வாயு குறையும். இதனால், துருவங்களுக்கு ஒரு சின்ன நிவாரணம் கிடைக்கும்
  2. கரியமில வாயுவின் அளவு – காற்றில் கலக்கும் கரியமில வாயுவின் அளவு சற்று குறையும்
  3. பல்லுயிர்சூழலின் அளவு – காற்று மாசு, நகர்புற பல்லுயிர்சூழலை பாதிக்கிறது. தொல்லெச்ச எரிபொருள் எரிப்பு குறைந்தால், சின்ன மாற்றம் அவசியம் நிகழும்
  4. கடலில் கலக்கும் கரியமில வாயு அளவு – நகரில் அடுத்த தெருவில் இருக்கும் நண்பனைப் பார்க்க நீங்கள் பைக் ஓட்டுவதனால் உருவாகும் கரியமில வாயுவில் மூன்றில் ஒரு பங்கு கடலில் சேருகிறது. கடலுக்கும் ஒரு சின்ன ஆறுதல், உங்கள் நடையால்!
  5. காற்றுத்துகள்களின் அளவு – இதைச் சொல்லவே வேண்டால் – நேரடியாக தொல்லெச்ச எரிபொருளை சார்ந்த இந்த அளவு குறைய நன்றாக நகரவாசிகள் காற்றை சுவாசிக்கலாம்.

அடுத்த முறை, உங்களது நண்பன், புத்தம் புதிய பெட்ரொல் கார் வாங்கினால், தொல்லெச்ச எரிபொருள் எந்திரத்தை வாங்கியதற்காகச் சாடுங்கள், பாராட்டாதீர்கள்.

நடவடிக்கை 2: மரங்களை அதிகமாக நடுங்கள்

 மறைந்த நகைச்சுவை நடிகர் விவேக், மரங்கள் நடும் விஷயத்தில் தீவிரமாகச் செயல்பட்டு வந்தார். இந்த நல்ல மாற்றம், தொடர்ந்து நிகழ வேண்டும். மரங்கள் நடுவதால், எப்படி நிலத்தில், மழை அதிகமாகிறது?

மரங்கள் வெளியேற்றுவது ஆஸிஜன் மற்றும் உள்வாங்கிக் கொள்வது கரியமில வாயு மற்றும் நீராவி. வெளியேறும் ஆக்ஸிஜன், சுற்றியுள்ள நீர்நிலைகளோடு உரசுகையில், சூரிய வெப்பத்துடன் நீராவி மீண்டும் உருவாகிறது. நீராவி சன்னமாக இருப்பதால், காற்று மண்டலத்தில் உயருகிறது, காற்று மண்டலத்தில் உயர உயர, நீராவி குளிர்கிறது, குளிரும் நீராவி மேகமாக மாறி, இன்னும் குளிர்ச்சி அதிகமாகையில், மழையாய்ப் பொழிகிறது.

மழை பொழியத் தேவை நீரும், ஆக்ஸிஜனும். இதில் ஒரு பங்கை மரங்கள் செய்கின்றன. ஒரு தர்க்கத்திற்காக, மனிதர்கள் எப்படியோ கட்டிடங்களைக் கட்டித்தள்ளி (இன்று கிட்டத் தட்ட இந்த நிலமைதான்), தாங்கள் வெளியேற்றும் கரியமில வாயுவை, பூமிக்குள் புதைத்து விடுகிறார்கள் என்று வைத்துக் கொள்வோம். சுற்றிலும் நீர்நிலைகள் இல்லாத பட்சத்தில், மழை இருக்காது. பாலைவனத்தில் மழை இல்லாததற்கும் இதுவே காரணம்.

கடலில், சுற்றிலும் நீர்தான். நீராவி தொடர்ந்து உற்பத்தியாகிக் கொண்டே இருக்கிறது. கடலில், நிலத்தை விட அதிக மழை பெய்வது இயற்கை. பெரும் புயல்கள், கடலில் உருவாக இதுவே காரணம். வெகு சில புயல்களைத் தவிர, புயல்களின் தொடக்கம் கடலில் தான்.

அட, பூமியின் 70% கடல் என்ற பட்சத்தில், ஏன் மழை குறைந்து வருகிறது? எங்கோ இடிக்கிறதா?

நாம் தொல்லெச்ச எரிபொருள்கள் எரிப்பதால், உருவாகும் கரியமில வாயுவில் மூன்றில் ஒரு பங்கு கடலில் கலக்கிறது. கடலில் கலக்கும் கரியமில வாயு, கடல் நீருடன் கலந்து கார்பானிக் அமிலமாகிறது. இந்த அமிலத் தன்மை வாய்ந்த நீர் முன்பை விட, நீராவியாவது குறைவு. அத்துடன், நிலப்பகுதியிலிருந்து வெகுதூரக் கடல் பகுதிகளை இது அவ்வளவு பாதிப்பதில்லை. இதனால், சூரிய வெப்பத்தால், கடல் நீரில், மேல்வாரியான பகுதிகள் (நிலத்தருகே உள்ள பகுதிகள்) அதிகமாக சூடேறுகிறது. மேல்மட்ட கடல் வெபபநிலை (50 அடி ஆழத்திற்குள்) மாற்றம், திடீர் புயல்களை உருவாக்குகிறது.

உலகில், பல்வேறு இயக்கங்கள், பல மில்லியன் மரங்களை நடும்/ உருவாக்கும் பணியில் ஈடுபட்டுள்ளன. நாம் கடந்த 60 ஆண்டுகளில் அழித்தது 3 டிரில்லியன் மரங்கள். இதை ஈடு செய்ய இன்னும் 60 ஆண்டுகள் போதாது. மரங்கள் வளர்ந்து, பயன் தருவதற்கு, 10 முதல் 20 ஆண்டுகள் வரைப் பிடிக்கும். ஆயினும், ஒவ்வொரு கண்டத்திலும் இந்த முயற்சி தொடர்ந்தால், நிச்சயம் பலன் கிடைக்கும். குறிப்பாக, இந்தியா போன்ற வளரும் நாடுகள், நகர்புற வீட்டு மனைகள் விற்கும் பொழுது, வீட்டு நிலத்தை வாங்குபவர், அவசியம் இத்தனை இடத்திற்கு இவ்வளவு மரம் என்று அவசியம் நகராட்சியிடமிருந்து வாங்க வேண்டும். கனடாவில், இது சட்டம். அத்துடன், நகராட்சி, எவ்வகை மரங்கள், மண்ணின் தன்மையைப் பொருத்து வளரும் என்பதை முடிவு செய்கிறது. வளர்ந்த மரங்களை சரியாக கத்தரித்தல் போன்ற சேவைகளையும் வாங்கிச் கொள்ளும் வரிப்பணத்தில் செய்கிறது.

இன்னொரு முக்கிய விஷயத்தை இங்கு சொல்ல வேண்டும். இது ஒரு கனேடிய முன்னோடி. மற்ற நாடுகள் அவசியம் பின்பற்ற வேண்டும்:

  1. டொரோண்டோ பெருநகரப் பகுதி, கனடாவின் மக்கட்தொகையில் ஆறில் ஒரு பங்கான பெரும்பகுதி
  1. இங்கு, கடந்த 40 வருடங்களாக பெரும் முன்னேற்றம், வீடு, சாலை மற்றும் தொழிற்சாலைகள் என்று ஏராளமான கட்டிடங்கள் உருவானது
  2. இந்த கட்டிடங்களை உருவாக்க, இந்தப் பகுதியைச் சுற்றி, கற்சுரங்கங்கள் அல்லது குவாரிகள் உருவாக்கப்பட்டன
  3. கற்சுரங்கங்கள், அதைச் சுற்றியுள்ள நீர்நிலைகள், மற்றும், பகுதியைச் சார்ந்த பல்லுயிர்ச்சூழலை பாதித்தது வியப்பல்ல
  4. கடந்த ஐந்து ஆண்டுகளாக, இந்த குவாரிகளின் தேவை குறைந்து விட்டது. மற்ற நாடுகளைப் போல, அப்படியே விட்டு விட்டு நகரும் நாடல்ல கனடா. குவால்ப் பல்கலைக்கழகம், இப்பகுதிகளின் பல்லுயிர்ச்சூழல் மற்றும் நீர்நிலைகளை ஆராய்ச்சி செய்து பட்டியலிட்டும் வந்துள்ளது. இந்த பல்கலைக்கழக சுற்றுச்சூழல் ஆராய்ச்சியாளர்கள் களத்தில் இறங்கினார்கள்
  5. அருகாமையில் இருந்த சிறு விலங்குகள், பறவைகள், மீன்கள் மற்றும் பூச்சிகளைச் சேகரித்தார்கள், காலியான குவாரிகளை, புதிய நீர்நிலைகளாக மாற்றினார்கள்
  6. சேகரித்த உயிரினங்களை, மெதுவாக இயற்கையில் புதிய நீர்நிலைகள் அருகே விட்டார்கள், இவை வாழ்கிறனவா அல்லது இறந்து விடுகின்றனவா என்பதை டாக் செய்து கண்காணித்தனர்
  7. புதிய நீர்நிலைகளை, படகு வசதிகளுடன், சுற்றுலா தளமாக்கினார்கள். உள்ளே செல்ல கட்டணம் வசூலித்து, சுற்றுச்சூழல் பராமரிப்பை ஒரு செலவாக ஆக்காமல், சற்று அரசாங்கத்திற்கு லாபமும் ஈட்டுத் தந்துள்ளார்கள்!

இதுபோன்ற சுற்றுச்சூழல் வெற்றி, இந்தியா போன்ற நாடுகள் பொறாமை பட்டு, தகுந்த மாற்றங்களுடன் பின்பற்றினால், பெரும் நன்மை சமூகத்திற்குக் கிடைக்கும்

மரங்களை அதிகமாக வளர்த்தல், எந்த எல்லைகளை நல்ல விதமாக பாதிக்கும்? கட்டுரையில் துவக்கத்தில் சொன்னதை மறுபடி சொல்கிறேன். 

  1. பனியுறைவு அளவு – மரங்கள் அதிகரித்தால், காற்றில் கலக்கும் கரியமில வாயு குறையும். கரியமில வாயு குறைந்தால், அதன் பலன்கள், பல்வேறு எல்லைகளில் பிரதிபலிக்கும். இதனால், துருவங்களுக்கு ஒரு சின்ன நிவாரணம் கிடைக்கும்
  2. கரியமில வாயுவின் அளவு – காற்றில் கலக்கும் கரியமில வாயு பெரிய அளவில் குறையும். கடந்த 60 ஆண்டுகளில், அழித்தது என்னவோ, மூன்று டிரில்லியன் மரங்கள். முன்னமே சொன்னது போல, நாம் உருவாக்கிய இந்த அழிவிலிருந்து ஓரளவு தப்பிக்க இதுவே ஒரு மிக முக்கிய வழி
  3. பல்லுயிர்சூழலின் அளவு – பல்லுயிர்சூழலை மீண்டும் இயற்கையில் மீட்பது மிகவும் இயலாத செயல். ஏனென்றால், அந்தச் சூழலை, இயற்கை, பல மில்லியன் ஆண்டுகளாய் உருவாக்கியது. கை சொடுக்கில் நடக்கும் விஷயமல்ல இது. மரங்கள் நடுவது, ஓரளவு பல்லுயிர்சூழலை புதிதாக உருவாக்கும் ஒரே வழி. பழைய சூழல் இதில் உருவாகும் என்று நிச்சயமாகச் சொல்ல முடியாது. ஆனால், இன்றை விட நல்ல சூழல் உருவாக வாய்ப்புள்ளது என்று மட்டும் சொல்ல முடியும்
  4. கடலில் கலக்கும் கரியமில வாயு அளவு – மரங்கள் அதிகமாக, இது நிச்சயம் குறையும். கடலில் கலக்கும் கரியமில வாயுவின் தாக்கம், புவி சூடேற்றத்தில் மிகவும் பெரிதானது. இதைக் குறைப்பது, எல்லா முயற்சிகளிலும் மேலானது. ஒரு முயற்சியால், இதைச் செய்வது இயலாத விஷயம். நாம் எடுக்கும் எல்லா முயற்சிகளும், கடலில் கலக்கும் கரியமில வாயுவைக் குறைத்தால், நாம் தப்பிப்போம்
  5. காடுகளின் அளவு – மரங்கள் அதிகமாவதால், காடுகள் உடனே பெருகாவிட்டாலும், சில ஆண்டுகளில், இந்த மாற்றத்தை நாம் பார்க்க முடியும். மீட்கப்பட்ட காடுகள், புதிய மற்றும் பழைய உயிரினங்கள் தழைக்க வழி செய்தால், குறைந்த நிலச்சரிவுகள், நிலத்தடி நீர் என்று பெரிய விஷயங்கள் நமக்கு திரும்பிக் கிடைக்க வாய்ப்புள்ளது. முன்னமே சொன்னது போல், பழைய உயிரினங்கள் யாவற்றையும் மீட்பது இயலாத செயல். ஆனாலும், மண்ணில் உள்ள நுண்ணுயிர்கள் மீண்டும் தழைக்க வாய்ப்புள்ளது.
  6. காற்றுத்துகள்களின் அளவு – மரங்கள் பெருகினால், அவை நாம் வெளியேற்றும் கரி மற்றும் பெட்ரோல்/டீசல் புகை மண்டலத்தைக் குறைக்கும். பல நூறு கோடி தொல்லெச்ச எரிபொருள் ஊர்த்திகளை, மின் ஊர்த்திகளாக மாற்றுவது அவ்வளவு எளிதல்ல

ஒரு விநோதமான திட்டத்தை இங்கு முன் வைக்கிறேன். எங்களுடைய பொழுதுபோக்கு சுதந்திரத்தைத் தடுக்க முடியாது என்று பொங்காதீர்கள். ஒவ்வொரு முறை, விவேக்கின் காமெடி விடியோவைப் யுடியூப்பில் பார்க்கும் இந்திய பிரஜை ஒவ்வொருவரும், ஒரு மரம் நட வேண்டும்! அல்லது மரம் நடும் அமைப்பிற்கு நன்கொடை வழங்க வேண்டும்.

நடவடிக்கை 3: இறைச்சியைக் குறைத்து உணவில் காய்கள்/பழங்களை அதிகரியுங்கள்

 உலகின் 7.5 பில்லியன் மனிதர்களுக்கு உணவு என்பது சாதாரண விஷயமல்ல. பழைய விவசாய முறைகள் மாறி, இன்று மேற்குலகில், விவசாயம் என்பது ஒரு மிகப் பெரிய தயாரிப்பு அமைப்பாக மற்றிவிட்டது. இது மெதுவாக இந்தியா போன்ற நாடுகளுக்கும், மாக், பர்கர் கிங் போன்ற அமைப்புகள் மூலம் ஏற்றுமதியும் செய்யப்பட்டு விட்டது. இந்த மேற்கத்திய உணவுத் தொழிலமைப்பு, (Industrial farming) மூன்று உயிர்களை வளர்த்துக் கொல்வதில் அடங்கியுள்ளது. அவை, கோழி, மாடு மற்றும் பன்றி.பல நூறு கோடிக் கணக்கில் இந்த உயிரினங்கள்  மனித உணவிற்காக, செயற்கை இனப்பெருக்கம் செய்யப்படுகின்றன. சரி, இதற்கும், புவி சூடேற்றத்திற்கும் என்ன சம்பந்தம் என்று தோன்றலாம். பெரிதாக சம்பந்தம் இருக்கிறது.

  • பல நூறு கோடி உயிரினங்களுக்கு உணவு உற்பத்தி செய்ய/வளர்க்க, இடம் தேவைப்படுகிறது. துபாயில் இந்திய துணைக்கண்டத்தின் வேலையாட்களை தங்க வைக்கும் இருப்பிடத்தை விட இன்னும் மோசமானவை இந்த பிராணிக் கூண்டு/கூடுகள். இந்த இடம் எங்கிருந்து வருகிறது.

காடுகளை அழித்துத்தான்! 

  • இந்த பல நூறு கோடி உயிரினங்களுக்கு, அவை மனித உணவாகும் வரை, உணவளிக்க வேண்டுமல்லவா? இதற்காகவே, பிரத்யேக வயல்கள் உள்ளன. பல்லாயிரம் ஹெக்டேர்கள் வட மற்றும் தென் அமெரிக்காவில் சோளம், மற்றும் சோயா இதற்காகவே வளர்க்கப்படுகிறது. இந்த விவசாய நிலம் எங்கிருந்து? சொன்னால் போரடிக்கும் – காடுகளை அழித்துத் தான்!
  • இந்தத் தொழில் விவசாயத்திற்குத் தேவைப்படும் இன்னொரு மிக முக்கிய விஷயம், தண்ணீர். பூமியின் இயற்கை வளமான தண்ணீர் எல்லோருக்கும் பொது. ஆனால், உணவிற்காக வளர்க்கப்படும் பல நூறு கோடி உயிரினங்கள், இந்த உலகில் குடிநீருக்காக நம்முடன் களத்தில் போட்டி போடுகின்றன. மனித உணவிற்காக நேரடியாக பயன்படுத்தப்படும் (அரிசி, கோதுமை போன்றவை) பயிர்களுடன் இவ்வகை விவசாயமும் போட்டி போடுகிறது. 
  • தொழில் விவசாயம், ஏராளமான மின்சக்தி மற்றும் தொல்லெச்ச எரிபொருளையும் பயன்படுத்துகிறது
  • சுருக்கமாகச் சொல்லப் போனால், எல்லா புவி சூடேற்ற முறைகளையும் ஏகத்துக்கும் பயன்படுத்தும் ஒரு தொழில், இந்தத் தொழில் விவசாயம்

இறைச்சியைத் துறப்பது, உலகின் பல்வேறு நாடுகளில் அவ்வளவு எளிதல்ல. முதல் படியாக, சில மேற்கத்திய அமைப்புகள், இறைச்சியின் அதே சுவையோடு, செடி மூலத் தயாரிப்புகளை, முன் வைக்கத் தொடங்கி விட்டன. உதாரணம், plant based burger. இத்துடன், பழங்கள், காய்கறிகள் மற்றும் கொட்டைகள், உணவில் அதிகம் பயன்படுத்துவது புதிய பழக்கம் தான். ஆனால், நம்முடைய உயிர் பிழைத்தல் என்ற பட்சத்தில், தொழில் விவசாயத்தின் மீதான சார்புநிலையை, நாம் குறைக்க வேண்டும். வேறு வழியில்லை. 

இறைச்சியை உணவில் குறைந்தால், எந்த எல்லைகளை நல்விதமாக பாதிக்கும்? முன்பு சொன்ன அதே விளைவுகளில் பல இங்கும் பொருந்தும். 

  1. பனியுறைவு அளவு – காற்றில் கலக்கும் கரியமில வாயு கணிசமான அளவு நேர்முகம் மற்றும் மறைமுகமாகவும் குறையும். தொழில் விவசாயம், குறைவாக, தொல்லெச்ச எரிபொருள் மற்றும் நிலத்தைப் பயன்படுத்தும். இதனால், துருவங்களுக்கு ஒரு சின்ன நிவாரணம் கிடைக்கும்
  2. கரியமில வாயுவின் அளவு – காற்றில் கலக்கும் கரியமில வாயு குறைய நிறைய வாய்ப்புள்ளது. குறைந்த பிராணிகள் போக்குவரத்து, குறைந்த குளிர்சாதன பயன்பாடு இவை எல்லாம் நிச்சயம் உதவும்
  3. பல்லுயிர்சூழலின் அளவு – காடுகளை அழித்தே இந்தத் தொழில் விவசாயம் நடந்து வந்துள்ளது. தொலைந்த காடுகளை திரும்பப் பெருவது கடினம். ஆனால், கனடாவில் நடந்த கற்சுறங்க மீட்புப் பணி போல, பல கோடி ஹெக்டேர்களை இயற்கையிடம் திருப்பி விட வாய்ப்புள்ளது
  4. குடிநீர் அளவு – இன்று, இது ஒரு மிகப் பெரிய பிரச்சினை அல்ல. ஆனால், நாளையின் பிரச்சினை. தொழில் விவசாயம் பயன்படுத்தும் ஏராளமான குடிநீர், மற்ற மனித நடவடிக்கைகளுக்கு, நிச்சயம் கிடைக்கும். நதியின் ஆரம்ப நிலையில் உள்ள ஒரு தொழில் விவசாயம் மூடப்பட்டால், நதியின் கடைசி நிலையில் உள்ள மனிதப் பயிர் விவசாயி தண்ணீருக்காக செலவழிக்கும் பொருள் மற்றும் மன உளைச்சல் குறையும். மேலும், நீர் கிடைக்கிற பட்சத்தில், விவசாயிகளுக்கு, பல்வேறு பயிர் வளர்ப்பு வாய்ப்புகள் மீண்டும் கிடைக்கும்

நடவடிக்கை 4: கழிவைக் குறைத்து, மறுபயன்பாட்டை அதிகரியுங்கள்

 கழிவு பற்றி நாம் உலகம் முழுவதும் அதிகம் பேசி, அதைப் பற்றிய விழிப்புணர்வு அதிகரித்திருப்பது உண்மை. ஆனாலும், இன்னொரு முக்கிய கழிவு பற்றிய புரிதல், நம்மிடையே, ஒரு பொருளைத் தயாரிக்கும் பொழுது எழுவதே இல்லை. இன்றைய பொருள் என்பது நாளைய கழிவு. ஆயினும், கழிவைப் பற்றி சிந்திக்காமலே, இன்றும், நாம் பொருட்களை உருவாக்குகிறோம். இசை சிடி தயாருக்கும் பொழுது, அந்த பொருளைப் பற்றிய கழிவுச் சிந்தனை நம்மிடையே இன்னும் இல்லை. நேற்றைய சிடிக்களை பூமிக்குள் புதைத்து விட்டோம். இன்று தயாரிக்கும் சிடிக்கள் எங்கு போகும்? இன்றைய செல்பேசிகள் எங்கு போகும்? இந்தச் சிந்தனை அவசியம் எழ வேண்டும். ஒரு தயாரிப்பை வடிவமைக்கும் பொழுது, அதன் வாழ்நாள் முடிந்தவுடன், எப்படி மறுபயன்பாட்டிற்கு உதவும் என்பதையும் தயாரிப்பாளர்கள், வடிவமைப்பாளர்கள் அவசியம் சிந்திக்க வேண்டும். கடந்த 300 வருடங்களாக நாம் இதைச் செய்யத் தவறி விட்டோம். இன்று, ப்ளாஸ்டிக், அனல் மின் நிலையம், மின்னணுவியல் சாதனங்கள், அணுமின் நிலையம் என்று எல்லாவற்றிலும், இந்தப் பிரச்சினை, நம்மை கதிகலங்க வைக்கிறது. அரசாங்கங்கள், தொழில்நுட்ப அமைப்புகள் எங்கும் இந்தச் சிந்தனை வளர வேண்டும். இதை வட்டத் தயாரிப்பு (circular manufacturing) என்று சொல்கிறார்கள். பொருட்களை வாங்கும் நுகர்வோரும், இதை மனதில் கொள்ள வேண்டும். தயாரிப்பாளர்களை, பொருளின் பயன் முடிந்த பிறகு, அந்தத் தயாரிப்பை எப்படிப் பயன்படுத்தலாம் என்று விளக்கச் சொல்ல வேண்டும். தயாரிப்பாளர்கள், தங்களது தயாரிப்பின் மறுபயன்பாடு பற்றிய விடியோக்களை தங்களது இணையதளத்தில் பதிவு செய்ய வேண்டும். இன்னும் சில ஆண்டுகளில் இது நிகழும் என்று நம்புவோம். 

அதுவரை, ஒவ்வொரு நுகர்வோரின் மறுபயன்பாட்டுக் கடமைகள் என்று நிறைய உள்ளது.

  1. ஒற்றை பயன்பாட்டு ப்ளாஸ்டிக்கைப் பயன்படுத்த வேண்டாம்
  2. மளிகை மற்றும் காய்கறி வாங்கத் துணிப்பையைப் பயன்படுத்துங்கள்
  3. பழைய பல் தேய்க்கும் ப்ரஷ் போன்றவற்றை வீட்டில் பொருட்களைத் துடைக்கப் பயன்படுத்துங்கள்
  4. வட அமெரிக்காவில் வசிப்பவர்கள், அநாவசியமாக சமயலறை பேப்பர் டவல்களை ஒரு முறை பயன்படுத்திவிட்டு தூக்கி எறியாதீர்கள். பல சமயம் மறுபயன்பாட்டிற்கு உதவும்
  5. உணவை சரியாகத் திட்டமிட்டு, கழிவைக் குறையுங்கள். ஒவ்வொரு முறையும் புதிதாக சமைத்து உண்ண வேண்டும் என்பதெல்லாம் பழைய காலம். நேரம் இல்லாவிட்டால், சமைத்த உணவை குளிர்சாதனத்தில் வைத்து, மீண்டும் சுட வைத்து, உண்ணுங்கள்
  6. அடுத்த தெருவில் இருக்கும் கடை மற்றும் நண்பரைப் பார்க்க ஒருபோதும், கார் அல்லது பைக்கைப் பயன்படுத்தாதீர்கள்

இப்படி அடுக்கிக் கொண்டே போகலாம். 

மறுபயன்பாட்டை அதிகரித்துக், கழிவைக் குறைந்தால், எந்த எல்லைகளை நல்விதமாக பாதிக்கும்?

  1. பனியுறைவு. அளவு – நாம் தூக்கி எறியும் ஒவ்வொரு பொருளையும் அகற்ற, அவை எரிக்கப்படுகின்றன அல்லது புதைக்கப்படுகின்றன. மறுபயன்பாடு அதிகரித்தால், எரிக்கப்படும் கழிவு குறையும். இதனால் சற்று காற்றில் கலக்கும் கரியமில வாயு குறையும். கரியமில வாயு குறைந்தால், அதன் பலன்கள், பல்வேறு எல்லைகளில் பிரதிபலிக்கும். இதனால், துருவங்களுக்கு ஒரு சின்ன நிவாரணம் கிடைக்கும்
  2. கரியமில வாயுவின் அளவு – காற்றில் கலக்கும் கரியமில வாயு சிறிய அளவில் மறுபயன்பாட்டினால் குறையும். கழிவு எரித்தல் மற்றும் புதைத்தல், என்பது ஒரு புகை விடும் லாரியைப் போல, சாதாரணர்களுக்குத் தெரிவதில்லை 
  3. கடலில் கலக்கும் கரியமில வாயு அளவு – கடலில் கலக்கும் கரியமில வாயு மனித நடவடிக்கைகளால் உருவானது. சொன்னால் நம்ப மாட்டீர்கள். Incineration என்பது மிகவும் ஏராளமான சக்தியைப் பயன்படுத்தும் ஒரு முறை. கழிவுகளை எரிப்பது குறைந்தால், நாம் அநாவசியமாகப் பயன்படுத்தும் மின்சக்தி, மற்றும், அந்த சக்தியை உற்பத்தி செய்யப் பயன்படுத்தும் தொல்லெச்ச எரிபொருளின் தேவையும் குறையும்

இவை யாவும் பயனுள்ள முறைகள் என்பதில் சந்தேகமில்லை. ஆனால், ஒன்று நிச்சயமாக ஒப்புக் கொள்ள வேண்டும். அமெரிக்காவில் (நம் மக்கள் மனதில், விஞ்ஞானம் என்றால் அமெரிக்கா என்று பதிந்து போன ஒரு தப்பான பிம்பம்) யாரோ ஒரு விஞ்ஞானி, உலகம் சுற்றும் வாலிபன் எம்.ஜி.ஆர் போல, மாயமாக ஒரு கண்டுபிடிப்பு மூலம், புவி சூடேற்றத்தை ஒரே நொடியில் திர்த்து விடுவார் என்று நம்புவது அபத்தம். எந்த ஒரு முறையாலும் இந்தப் பிர்ச்சினை தீரப் போவதில்லை. அடுத்த பகுதிகளில், இந்த பிர்ச்சினையின் காரணிகளின் விகிதம், அதில் எதை நாம் தீர்க்க முடியும், எது உடனே பலன் கொடுக்கும், எது சில ஆண்டுகளுக்குப் பின் பயன் தரும் என்பதைப் பற்றி விரிவாகப் பார்ப்போம். 

புவிச் சூடேற்றம் – நம் ஸ்திரத்தன்மைக்கான 9 எல்லைகள் என்ன? – பகுதி 17

பொதுவெளியில், இன்று விஞ்ஞானிகள், அரசாங்கங்கள் மற்றும் பொதுமக்களை பல விதத்திலும் பருவநிலை மாற்றங்களுக்காகச் சாடவே செய்கிறார்கள்.

  • புவி சூடேற்றத்தைக் கட்டுப்படுத்தும் பல வாய்ப்புகளைத் தவற விட்டு விட்டோம்
  • கடந்த 50 ஆண்டுகளாக விஞ்ஞானம் சொல்லுவதை உலகம் கேட்க மறுத்து விட்டது
  • பொறுப்பின்றி, மரங்களைச் சாய்க்கிறோம், காடுகளை அழிக்கிறோம்
  • தொல்லெச்ச எரிபொருள்களுக்கு மாற்று எரிபொருள் ஒன்றை கண்டறியாமல், உருவாக்கியதைச் சந்தைக்குக் கொண்டுவராமல் காலத்தை வீணாக்கி விட்டோம்
  • கரியை எரித்து மின்சாரம் உருவாக்குவது மிகவும் பொறுப்பற்ற செயல்

இது பெற்றோர், தங்களுடைய இளவயது குழந்தைகளுக்குச் சொல்லும் அறிவுரை போல, உலகத்திற்கு பட்டிருப்பது கடந்த 70 ஆண்டுகளாகத் தெளிவாகத் தெரிகிறது. உலகின் சாதாரணர்கள், கண்கூடாகப் பார்ப்பது சில விஷயங்களைத் தான்:

  • முன்பை விட அதிகமாக, வெள்ளங்கள் நம் நகரங்களைத் தாக்குகின்றன
  • கலிஃபோர்னியா, ஓரெகன், வாஷிங்டன், பிரிடிஷ் கொலம்பியா (வட அமெரிக்கா) மற்றும் ஆஸ்த்ரேலியா போன்ற இடங்களில், வருடா வருடம், காடுகள் தீப்பற்றி எரிந்து, நகரங்களைப் புகை மண்டலமாக்குகின்றன.
  • வளரும் நாடுகளான இந்தியா போன்ற நாடுகள், ஏராளமாக (உலகின் மூன்றாவது பெரிய கார் தேசம்) பெட்ரோல் ஊர்திகளைத் தயாரித்து, காற்றை ஏகத்துக்கும் மாசாக்கி விட்டன. சுத்தமான காற்று என்பது இந்திய நகரம் எதிலும் இன்று இல்லை
  • உலகின் பல்வேறு வடதுருவ தென் நகரங்களில், திடீரென்று பனிமழை பொழியத் தொடங்கிவிட்டன. உதாரணத்திற்கு, 2021 –ல், டால்லஸ் என்ற அமெரிக்காவின் டெக்ஸாஸ் மாநிலத்துப் பாலைவன நகரின் விமான நிலையம் பனிமழை காரணத்தால் மூடப்பட்டது

இப்படித் தாறுமாறான பருவநிலைக்குக் காரணம், தனது முந்தைய சந்ததியினர் என்பது இன்றைய இளைஞர்/ஞி களின் வாதம். கண்கூடாகப் பார்க்கும் பருவநிலை சீர்கேட்டைச் சரி செய்ய ஏதாவது செய்ய வேண்டும் என்று துடிக்கிறார்கள். ஆனால், பிரச்சினை எளிதாகப் பிடிபடுவதில்லை அத்துடன்எங்கு தொடங்குவது என்றும் தெரிவதில்லை.

நல்ல வேளையாக, சில கிழ விஞ்ஞானிகள் இந்த விஷயத்திலும் விஞ்ஞான ரீதியில் உதவ முன் வந்துள்ளார்கள். குறிப்பாக, யோகான் ராக்ஸ்ட்ரோம் (Johan Rockstrom) என்ற ஸ்வீடன் நாட்டைச் சேர்ந்த விஞ்ஞானி, மற்ற பல விஞ்ஞானிகளுடன் கடந்த 40 வருடங்களாக ஆராய்ச்சி செய்து, தங்களது முடிவுகளை வெளியிட்டுள்ளனர். பருவநிலை மாற்றத்திற்காக, ஏதாவது செய்ய வேண்டும் என்று துடிப்பவர்கள், இந்தப் பகுதியை அவசியம் படிக்க வேண்டும்.

  1. பூமியின் வயது 4.6 பில்லியன் ஆண்டுகள் என்று நாம் அறிவோம்.
  2. இந்த வரலாற்றில், கடந்த 10,000 ஆண்டுகளாக, பூமியின் சராசரி வெப்பநிலை 1 டிகிரியைத் (செல்சியஸ்) தாண்டவில்லை
  3. இந்த 10,000 ஆண்டுகளில், உலகில் உயிரினங்கள் (நாம் உட்பட) செழித்து வந்துள்ளன
  4. மிக ஸ்திரமான இந்த காலப்பகுதியை ஹோலோஸீன் (Holocene) என்று விஞ்ஞானிகள் குறிப்பிடுகிறார்கள்
  5. மனித நாகரீகம், விஞ்ஞானம், கலை மற்றும் பல வளர்ச்சிகளுக்கான முதுகெலும்பு இந்த ஸ்திரத்தன்மை
  6. கடந்த 50 ஆண்டுகளாக, நாம் ஹோலோஸீன் காலப்பகுதியைத் தாண்டி, ஆந்த்ரோபாஸீன் (Anthropocene) என்ற நிலைக்கு வந்து விட்டோம். அதாவது 1 டிகிரியை விட உலகின் சராசரி வெப்பம் அதிகரிக்கத் தொடங்கி 150 வருடங்கள் ஆகிவிட்டது. ஆனால், அளவை மீறிய காலம், கடந்த 50 ஆண்டுகள்
  7. நமது வளர்ச்சியின் அடிப்படைக் காரணம், சராசரி வெப்பநிலையின் ஸ்திரத்தன்மை. இந்த ஸ்திரத்தன்மையை எது முடிவு செய்கிறது?
  8. நம் பூமியின் பருவநிலை என்பது மிகவும் சிக்கலான விஷயம். ராக்ஸ்ட்ரோம் மற்றும் சக விஞ்ஞானிகள், இந்த ஸ்திரத்தன்மைக்கு 9 எல்லைகள் காரணம் என்கிறார்கள். இந்த 9 எல்லைகளை நாம் புரிந்து கொள்ளுதல், எந்த ஒரு பருவநிலை மாற்றக் கட்டுப்பாடு முடிவிற்கும் அவசியம்

வெள்ளை தாடியுடன், சோதனைச் சாலையில், பல கலர் திரவங்களைக் கலந்த வண்ணம், ”இதோ பூமியை பழைய நிலைக்குக் கொண்டுவர மருந்து!” என்று சொல்லும் டுபாகூர் வாட்ஸாப் விஞ்ஞானிகள் அல்ல இவர்கள்!

பூமியின் ஸ்திரத்தன்மையை கட்டுப்படுத்தும் 9 எல்லைகள் என்னவென்று விஞ்ஞானம் பட்டியலிட்டாலும், சில எல்லைகள் அளந்து முற்றிலும் கணக்கிட முடியாதது. ஆனால், முற்றிலும் அளக்க முடியாவிட்டாலும், எல்லையைக் கடந்து விட்டோம் என்பதைத் தெளிவாக சொல்ல முடியும்.

முதல் எல்லை – பூமியின் பனியுறைவு அளவு ஸ்திரமான 10,000 ஆண்டுகளும், பூமியின் வட மற்றும் தென் துருவங்களில் பனியுறைவு இருந்தது. இந்தப் பனியுறைவு பூமியின் ஸ்திரத்தன்மைக்கு மிகவும் அவசியம். நொடி ஒன்றிற்கு, 10,000 கியூபிக் அடி பனியுறைவை நாம் இன்று இழந்து வருகிறோம். துல்லியமாக எல்லையை இந்த விஷயத்தில் சொல்ல முடியாவிட்டாலும், எல்லையை மீறி, அபாய பிரதேசத்தில் நாம் இன்று இருக்கிறோம்.

இரண்டாவது எல்லை – கரியமில வாயுவின் அளவு. இந்த விஷயத்தில், நிறைய ஆராய்ச்சிகள் நடந்துள்ளதால், அபாய அளவு 350 ppm எனறு தெரியும். ஆனால், இன்றைய அளவு, 350 –ஐக் கடந்து 415 ppm. இந்த விஞ்ஞானிகளின் பார்வையில், 450 ppm -ஐ தாண்டிவிட்டால், முற்றிலும் அழிவைத் தவிர வேறு வழியில்லை.

மூன்றாவது எல்லை – காடுகளின் அளவு. நாளுக்கு நாள் கூடி வரும் மனித மற்றும் கால்நடைகளுக்கு உணவு என்ற தேவைக்காக, கடந்த 10,000 ஆண்டுகளாக, காடுகளை மனிதர்கள் அழித்து வந்துள்ளார்கள். காடுகளை அழிப்பதால், பல்வேறு உபாதைகள் கூடவே வருகிறது. காட்டு விலங்குகள், பூச்சிகள் மற்றும் பறவைகள் முழுதும் அழிக்கப்படுகின்றன. நிலச்சரிவு மற்றும், நிலத்தடி நீர் போன்ற விஷயங்கள் பெரிதும் பாதிக்கப்படுகிறது. இந்த விஷயத்தில், எல்லை, உலகின் 25% காடுகள் அழிக்கப்படுதல். ஆனால், இன்று, நாம் 40% சதவீத காடுகளை அழித்து, எல்லையை மீறி, அபாய வட்டத்துக்குள் வந்துவிட்டோம். உலகின் 68% வனவிலங்குகள், கடந்த 60 ஆண்டுகளில் மட்டும் அழிக்கப்பட்டுள்ளது.

நான்காவது எல்லைபல்லுயிர்சூழலின் அளவு (biodiversity.) முந்தைய பகுதியில் பார்த்தை மீண்டும் இங்கே சொல்ல வேண்டியுள்ளது. உலகின் பறவைகளில், 70%, மனிதன் உணவிற்காக வளர்க்கும் கோழிகள். உலகின் பாலூட்டிகளில், 70%, மனிதன் உணவிற்காக வளர்க்கும் ஆடுகள் மற்றும் மாடுகள். நாம் நினைப்பதை விட அதிகமாக, நமது நல்வாழ்விற்கு, காட்டு விலங்குகள் தேவை. பெரிய விலங்குகளை மட்டுமே நாம் நினைக்கிறோம். காடுகள் அழிக்கப்படும் பொழுது, அங்குள்ள உணவுச் சங்கிலி துண்டிக்கப்படுகிறது. இதன் விளைவுகள், நாம் சற்றும் எதிர்பார்க்காதவைத. உணவிற்காக அழிக்கப்படும் ஒவ்வொரு ஏக்கர் காடும், நம்மை அழிவிற்கு அருகாமையில் கொண்டு செல்லுகிறது. மிகவும் சிக்கலான அளவு, பல்லுயிர்சூழல் அழிக்கப்படுகிறது. நிச்சயமாக நாம் அபாய எல்லையைக் கடந்து பல ஆண்டுகள் ஆகிவிட்டன என்பது மட்டும் நிச்சயம்.

ஐந்தாவது எல்லைகுடிநீர் அளவு. நாம் ஒவ்வொருவரும், நாளொன்றைக்கு சராசரி, 3,000 லிட்டர் நீரைப் பயன்படுத்துகிறோம். இந்தக் கணக்கில், பெரும் பங்கு, நம் உணவு மற்றும் பயன்படுத்தும் பொருட்களின் தயாரிப்பில் செலவாகும் குடிநீர். உலகின் பல்வேறு பகுதிகளில், குடிநீர் பஞ்சம் தலைவிரித்தாடினாலும், சராசரி குடிநீர் அள்வின் எல்லையை இன்னும் பூமியில் நாம் தாண்டவில்லை. அப்பாடா, ஒரு விஷயத்திலாவது நாம் அபாய எல்லைக்கு வெளியே நாம் போகவில்லை என்று பெருமிதப்படத் தேவையில்லை. இதன் முக்கிய காரணம், முதல் காரணமான, பூமியின் பனியுறைவு எல்லையை நாம் மீறியது என்று கூட ஒரு வாதம் உள்ளது!

ஆறாவது எல்லைஊட்டச்சத்து அளவு. ஊட்டச்சத்து என்றவுடன், உணவு சார்ந்த விஷயம் என்று உங்களால், ஓரளவுக்கு ஊகிக்க முடிகிறது அல்லவா? இங்கு சொல்லப்படும் ஊட்டச்சத்து, நாம் பயிர்களுக்கு கொடுக்கும் ஊட்டச்சத்தைக் குறிக்கும். பசுமைப் புரட்சி காலத்திலிருந்து (1970 முதல்) நாம், எல்லைக்கு அதிகமாக, ஃபாஸ்பரஸ் மற்றும் நைட்ரஜன் கலவைகளைப் பயன்படுத்தி வந்துள்ளோம். இதனால், தேவைக்கு அதிகமான உரங்கள், நமது நீர்நிலைகளில் கலந்து, சுற்றியுள்ள நிலத்தை பயனற்றதாக்கி விடுகிறது. இந்த எல்லையை நாம் கடந்து பல ஆண்டுகள் ஆகிவிட்டன.

ஏழாவது எல்லைகடலில் கலக்கும் கரியமில வாயு அளவு. மனிதர்களால் உருவாக்கப்படும் கரியமில வாயுவில் மூன்றில் ஒரு பங்கு கடலில் சேர்கிறது. கடல் நீருடன் சேர்ந்து, இந்த வாயு கார்பானிக் அமிலமாக மாறுகிறது. நம் கடல்கள், கடந்த 100 ஆண்டுகளில், 26% அதிக அமிலத்தன்மை கொண்டுள்ளதாக மாறியுள்ளது. கார்பானிக் அமிலம், கிளிஞ்சல் மற்றும் நத்தை மற்றும் சிப்பிக்களை கொன்று விடும் தன்மை கொண்டது. ஆஸ்த்ரேலியாவின் அருகே உள்ள பெரும் பவளத்திட்டு (Great barrier reef) இன்று கடல்நீர் அரிப்பால், அழிவடைய இதுவே காரணம். ஆயினும், கடலில் கலக்கும் கரியமில எல்லையை நாம் கடந்து விட்டாலும், அபாய நிலையில் இல்லை என்பதே விஞ்ஞானிகளின் வாதம்

எட்டாவது எல்லைகாற்றுத்துகள்களின் அளவு. காற்றுத்துகள், நகரங்களில், தொல்லெச்ச எரிபொருளைப் பயன்படுத்தும் ஊர்த்திகள் மற்றும் அனல் மின் நிலையங்களிலிருந்து காற்றில் கலக்கின்றது. வருடத்திற்கு 7.5 மில்லியன் மனிதர்கள் காற்று மாசினால் இறக்கிறார்கள். இந்த உலகில் வாழும் ஒவ்வொரு மனிதனின் சராசரி ஆயுளில் 3 வருடம் இதனால் குறைகிறது. இந்த எல்லையையும் நாம் கடந்து, அபாய கட்டத்தில் இருக்கிறோம்.

ஒன்பதாவது எல்லைஓஸோன் அளவு. இது முழுவதும் எல்லைக்குள் உள்ளது. இந்த ஒன்பது எல்லைகளில், ஒழுங்காக மனிதர்கள் இயங்கிய ஒரே எல்லை இது. சுற்றுச்சூழல் ஆர்வலர்களின் ஏக்கமே, ஏன் மனிதர்களால் இன்னொரு ஓஸோன் கதையை உருவாக்க முடியவில்லை என்பதுதான்.

ஆக, உலகின் எல்லை மீறல் ரிப்போர்ட் சுருக்கமாக இங்கே:

ஆக, ஒன்பது எல்லைகளில், 6 எல்லைகளை கடந்த 60 ஆண்டுகளில் மீறிவிட்டோம். இப்படியே போனால், இந்த மீறல்களிலிருந்து மீளவே முடியாது. 2021 முதல் 2030 வரை நாம் எடுக்கும் ஒவ்வொரு முடிவும், நாம் இந்த எல்லை மீறல்களிலிருந்து மீள முடியுமா என்பதைத் தீர்மானிக்கும். நாம் அடுத்த பத்தாண்டுகளில் என்னவெல்லாம் செய்தால், இந்த அத்து மீறல்களிலிருந்து நிவாரணம் பெறலாம் என்பதை அடுத்த பகுதியில் பார்ப்போம்.

புவிச் சூடேற்றம் – பருவநிலை ஆர்வலர் ஸர். டேவிட் ஆட்டன்பரோ – பகுதி 16

சென்ற பகுதியில், இளைஞர்கள் இயக்கங்களைப் பற்றிச் சொல்லிவிட்டு, கடைசியில் கனேடிய கிழவர் டேவிட் சுஸூக்கி பற்றி எழுதியிருந்தேன். சுஸூக்கியைவிட, இன்னும் வயதான இன்னொரு பருவநிலை மாற்ற ஆர்வக் கிழவரைப் பற்றி இந்த பகுதியில் பார்க்கப் போகிறோம். இவர், பிரபல பி.பி.சி. ஆவணப் பட இயக்குனர் டேவிட் ஆட்டன்பரோ. சுஸுக்கி, இவரைப் போல, சி.பி.சி. யின் ஆவணப் பட இயக்குனர்.

அட, சினிமா இயக்குனருக்கும் புவி சூடேற்றத்திற்கும் என்ன சம்பந்தம்? அதுவும், 93 வயதான பழம் பெரும் இயக்குனர் என்ன செய்து விடப் போகிறார்? இந்தக் கேள்விகள் உங்கள் மனதில் தோன்றுவதற்கு முன்பு, ஒன்றை நாம் புரிந்து கொள்ள வேண்டும். டேவிட் சுஸூக்கியாகட்டும், ஆட்டன்பரோ ஆகட்டும், நம்மூர் மசாலா பட இயக்குனர்கள் அல்ல. ஆட்டன்பரோ, தன்னுடைய இளைமைப் பருவத்திலிருந்து, இயற்கையை பதிவு செய்யும் ஆவணப் பட இயக்குனர். இயற்கையை நேசிக்கும் இவர், சமீபத்தில், நெட்ஃப்ளிக்ஸில், தன்னுடைய வாழ்க்கையைப் பற்றிச் சொல்வதுடன் , அதை ஒரு வாக்குமூலமாகவும் வழங்கியுள்ளார். இயற்கை அழிவதால், இவருக்கு அதிக நஷ்டமில்லை. இன்னும் 10 முதல் 15 ஆண்டுகள் வாழ்க்கை மிஞ்சியுள்ள இவர், பல சர்வதேச பருவநிலை கருத்தரங்குகளில், துடியாக, தன்னுடைய அனுபவத்தைப் பகிர்ந்து கொள்கிறார்; இந்தப் பிரச்சினைக்கான தீர்வுகளையும் முன் வைக்கிறார். ஒரு 70 ஆண்டுகளாக இந்தப் பிரச்சினையை மிகவும் நெருக்கமாகப் பார்த்த லாப நோக்கற்ற ஒருவரால் மட்டுமே, தீர்வுகளை முன் வைக்க முடியும்.

முதலில், பிரச்சினையை, தெளிவான புள்ளி விவரங்களுடன் முன் வைக்கிறார். பிறகு, அதற்கான தீர்வுகளையும் சொல்கிறார். சும்மா, நம்பிக்கையூட்டும் பூச்சுற்றல் அல்ல இது. இவர் சொல்லும் புள்ளி விவரங்கள் மற்றும் தீர்வுகள், இரண்டையும் இந்தப் பகுதியில் பார்ப்போம். என் அனுபவத்தில், முதன்முறையாக, ஒரு ஆவணப்படத்தைப் பல முறை பார்த்ததோடு, உட்கார்ந்து குறிப்புகளும் எடுத்துக் கொண்டேன். இந்தக் கட்டுரைக்காக அதைச் செய்தேன் – ஆவணப்பட இயக்குனராக அல்ல!

இவருடைய வாழ்க்கையை சில பகுதிகளாக பிரித்து, தன் வாழ்நாளில், இயற்கையை எப்படியெல்லாம் மனிதர் மாற்றியுள்ளார் என்று விவரிக்கிறார்.

பத்தாண்டு காலம்உலக மக்கட்தொகை (பில்லியன்)காற்றில் கரியமில அளவு (பி.பி.எம்.)பூமியின் வனப்பரப்புகுறிப்பு
19402.328066%அது ஒரு வனாக்காலம்!
19502.731064%
19603.031562%
19905.936046%முப்பதாண்டில், இரட்டிப்பு ஜனத்தொகை, பெருமளவு வனயிழப்பு
20207.841535%இயற்கை அழிப்பின் வேகம் தணியவில்லை
  • குறிப்பாக, இவர் ஆஃப்ரிக்க காடுகளில் தங்கி, வனவிலங்குகளைப் படம் பிடித்தவர். இங்கு, திறந்த வெளியில் மிக வேகமாக ஓடும் காட்டு எருமைகள் பல்லாயிரம் ஹெக்டேர் நிலப்பரப்பில் ஓடுபவை. இவற்றின், ஓட்டத்தால், நிலம் பண்படுகிறது. பண்பட்ட நிலத்தில், பல உயிர்கள் செழிக்கின்றன. இன்று, இந்த நிலப்பரப்பு, சில நூறு ஹெக்டேர் என்ற அளவிற்கு குறைந்து விட்டது மட்டுமல்லாமல், ஏராளமான மரங்கள் வெட்டப்பட்டதால், இங்கு வாழும் பல உயிரினங்கள் மறைந்து போய்விட்டன
  • எந்த ஒரு ஆரோக்கியமான காட்டிற்கும், ”பல்லுயிர்ச்சூழல்” (biodiversity) தேவை. ஒரு காட்டின், உணவுச் சங்கிலிக்கு, இது முக்கியம். இந்த உயிர் பரப்பு, நம் பூமியை சரியான சமநிலையில் (equilibrium) வைக்க மிகவும் முக்கியம். எந்த ஒரு உயிரினம் அழிந்தாலும், அத்துடன், அதைச் சார்ந்த உயிரினமும் பாதிக்கப்படும். இந்த பாதிப்பு, நமக்கு உடனே தெரிவதில்லை. உதாரணத்திற்கு, இந்தோனீசியாவில் உள்ள காடுகளில் குரங்குகள் (Orangutan) வேட்டையாடப்பட்டு, மிகவும் குறைந்துவிட்டன. இதனால், என்ன பாதிப்பு? இவை தாவித் திரிந்த மரங்களும் பாதிக்கப்படுகிறது. மரங்களை சுற்றியுள்ள சின்ன உயிரினங்களும் பாதிக்கப்படுகின்றன. இவற்றை அழிப்பதோடு நில்லாமல், காடுகளையும் அழித்தால், பல உணவுச் சங்கிலிகளையும், இந்த பூமியின் சமநிலையையும் குலைத்து விடுகிறோம்
  • காடுகளை அழித்து, பயிர்களை நடுகிறோம். பயிர்களும், கரியமில வாயுவை உறிஞ்சுகின்றன. இதனால், என்ன பெரிய மாற்றம் வரப் போகிறது? இவ்வாறு சொல்பவர்கள், பல விஷயங்களை விட்டு விடுகிறார்கள்.

1) பயிர் என்பது ஒரே வகையான செடி/மர வகை

2) பயிர்களால், உயிர்வாழக்கூடிய உயிரினங்கள், அதே பரப்பளவில் உள்ள காட்டைவிட, மிகக் குறைவு. உதாரணத்திற்கு, ஒரு ஹெக்டேர் நிலத்தில் பயிரிட்டால், நுண்ணுயிர்களைத் தவிர்த்து, அதில் செழிக்கும் மற்ற உயிர்களை விரல் விட்டு எண்ணிவிடலாம். ஆனால், அதே ஒரு ஹெக்டேர் நிலப்பரப்புடைய காட்டில், பலநூறு மடங்கு உயிரிங்கள், உணவுச் சஞ்கிலியை உருவாக்கி வாழ்கின்றன.

3) பயிர், வருடம் முழுவதும், கரியமில வாயுவை உறிஞ்சுவதில்லை

  • கடந்த 100 ஆண்டுகளில், 3 டிரில்லியன் மரங்களை, மனிதர் வெட்டிவிட்டான் என்று கணக்கிடப்பட்டுள்ளது. இவற்றை மீட்க மனிதரால் இயலாது.
  • நிலத்தில் மட்டுமல்ல, கடலிலும் இதே கதிதான். 1950 –களில், மிகப் பெரிய மீன் பிடிக்கும் எந்திரக் கப்பல்கள், அரசாங்கச் சலுகையுடன், கடலில் உள்ள பலவகையான உயிரினங்களை உணவிற்காக சகட்டு மேனிக்குக் கொல்லத் தொடங்கின. கடலின் ”பல்லுயிர்ச்சூழல்” இதனால் ஏராளமாகப் பாதிக்கப்பட்டது. கடலில் உள்ள உணவுச் சங்கிலி, காட்டைப் போல மிகவும் முக்கியம். சிறு மீன்கள் புழுக்களையும், சிறு மீன்களைப் பெரு மீன்களும், பெரு மீன்களை இன்னும் பெரிய சுறா/திமிங்கலம் போன்ற உயிரனங்களும், உணவாகக் கொண்டுள்ளன. ஒரு வகை மீனினம் முழுவதும் அழிக்கப்பட்டால், இந்த உணவுச் சங்கிலி பெரிய அளவில் பாதிக்கப்படுகிறது
  • கடலில் பிடித்த மீனை, இந்தக் கப்பல்கள் தரைக்கு கொண்டு செல்லுகின்றன. உணவுப் பகுதியைத் தவிர, இந்த உயிரினங்களின் எலும்புப் பகுதிகள் கடலுக்குப் போய் சேருவதில்லை. கடலில், இவை, கடலில் அடித்தளத்திற்குச் செல்லும். இவை சிறு உயிரினங்களுக்கு உணவாக மாறுகின்றன, கடலின் வெப்பத்தை சரி செய்யும் அமைப்பாகவும் அமைகின்றன. பெருமளவு மீன்பிடிப்பினால், கடலில் கரியமில வாயுவும் கூடுகிறது.
  • கடலில், மனித நடவடிக்கைகள், அதன் பல்லுயிர்ச்சூழலை 90% குறைத்துவிட்டன. இன்றைய கடலில் நீர் இருக்கிறதே தவிர, உயிர் இல்லை. முழுவதும் மனிதனால் வேட்டையாடப்பட்டுள்ளது. உயிரற்ற கடலின் எதிர் நடவடிக்கை என்னவாக இருக்கும்? உள்வாங்கிய ஏராளமான கரியமில வாயுவை வெளியேற்றுவது! கடலில் குடியிருந்த உயிரனங்களைக் கொன்ற மனிதனுக்கு, இயற்கையின் பதிலடி இது!
  • நாம் அறிந்தவரை, இதுவரை பூமியில் உயிர்கள் வாழத் தொடங்கிய காலத்திலிருந்து, ஐந்து மிகப் பெரிய உயிரழிவுகள் (mass extinctions) நடந்துள்ளன. இந்தப் பெரும் உயிரழிவுகள் ஒவ்வொன்றிற்கு முன்னரும் கரியமில வாயு அளவு உயர்வு ஏராளமாக இருந்தது. ஆனால், இன்றைய சூழ்நிலைக்கும், அதற்கும் ஒரு முக்கிய வித்தியாசம். அடுத்தடுத்த நிகழ்வுகளுக்கு இடையே சில மில்லியன் ஆண்டுகள் இடைவெளி இருந்தது. ஆனால், தொல்லெச்ச எரிபொருள், வெறும் 200 ஆண்டுகளில், நம்மை விளிம்பிற்குத் தள்ளிவிட்டது!
  • இன்றைய உலகின் பறவைகள் நிலை என்ன? இன்றைய பறவைகளில் 70%, நாம் வளர்க்கும் கோழி மற்றும் குஞ்சுகள்! இயற்கையில், சுதந்திரமாக வலம் வந்த பறவைகள், மனிதனின் வேட்டையில் மடிந்து விட்டன.
  • சரி, உலகில் எத்தனையோ விதமான பாலூட்டிகள் (mammals) உள்ளன, அல்லவா? தவறு. உலகின் 33% பாலூட்டிகள், மனிதர்கள். 60%, நாம் உண்பதற்காக வளர்க்கும் ஆடு, மாடு, பன்றி போன்றவை! சின்ன எலியிலிருந்து, ராட்சச திமிங்கலம் வரை, வெறும் 4% தான்! வெற்றிகரமாக இயற்கையை அழித்துவிட்டதற்கு இதற்கு மேல் என்ன சாட்சி வேண்டும்?
  • 60% பண்ணைப் பிராணிகளை வளர்க்க நாம் என்னவெல்லாம் செய்கிறோம்? காடுகளை அழிக்கிறோம். அழித்த காடுகளில், பயிர் வளர்த்து, பண்ணைப் பிராணிகளுக்கு உணவாக அளிக்கிறோம். நதிகளைக் காலியாக்குகிறோம். இந்த பண்ணைப் பிராணிகளை, இறைச்சிக்காக, தொழிற்சாலை உற்பத்தி முறையில் பெருமளவில் சாகடிக்கிறோம். இறைச்சியை உண்டு நாம் உயிர் வாழ, நோய் நொடிகளுடன் போராடுகிறோம்

இதற்கெல்லாம் தீர்வு உண்டா? நிச்சயமாகத் தீர்வு உண்டு என்கிறார் ஆட்டன்பரோ. அவசரத்தில் நம் கிரகத்தைத் தொலைக்கத் தேவையில்லை; மன்னிக்கவும், நம்மைத் தொலைக்கத் தேவையில்லை.

  1. பூமியின் நிலத்தை ஏன், எதற்காக மனிதன் ஆக்கிரமித்தான்? உணவு உற்பத்தி செய்யவா? உலகின் பல்லுயிர் சூழலை எதற்காக மனிதன் அழித்தான்? உணவுக்காக. பூமியின் காடுகளை அழிக்க முக்கிய காரணம், ஏராளமான பிராணிகளை உணவிற்காக (domesticated animals) வளர்த்து, பிறகு அவற்றை உணவுக்காகக் கொல்வதற்காகத்தான். இந்தப் பண்ணைப் பிராணிகள் ஏராளமாக இனப்பெருக்கம் செய்யப்பட்டு, அவற்றின் உணவிற்காகக் காடுகள் அழிக்கப்படுகின்றன. மேற்குலகில் வளர்க்கப்படும் சோளம் மற்றும் கோதுமை தானியங்கள் மனிதர்களை விட பண்ணைப் பிராணிகளுக்கே உணவாக அளிக்கப்படுகின்றன. இயற்கையில் இத்தனை மாடுகள், பன்றிகள், ஆடுகள் மற்றும் கோழி சாத்தியமே இல்லை. இவை இறைச்சியாகும்வரை ஏராளமான நிலம், நீர் மற்றும் பல (மருந்துகள், ரசாயனங்கள்) வளங்கள் வீணாக்கப்படுகின்றன. பண்ணைப் பிராணிகள், இறைச்சிக்காக ராட்சச தொழிலகங்களுக்கு எடுத்துச் செல்லப்படுதல், அங்கு அவை எந்திரங்களால் கொல்லப்படுவது என்றுதொழில் மயமாக்கப்பட்ட மாமிச உற்பத்தி யாவுமே மிகப் பெரிய வள விரயம். இறைச்சியை பதப்படுத்துதல், மற்றும் குளிர் வசதிகள், மற்றும் ராட்சச லாரிகளில், பல கோடி கிலோ மீட்டர்கள், டீசலை எரித்து, அவசர உணவகங்களுக்கு கொண்டு செல்லுதல் என்று இந்த தொடரும் விரயச் சங்கிலி ஒரு மிகப் பெரிய கரியமில வாயு உற்பத்திக் கொடுமை. இதில், இந்த பிராணிகள் பராமரிப்புக்காக பிராணி வைத்தியர்கள், மற்றும் மாடுகள் வெளியேற்றும் மீதேன் புவி சூடேற்ற வாயு என்று இந்த விரயப் பட்டியல் நீளும்.

மனிதர்களில், 10%, வருடம் ஒன்றிற்கு சைவ உணவிற்கு மாறினால்உலகில் மிகப் பெரிய மாற்றம் ஏற்படும்நாம் விவரித்த வள விரயம் 10% குறைந்தால்இன்னும் 50 வருடங்களில்நம் கரியமில வெளியேற்றம் மிகப் பெரிய அளவில் குறைக்க முடியும்.

அத்துடன், சமீபத்தில் அபகரித்த காடுகளை, இயற்கையிடம் வருடத்திற்கு 5% வாக்கில், விட்டு விட்டால்கூட, இந்த மட்டுப்படுத்தல் இன்னும் மேம்படும். அசைவத்தைக் குறைத்து, பிறகு கைவிட்டால், அது, நம்மை நாமே காக்கும் செயலாகும். தவிர, பூமியில் வாழும் மனிதர்களுக்கு இத்தனை பயிர்கள் தேவையில்லை. நாம், தாரளமாக உற்பத்தியைக் குறைக்கலாம்.

இத்தகைய பிரச்சினைகள் உருவாவதில் மக்கட்தொகைப் பெருக்கம் ஒரு அங்கம் வகிக்கிறது. அதற்கும் தீர்வு உண்டு.

  1. சமீபத்தில் பயிர்நிலமாக மாற்றப்பட்ட நிலங்களை நாம் மீண்டும் காடுகள் உருவாக விட்டு விடுதல் அவசியம். கோஸ்ட ரீகா என்ற மத்திய அமெரிக்க தீவு, கடந்த 25 ஆண்டுகளில், இதை நிரூபித்துள்ளது. அதற்கு முன், அங்கும் பயிருக்காக, சகட்டு மேனிக்கு, காடுகளை அழித்து வந்தனர். கடந்த 25 ஆண்டுகளாக, அப்படி மாற்றப்பட்ட நிலத்தில் பாதி நிலம் காடுகளாக மீண்டும் மாறிவிட அங்கு அரசாங்கம் முடிவெடுத்தது. அங்கு பல்லுயிர்ச் சூழல் மீண்டும் புத்துயிர் பெற்றுள்ளது.

காடுகளில் வாழும் பல விதமான உயிர்கள், இயற்கையாக, பயிர்நிலத்தை விட அதிக கரியமில வாயுவை உறிஞ்சுகின்றன. உலகில் உள்ள பயிர்நிலங்களில், மூன்றில் ஒரு பங்கு நிலம் தேவையற்றது. நாம் அசைவம் உண்பதை நிறுத்திவிட்டால், நிச்சயமாக, இந்தப் பங்கை வனங்களாக மாற்ற முடியும். இவ்வாறு மாற்றப்பட்ட காடுகள், புதிய உயிரினங்களுக்கு இருப்பிடமாகவும் மாறும். அங்குள்ள மற்ற உயிரினங்களுடன், இந்த பூமியைச் செழிப்படையச் செய்யும் பணி, மேலும் துரிதமாகும்.

  1. பூமியின் இன்னொரு மிக முக்கியப் பிரச்சினை மக்கட்தொகை. நம் பூமியின் அளவும், வளங்களும் ஒரு அளவிற்கு உட்பட்டவை. தமிழ் கவிஞர்கள் பாடல்களில் இயற்கை அன்னை அளவில்லாமல் அள்ளித் தருபவள் என்பதெல்லாம் சும்மா.

இந்த அளவான வளங்களை அனுபவிக்க அளவில்லா மக்கட்தொகை சரிப்பட்டு வராது. என்னதான் மாற்றங்கள் செய்தாலும், மக்கட்தொகை வளர்ந்து கொண்டே போனால், இந்தப் பிரச்சினையைத் தீர்க்க முடியாது. கடந்த 100 ஆண்டுகளின் மக்கட்தொகை வளர்ச்சி தொடர்ந்தால், 2100 –ஆம் ஆண்டில் பூமியில் 11 பில்லியன் மனிதர்கள் இருப்பார்கள். இந்த மக்கட்தொகை அளவைச் சமாளிக்க பூமியின் வளங்கள் போதாதவை. நிச்சயமாக, மனிதர்கள் முட்டாள்கள் அல்ல. மருத்துவம், கல்வி இரண்டும் வளர்ந்த எந்தப் பகுதியிலும், இந்த மக்கட்தொகை வளர்ச்சி ஏராளமாக அதிகரிக்கவில்லை.

உதாரணம், இந்தியாவின் உத்தராகண்ட், ஜார்கண்ட், பீஹார் மாநிலங்களில் கல்வி மற்றும் சுகாதாரம் பின் தங்கியிருப்பதால், இவற்றின் மக்கட்தொகை அதிகரித்துக் கொண்டே போகிறது. தென் இந்தியாவில், கல்வி மற்றும் சுகாதாரம் வளர்ந்துள்ளதால், ஓரளவு ஜனத்தொகை வளர்ச்சி (பெரும்பாலும், நல்ல மருத்துவத்தால், நாம் முன்பைவிட அதிக்காலம் வாழ்கிறோம்) சமாளிப்பில் உள்ளது. இந்தப் பணிகளை வளரும் நாடுகளில் துரிதப்படுத்தினால், 2050 அல்லது 2060 –க்குள், நம் பூமியுடைய மக்கட்தொகை 9 பில்லியனைத் தொட்டு, பிறகு குறைவதற்கும் வாய்ப்புள்ளது.

  1. இயற்கை, என்றுமே பயன்படுத்துவது, புதுப்பிக்கக்கூடிய சக்தி மட்டுமே. ஒவ்வொரு நாளும் இயற்கை மூன்று டிரில்லியன் வாட் சூரிய சக்தியை, உலகில் உள்ள செடிகள், மரங்கள் பயன்படுத்துகின்றன. புதுப்பிக்கக்கூடிய சக்திகளைப் பயன்படுத்துவதற்கான தொழில்நுட்பங்கள் நம்மிடம் நிறைய உள்ளது. இயற்கையைப் போலவே, நாம், தொல்லெச்ச எரிபொருள் அடிமைத்தனத்திலிருந்து விடுபட வேண்டும். சிலரது லாபநோக்குக்காக இயங்குவதை விடுத்து, மனிதகுலம் நிச்சயமாக பெரும் மக்கள் திரளுக்கான நல்ல தீர்வுகளை உருவாக்கும். நாளைய இளைஞர்கள், இந்த மாற்றுசக்தி முயற்சிகளுக்கு நிச்சயம் நல்ல பங்களிப்பதோடும் இன்றைய வயதானவர்கள் ஏன் இப்படியெல்லாம் சிந்திப்பதில்லை என்று வியக்க வைப்பார்கள்
  2. அடுத்த முக்கிய முயற்சி, கடலைப் பற்றியது. எந்திர மீன் பிடிக்கும் கப்பல்கள், சர்வதேச கடல் எல்லைகளைத் தாண்டி மீன் பிடிப்பதை நிறுத்த வேண்டும். ஒவ்வொரு நாடும், அதன் எல்லைக்குள் உள்ள கடலில் மீன் பிடித்தாலே போதும். இதை ஒரு பத்தாண்டுகள் கடைபிடித்தாலே போதும், மீண்டும் கடல், தன்னுடைய பழைய நிலைக்கு வரத் தொடங்கிவிடும். மறைந்த எல்லா உயிரினக் குடும்பங்களையும் (habitat) மீட்க முடியாமல் போகலாம். ஆனால், எஞ்சியுள்ள உயிரினக் குடும்பங்களை மீட்க இந்த முயற்சி பெரிதாக உதவும். இந்த உயிரினங்கள், கடலை மீண்டும் ஒரு கரியமில வாயு உறிஞ்சியாக மாற்றும் வாய்ப்பும் உள்ளது. ஐ.நா., இந்த முயற்சியில் ஈடுபட்டுள்ளது. நம் இனத்தின் எதிர்காலத்தை கருத்தில் கொண்டு, நாடுகள் இந்த முயற்சிக்கு உதவும் என்று நம்புவோம்
  3. ஆக, டேவிட் ஆட்டன்பரோ சொல்வது சுருக்கமாக, இதுதான்: நம் எதிர்காலம் நன்றாக இருக்க ஒரே வழி – நம் பூமியைக் காடுமயமாக்குவது.

வனங்களை மனிதமயமாக்காமல் மனித வாழ்வை வனவாசமாக, இயற்கைவசமாக, ஆக்குவதே நல்ல வழி.

புவிச் சூடேற்றம் – பருவநிலை மாற்ற ஆர்வலர்கள் – பகுதி 15

பருவநிலை மாற்றத்தால் உருவாகியுள்ள தாக்கங்களுக்கு அரசாங்கங்கள் மற்றும் நிறுவனங்கள் எந்த முன்னேற்றமும் வரவிடாமல் இழுபறி நிலையைக் கண்ட இன்றைய இளைய சமூகம் களத்தில் இறங்கியுள்ளது.

இவர்களை, ‘பருவநிலை மாற்ற ஆர்வலர்கள்’ என்று சொல்லலாம் (climate change activists). சமூகத்தின் மூத்தவர்கள், எதிர்காலத்தைப் பற்றிக் கவலைப்படாமல், இந்த பூமி அழிவதை வேடிக்கை பார்க்கிறார்கள் என்பது இவர்களது வாதம்.

25 வயதிற்குள்ளவர்கள், இதனால் பெரிதும் பாதிக்கப்படுவார்கள் என்பதில் எந்த கருத்து வேறுபாடும் இல்லை. உலகின் மூத்த அரசியல் மற்றும் நிறுவனத் தலைவர்கள் என்று யாரையும் இவர்கள் விடுவதில்லை. பல நகரங்களில், நாடுகளில், இவர்கள் அமைதிப் போராட்டத்தில் ஈடுபட்டுள்ளனர். இந்தப் பகுதியில், இத்தகைய சில இயக்கங்கள் மற்றும் இளைஞ(ஞி)ர்கள் பற்றி அலசுவோம்.

பொதுவாக இவ்வகை இயக்கங்களை மூன்று வகையாகப் பிரிக்கலாம்:

  1. தீர்வால் உந்தப்பட்ட இயக்கங்கள் (solution driven activism): இந்த வகைப் போராட்டங்கள், ஒரு மாற்றுத் தீர்வுக்காக போராடும் முயற்சி. உதாரணத்திற்கு, ஒரு அடர்ந்த காடு வழியாக எண்ணெயைத் தாங்கிச் செல்லும் குழாய்களை எதிர்க்கும் சில குழுக்கள், மாற்றாக, கடல் வழியாக ஏன் அதே எண்ணெயை எடுத்துச் செல்லக் கூடாது என்று போராடுவது
  2. மாற்றத்தால் உந்தப்பட்ட இயக்கங்கள் (change driven activism): இந்த வகைப் போராட்டங்கள், ஒரு அரசாங்கச் சட்டம், அல்லது வழக்கத்தை மாற்றுவதை மையமாகக் கொண்டவை. உதாரணத்திற்கு, அரசாங்கம், பல நாடுகளிலும் தொல்லெச்ச எரிபொருள் தயாரிப்பாளர்களுக்கு வழங்கும் மானியத்தை ரத்து செய்ய வேண்டும் என்ற போராட்டம், இவ்வகையில் அடங்கும்.
  3. புரட்சியால் உந்தப்பட்ட இயக்கங்கள் (revolution driven activism): இந்த வகைப் போராட்டங்கள், மிகப் பெரிய மாற்றங்களை கொண்டு வர முயலும் இயக்கங்கள். அதாவது, இருக்கும் முறைகளை அறவே கிள்ளி எறிந்துவிடத் தூண்டும் முயற்சி இது. பருவநிலை மாற்றம் சார்ந்த போராட்டம் இல்லையென்றாலும், உஉதாரணத்திற்கு, ஹாங்காங்கில் உரிமைகளை இழந்த நகரவாசிகள், தங்களுடைய தார்மீக உரிமைகள் மீட்கப்பட வேண்டும் என்று போராடுவது இந்த வகை எனலாம். நல்ல வேளையாக, இன்றுவரை இவ்வகை பருவநிலை மாற்றம் சார்ந்த போராட்டங்கள் உலகில் பெரிதாக முளைவிடவில்லை.

பருவநிலை மாற்ற ஆர்வலர்கள், தீர்வையும், மாற்றத்தையும் மையமாகக் கொண்டவர்கள். இதனால்தான், உயிர் மற்றும் சொத்து இழப்பு என்பது இவ்வகைப் போராட்டங்களில் இன்று வரை நிகழவில்லை. ஆனால், எந்த நடவடிக்கையும் எடுக்காமல், அரசாங்கங்கள் இழுத்தடித்தால், இந்த இயக்கங்கள், புரட்சி இயக்கங்களாக மாற வழி உள்ளது.

2020 நவம்பரில் நடந்து முடிந்த அமெரிக்க தேர்தலில் வெற்றி பெற்ற ஜோ பைடன், பருவநிலை மாற்றத்திற்காக இரண்டு டிரில்லியன் டாலர் திட்டத்திற்கு உதவியவர் வர்ஷினி பிரகாஷ் (உதயசூரியன் இயக்கம்) என்னும் பாஸ்டனைச் சேர்ந்த இளைஞி. இன்றைய பருவநிலை மாற்ற இயக்கங்களில் ஈடுபட்டுள்ள இளைய சமுதாயம், மிகவும் தெளிவாக உள்ளார்கள். இவர்கள் பாராட்டுக்களால் மயங்குவதில்லை. பிர்ச்சினை எவ்வளவு பெரியது, சிக்கலானது என்பதை முற்றிலும் அறிந்தவர்கள் இவர்கள். இந்த இயக்கங்களை, சரியான முடிவுகள் மற்றும் நடவடிக்கைகள் மட்டுமே திருப்திப்படுத்தும்.

2018 –ல் ஸ்வீடனைச் சேர்ந்த கிரெடா தன்பர்க், ஐ.நா. வின் பொதுச் சபையில் உலக தலைவர்கள் முன், பருவநிலை மாற்றத்தின் அபாயம் பற்றியும், உடன் நடவடிக்கை தேவையைப் பற்றியும் உரையாற்றினார். அப்பொழுது கிரெடாவின் வயது 16.

”நம்முடைய முதிர்ந்த அரசியல் தலைவர்கள் குழந்தைகள் போலச் செயல்படுவதால், குழந்தைகளான நாங்கள், இவர்கள் தட்டிக் கழித்த பொறுப்பை ஏற்றுக் கொள்ள வேண்டியுள்ளது.”என்றார்.

இவர், பல பள்ளி வேலை நிறுத்தங்களை ஒருங்கிணைத்தவர். இது போல, பல இளைஞர்கள் அணிகள் அமெரிக்கா மற்றும் யூரோப்பில் இயங்கி வருகின்றன. 2020 –ல் இவர்கள் ஒருங்கிணைந்து செயல்படுவது மாற்றம் பற்றிய நம்பிக்கையை வளர்த்து வருகிறது. ஜோ பைடன் தலைமையிலான புதிய அரசாங்கமும் மாற்றங்களுக்கு உதவும் என்று நம்ப வாய்ப்புள்ளது. டிரம்ப் அரசாங்கம், அமெரிக்காவை, பல ஆண்டுகள், இந்தத் துறையில் பின்தங்க வைத்த பிற்போக்கு அரசாங்கம். முதல் வேலையாக, டிரம்ப் அரசாங்கம் செய்த பருவநிலை மாற்ற கொள்கை தில்லாலங்கடிகளைச் சரி செய்ய வேண்டும்.

2019 –ல், ஒரு மில்லியன் மாணவர்கள் ஒரே நாளில், பருவநிலை மாற்றம் நிறுத்த நடவடிக்கை எடுக்குமாறு கிளர்ச்சி செய்தனர். இவர்களது கிளர்ச்சி, அரசியல் தலைமையை நடவடிக்கை எடுக்கத் தூண்டுமா என்பது ஒரு கேள்விக்குறிதான். சில நாட்களுக்கு சமூகத்தில் வயதானவர்கள் சற்று தர்மசங்கடப்பட்டுவிட்டு, பிறகு அவரவர் தொல்லெச்ச எரிபொருள் காரில் ஏறி, வேலையைப் பார்க்கச் சென்று விடுவது நம் சமூகத்தின் சாபக்கேடு. இவர்களது கோரிக்கைகள் என்ன?

  1. தொல்லெச்ச எரிபொருள்கள் 100% குறைக்க வேண்டும்
  2. தொல்லெச்ச எரிபொருள் தயாரிப்பாளர்களுக்கான மானியம் நிறுத்தப்பட வேண்டும்
  3. எல்லா சக்தியும் புதுப்பிக்கக்கூடிய சக்தியாக மாற வேண்டும்

பிளவு அரசியல் களமான அமெரிக்காவில், பருவநிலை மாற்ற ஆதரவான, ஜனநாயக கட்சியில், வெறும் 48% காங்கிரஸ் உறுப்பினர்கள் மட்டுமே, இதை ஒரு பெரிய பிரச்சினையாகக் கருதினர். குடியரசுக் கட்சியைப் பற்றிக் கேட்கவே வேண்டாம். 10% 0க்கும் குறைவான காங்கிரஸ் உறுப்பினர்கள் மட்டுமே இப்படி நினைக்கிறார்கள்.

கரியமில வாயுவிற்கு வரி நிலவும் கனடா அருகே உள்ள வாஷிங்டன் மாநிலம், இவ்வகை வரிக்கு எதிர்ப்பு தெரிவித்து, இந்த முயற்சியை முடங்கச் செய்தது. இத்தனைக்கும், இது ஒரு ஜனநாயக கட்சி ஆண்டு வரும் மாநிலம்.

ஃப்ரான்ஸ் நாட்டில், தொல்லெச்ச எரிபொருளுக்கான வரியிலிருந்து அதிபர் மாக்கரோன் பின்வாங்கியுள்ளார். இந்த நிகழ்வுகள் எதைக் காட்டுகின்றன?

கனடா போன்ற சில நாடுகளைத் தவிர மற்ற நாடுகள் உதட்டளவில் பருவநிலை மாற்றம் தடுக்கப்பட வேண்டும் என்று பேசி வருகிறார்கள். ஆனால், அதற்காக, எந்தவித நடவடிக்கைக்கும் வரி கட்டத் தயாராக இல்லை. உலகின் மிக அதிக அளவில் படித்தவர்கள் வாழும் நாடான கனடாவின் மக்கள், (world’s highest post-secondary educated population) இந்த நடவடிக்கைகள் பிடிக்காவிட்டாலும், அவற்றின் அவசியத்தைப் புரிந்து கொள்கிறார்களோ என்று தோன்றுகிறது.

இந்த இளைஞர்களின் வாதம்,

”மனிதகுலம் அழிந்துவிடும் அபாயம் எங்கள் கண்முன் தெரிகிறது. ஆனால், அரசியல் தலைவர்கள், தொடர் பொருளாதார வளர்ச்சியைப் பற்றிப் பேசி, பொறுப்பைத் தட்டிக் கழிக்கிறார்கள்.”

நல்ல வேளையாக, இந்த இளைஞர்கள், நம் எதிர்கால அரசாங்கங்களைத் தேர்ந்தெடுக்கும் வாய்ப்பை இன்னும் சில ஆண்டுகளில் பெறுவார்கள். இன்றும், பல அரசியல் தலைவர்கள், 2050 –ற்குள், பூஜ்ஜிய உமிழ் (zero emission target) என்ற நிலையை எட்டி விடுவோம் என்று சொல்லிக் காலம் தள்ளுகிறார்கள். அடுத்த 30 ஆண்டுகளில், நாம் இன்னும் காற்று மண்டலத்தில் சேர்க்கவிருக்கும் கரியமில வாயு நீங்க, குறைந்தபட்சம் இன்னும் 100 முதல் 150 வருடங்களாகும்.

ஐஸ்லாந்து, ஸ்வீடன், ஃபின்லாந்து போன்ற சில நாடுகள் தவிர்த்து, புதுப்பிக்கக்கூடிய சக்திக்கு மாறும் நாடுகள் இன்னும் குறைவாகவே உள்ளன. பொதுவாக, உலக அரசியல் தலைவர்கள், தொலைநோக்குடன் செயல்படத் தயங்குகின்றனர். ஒரு புறம், உடனே நடவடிக்கை எடுக்க வேண்டும் என்ற கோரிக்கை இளைய சமூகத்தினர் முன் வைத்தாலும், அரசியல் தலைமையின் தயக்கம் கடந்த 20 ஆண்டுகளின் இழுபறி நிலைக்குக் காரணம்.

அரசியல் தலைவர்கள், நடவடிக்கை எடுக்க, ஏன் தயங்குகிறார்கள்? பெரும்பாலான நடவடிக்கைகள், ஏதோ ஒரு விதத்தில், வரிகளை உயர்த்த வேண்டிய கட்டாயம், இவர்களது தேர்தல் வாய்ப்புகளை பாதிக்கும் என்று அஞ்சுகிறார்கள். இளைஞர்கள் கேட்கும் கேள்வி, நீங்கள் அரசியல்வாதிகளா அல்லது உண்மையான தலைவர்களா?

வாகனத் தொழிலின் பழைய பெருச்சாளியான ஜி.எம்., இன்னும் ஐந்து ஆண்டுகளில் பெரும்பாலும் மின்னூர்த்திகளையே விற்போம் என்று சொல்லியுள்ளது. இதை நம்ப யாரும் தயாராக இல்லை. 2018 –ல், உமிழ் கட்டுப்பாட்டை நீக்கப் போராடி டிரம்ப் அரசிடம் வெற்றி பெற்ற அதே ஜி,எம். இது!

பல இளைஞர்களைப் பற்றி இங்கு சொன்னாலும், பல விஞ்ஞானிகள் மற்றும் வயதானவர்கள் சிலரும் இந்த விஷயத்தில் அயராது உழைத்து வருகின்றனர். கனேடிய விஞ்ஞானி டேவிட் சுஸூக்கி, பல ஆண்டுகளாக, கனேடிய தொலைக்காட்சிகளில், இயற்கை மற்றும் பருவநிலை மாற்றம் பற்றி ஆராய்வதோடு, இளைஞர்களையும் கை கோர்த்து, கனேடிய அரசாங்கத்தை மாறச் செய்வதில் வெற்றியும் பெற்றுள்ளார்:

இன்றும் இவர் கனேடியர்களுக்கு சொல்வது இதுதான்:

“கரோனாவுடன் போராடுகிறோம், பருவநிலை மாற்றப் போராட்டத்திற்கு எங்களிடம் நேரமில்லை என்று மட்டும் சொல்லாதீர்கள். பருவநிலை மாற்றத்திற்கான போராட்டம் ஒன்றும், இந்த ஆண்டு விடுமுறையைத் தள்ளிப் போடுவது போன்ற விஷயமல்ல”

இளைஞர்கள் சுருக்கமாகச் சொல்வது இதுதான்:

  1. மாமிசம் சாப்பிடுவதை விட்டு விடுங்கள்
  2. விமானத்தில் பறக்காதீர்கள்
  3. தொல்லெச்ச எரிபொருளில் இயங்கும் ஊர்திகளைப் பயன்படுத்தாதீர்கள்

இந்த மூன்று விஷயத்தையும் பணக்கார நாடுகளில் வாழும் அனைவரும் ஒரு வாதத்திற்கு, பின்பற்றுகிறார்கள் என்று வைத்துக் கொள்வோம். இதனால், எப்படிப்பட்ட மாற்றங்கள் வர வாய்ப்பிருக்கிறது?

  • மேற்கத்திய மனிதர்கள் மாமிசம் உண்பதை விட்டு விட்டால், பெரிய மாற்றம் வர வாய்ப்பிருக்கிறது. ஆனாலும், இந்த மூன்று மாற்றத்திலும், மிகவும் கடினமானது இந்த மாற்றம்தான்
  • இன்றிலிருந்து உலகின் 4.5 பில்லியன் விமானப் பயணங்கள் ரத்து செய்யப்பட்டால், 2100 –ஆம் ஆண்டிற்குள், பூமியின் சராசரி வெப்பம், 0.054 டிகிரி குறையும்
  • அடுத்த 11 ஆண்டுகளில், மின்சாரக் கார்கள் 130 மில்லியன் என்ற அளவிற்கு உயர்ந்தால், பூமியின் கரியமில வாயுவின் உமிழ் அளவு வெறும் 0.4% மட்டுமே குறையும்

இதிலிருந்து தெரிவது, வளர்ந்த நாடுகளில், தனிநபர்கள் தங்களது பழக்கங்களை மாற்றிக் கொள்வதால், சில முன்னேற்றங்கள் இருந்தாலும், மிகப் பெரிய மாற்றம், உணவு பழக்கத்திலிருந்து மற்றும் வளரும் நாடுகளிடமிருந்து வர வேண்டும்.

இன்று உலகின் மிகப் பெரிய அனல்மின் நிலையங்கள் மூலம் கரியமில உமிழ்வு சைனா மற்றும் இந்தியாவிலிருந்து உருவாகிறது. எந்த ஒரு பெரிய மாற்றமும், உலகின் மக்கள் தொகையில் பாதி மனிதர்கள் வசிக்கும் இந்த இரு நாடுகளில் தொடங்கினால், பெரிய தாக்கம் ஏற்படும்.

இந்த நாடுகள் கரியமில வரியை விதித்தால், ஓரளவு இந்தப் பிரச்சினையைச் சமாளிக்க முடியும். ஏன் ஓரளவு? உதாரணத்திற்கு, 1970 –களில், உணவுப் பற்றாக்குறையை எப்படி உலகம் சமாளித்த்து? எல்லோரையும் குறைவாக சாப்பிடச் சொல்லியா? அல்ல. பசுமைப் புரட்சி என்ற புதிய முறையினால், அதிக உணவை பயிர் செய்து, பிரச்சினையைத் தீர்த்தோம். அதே போல, இந்தப் பிரச்சினைக்கும் புதிய சிந்தனை, முறைகள் தேவை. ஏழை நாடுகள், புதுப்பிக்கக்கூடிய சக்தியைப் பயன்படுத்த ஊக்கமளிக்க வேண்டும். புதிய சமயல், போக்குவரத்து மற்றும் சக்தி உருவாக்கம் நம்முடைய கரியமில உமிழ்வை குறைக்க வழி செய்யும். இது போன்ற இன்னும் சில தீர்வுகளை அடுத்த பகுதியில் பார்ப்போம்.

புவிச் சூடேற்றம் – விஞ்ஞானத் திரித்தல்கள் – பகுதி-14

இன்னும், சில சாதுரியமான பருவநிலை மாற்றம் பற்றிய திரித்தல்களை அலசுவோம்.

”செடிகள்/மரங்களுக்கு கரியமில வாயு தேவைப்படுகிறதுமனிதர்கள் அவற்றுக்கு உதவும் வகையில் கரியமில வாயுவை உருவாக்குகிறார்கள்இதில் என்ன பெரிய விஷயம்?”

அடடா, இயற்கையின் மீது எவ்வளவு அக்கறை இவர்களுக்கு என்று தோன்றலாம். செடிகள்/மரங்களுக்கு கரியமில வாயு தேவைதான். இதில்; எந்த சந்தேகமும் இல்லை. ஆனால், கடந்த 100 ஆண்டுகளில், 18 டிரில்லியன் மரங்களை மனிதர்கள் அறுத்து விட்டு, காடுகளை அழித்து விட்டார்கள்.

இருக்கும் செடி/மரங்களுக்கு தேவையான கரியமில வாயுவின் அளவை விட பல நூறு மடங்கு மனிதர்கள் தங்கள் நடவடிக்கைகளால், உருவாக்குவதனால் உருவான பிரச்சினை இது. அளவை மீறியதால், இந்த பூமியின் சமநிலை சவாலுக்கு உள்ளாகியுள்ளது. இயற்கைக்குஇதைச் சமாளிக்கத் தெரியும்இந்த சமாளிப்பில்மனிதர்கள் இருப்பார்களாஇல்லையா என்பதே பிரச்சினை..

”புதுப்பிக்கக்கூடிய சக்தி (renewable energy) எல்லாம் சும்மா பூச்சுற்றல்சில தனிநபர்களும்அரசாங்கங்களும் செய்யும் சதி வேலை”

இது உண்மையல்ல. கடந்த 60 ஆண்டுகளாக, புதுப்பிக்க்கூடிய சக்தி உருவாக்கம் பற்றிய ஆராய்ச்சி நிகழ்ந்த வண்ணம் உள்ளது. இந்த ஆராய்ச்சியை முன்னே செல்ல விடாமல் தடுப்பது என்னவோ தொல்லெச்ச எரிபொருள் நிறுவனங்கள். சூரிய ஒளியை, காற்றின் ஆற்றலை, மற்றும், புவிவெப்ப சக்தியைப் பயன்படுத்தும் முயற்சிகள், நாளுக்கு நாள் செயல்திறன் கூடிக் கொண்டே வருகிறது. 500 கி,மீ. ஒரு மின்னேற்றத்தில் பயணம் செய்யும் மின்கலன் கார்கள் இன்று சாத்தியம்.

இதைச் சொன்னால், உடனே, ஒரு மின் கார் உற்பத்தி செய்வதற்கு எத்தனை தொல்லெச்ச எரிபொருள் செலவாகிறது என்று ஒரு பட்டியலை நம் முன் வைப்பார்கள். பிரச்சினை அதுவல்ல. உருவாக்கப்பட்ட மின்கலன் காருக்கு, பராமரிப்பச் செலவு மிகக் குறைவு. மேலும், எஞ்சினுக்கு எண்ணெய் என்று மேலும் சுற்றுப்புற சூழலை, இவை பாழடிப்பதில்லை. எல்லாவற்றையும் விட மிகப் பெரிய கொடுமை, தொல்லெச்ச எரிபொருள் தொழிலுக்கு அரசாங்கங்கள் கொடுக்கும் சலுகை. புதிய கிணறுகள் தோண்டுவதற்கு, உதவி செய்வது, உடனே நிறுத்தப்பட வேண்டும்.

”மேகமூட்ட நாட்கள் மற்றும் காற்றில்லாத நாட்களில்புதுப்பிக்க்கூடிய சக்தி செயலிழந்து விடுகிறதுஇது நம் அன்றாடத் தேவைகளைக் கூட சமாளிக்க முடியாத ஒரு விலை உயர்வான அமைப்பு”

மேகமூட்ட நாட்களில், சூரிய ஒளியால் உருவாகும் சக்தி குறைவுதான். அதில் சந்தேகம் இல்லை. அதே போல, காற்றில்லாத நாட்களில், காற்று, சுழலிகளால் குறைந்த சக்தியைத்தான் உருவாக்க முடியும். ஆனால், உலகின் பெரும் பகுதிகளில், வருடத்தின் 200 –க்கும் மேற்பட்ட நாட்கள் ஏராளமான சூரிய ஒளி கிடைக்கிறது. இந்த நாட்களில் உருவாக்கப்படும் சக்தி முழுவதும் பயன்படுத்தப்படுவதில்லை.

இன்றைய தொழில்நுட்பம், ராட்சச மின்கலன்களில் சக்தியை சேமிக்கும் நுட்பத்தை வழங்கியுள்ளது. சரியாக பயன்படுத்தப்பட்டால், சேமித்த அபரிமித சக்தியை குறைந்த காற்று மற்றும் சூரிய ஒளி இருக்கும் நாட்களில் பயன்படுத்த முடியும். ஒரு முக்கிய பிரச்சினையை இங்கு வாசகர்கள் முன் வைக்க வேண்டும். புதுப்பிக்கக்கூடிய சக்தி முயற்சிகளில் உள்ள மிகப் பெரிய சிக்கல், உருவாக்கிய சக்தியை எப்படி நுகர்வோரிடம் கொண்டு செல்வது என்பதே. உலகின் மிகப் பெரிய நாடுகள் யாவிலும், சக்தி தயாரிப்பு, பெரிய நகரங்கள், தொழிற்சாலைகள் இருக்கும் இடங்களுக்கு அருகில் (அதாவது 200 கி.மீ. –க்குள்) உள்ளன. பெரும்பாலும், இவை அனல் மற்றும் அணுசக்தி நிலையங்கள். இதனால், மின்னாற்றல் கடத்தல் செலவுகள் குறைவு. ஆனால், புதுப்பிக்கக்கூடிய சக்தி உருவாகும் அமைப்புகள், நுகர்வோர் மையங்களிலிருந்து மிகத் தள்ளியே உள்ளன. இதனால், இந்தப் புதிய முயற்சிகளின் மிகப் பெரிய தடை, மின்னாற்றல் கடத்தல் அமைப்புகளில் அதிக முதலீடு இல்லாதது மிகப் பெரிய குறை என்பது வல்லுனர்களின் கருத்து.

”விஞ்ஞானிகள் எதிர்பார்த்ததை விடபூமி குறைவாகவே வெப்பமடைந்துள்ளது”

இந்த திரித்தல், எவ்வளவு மோசமானது என்பது, இந்தத் தொடரைப் படிப்பவர்களுக்கு சொல்லத் தேவையில்லை. விஞ்ஞானிகள் எதிர்பார்த்ததை விட அதிகமாகத் தான் பூமி வெப்பமடைந்துள்ளது. விஞ்ஞானிகளின் எதிர்பார்ப்பு, 2020 –ல், தொழிற்புரட்சி அளவிலிருந்து (1850) ஒரு டிகிரி, பூமியின் சராசரி வெப்பநிலை அதிகரிக்கும் என்பது. உண்மையில் இன்று, 1.5 டிகிரி அதிகரித்துள்ளது. அதாவது, எதிர்பார்ப்பை விட 50% அதிகமாகவே வெப்பமாகியுள்ளது.

அடுத்த பகுதியில், பருவநிலை மாற்றத்தை மக்களுக்கு எடுத்துச் செல்லும் இயக்கங்களைப் பற்றி விரிவாகப் பார்ப்போம்.

புவிச் சூடேற்றம் -விஞ்ஞானத் திரித்தல்கள் – பகுதி -13

மேலும், சில சாதுரியமான பருவநிலை மாற்றம் பற்றிய திரித்தல்களை அலசுவோம். 

பருவநிலை மாற்ற மாதிரியுருக்கள் மிகவும் தோல்வி மனப்பான்மை கொண்டவை (pessimistic models)”

முதலில், விஞ்ஞானம், வியாபாரம் போன்ற விஷயமல்ல. வியாபாரத்தில், பல விஷயங்களை ஊதி வாசிப்பது, மற்றும் மிகவும் நம்பிக்கையான அணுகுமுறை (optimism) அவசியமாகக் கருதப்படுகிறது. ஈலான் மஸ்க், செவ்வாய் கிரகத்திற்கு சொல்லும் அபாயங்களைப் பற்றி அதிகம் பேச மாட்டார். அவரது வியாபாரப் பணி (இவர் பெளதிகம் படித்தவர்), முதலீட்டாளர்களுக்கு நம்பிக்கை அளிப்பது. இதே மஸ்க், ஃபால்கன் ராகெட் வெடித்தால், இந்தத் துறையில் இவ்வகை அபாயங்கள் சகஜம் என்றும் சொல்லுவார்!

இந்த வகை திரித்தல்களில் ஈடுபடுபவர்கள், விஞ்ஞானிகள், வியாபாரிகளைப் போல இருக்க வேண்டும் என்று எதிர்பார்ப்பவர்கள். வியாபாரத்தில், எந்த ஒரு விற்பனை மாதிரியுருவும், மூன்று குறிக்கோள்களை முன் வைக்கும். நம்பிக்கை நிறைந்த, அவநம்பிக்கை கொண்ட  மற்றும் நடைமுறையை ஒத்த (எதார்த்தமான) குறிக்கோள்கள் அவை. இதை optimistic, pessimistic and realistic என்று சொல்வதுண்டு. 

விஞ்ஞானத்தில் உருவாக்கப்படும் மாதிரியுருக்கள் இவ்வாறு குழப்புவதில்லை. இயற்கையிடமிருந்து எந்த எதிர்பார்ப்பும் இல்லாதவர்கள் விஞ்ஞானிகள். அபாயமிருந்தால், அதைச் சொல்ல வேண்டும்; முழுவதும் புரியவில்லை என்றால், அதையும் சொல்ல வேண்டும். வேண்டுமென்றே மறைக்க இதில் ஒன்றும் இல்லை. 

அத்துடன், விஞ்ஞானத்தைத் திரிப்பவர்களிடமிருந்து நமக்குக் கிட்டுவது பெருமளவும் ஒரு இரண்டாம் கட்டத் தாக்குதல். 

முதல் கட்டம், மாதிரியுருக்கள் நம்பத்தகுந்தவை அல்ல என்று சொல்வது. 

இந்த வாதம் வேகாத பட்சத்தில், இரண்டாம் கட்டமாக, மாதிரியுருக்கள் தோல்வி மனப்பான்மை படைத்தவை என்று குழப்புவது.

பருவநிலை மாற்ற மாதிரியுருக்கள், என் பார்வையில், சற்று நம்பிக்கை நிறைந்த மாதிரியுருக்கள். இந்த மாதிரியுருக்களின் கணிப்பு, பூமியின் சராசரி வெப்பம் 2020 –ஆ அண்டில், 1 டிகிரி உயரும் என்பது. உண்மை அதுவல்ல; இன்னும் மோசமான 1.5 டிகிரி என்று இன்று தெரிய வந்துள்ளது. 

ஒரு முக்கியமான விஷயத்தை இங்கு நாம் மனதில் கொள்ள வேண்டும். பருவநிலை மாற்ற விஞ்ஞானிகள், நீண்ட காலப் பார்வையுடன், எதிர்காலம் பற்றிய கருத்தைத் தெரிவிப்பவர்கள். ஏதோ ஒரு பழைய காலம் பற்றிய விஷயங்களுக்கு சாட்சியங்கள் கொண்டு வருவது எளிது. எதிர்காலம் அப்படியல்ல. இதனால், பொதுவாக சற்று அவநம்பிக்கை இந்த கருத்துக்களைக் குறித்து உருவாவது இயற்கை. ஆனாலும், விஞ்ஞானிகளின் பல கருத்துக்கள் நம்பிக்கை கொண்ட பார்வை உள்ள்வை என்பதில் எந்த ஐயமும் இல்லை. 

உதாரணத்திற்கு,  ஆர்க்டிக் பெருங்கடலில் குன்றி வரும் பனிப்பாறைகள் பற்றிப் பார்த்தோம். விஞ்ஞானிகளின் எதிர்பார்ப்பை விட (மாதிரியுருக்களின் உதவியுடன்) இந்த பனிப்பாறைகள் அதிகமாகவே உருகியுள்ளன. உண்மையாகச் சொல்வதானால், விஞ்ஞானிகளின் பருவநிலை மாற்ற மாதிரியுருக்கள், சற்று கூடுதலாகவே நம்பிக்கையூட்டுபவையாக உள்ளன!

அதிக கரியமில வாயு மனிதகுலத்திற்கு நல்லதே

இதைச் சொல்லுவதோடு, இரு விதமான நிரூபணங்களையும் முன் வைக்கிறார்கள். பசுமைக் குடில்களை எடுத்துக் கொள்ளுங்கள்அங்குகரியமில வாயுவெப்பத்தைக் கூட்டுகையில்செடிகள் நன்றாகவே வளர்ந்து பயன் தருகின்றனஅது போலவேஇந்த பூமி ஒரு பசுமைக் குடில்கரியமில வாயு அதிகமானால், அது ஒன்றும் பிரச்சினை அல்ல. 

மேலோட்டமாகப் பார்த்தால், இந்த வாதம் சரியானது போலப் படும். ஆனால் நிஜத்தில் அது சரியில்லை. எதிர் வாதங்களைப் பார்ப்போம். 

முதல் விஷயம், இந்தப் பசுமைக் குடில்களில், செடிகளுக்கு வேண்டிய சத்துக்கள், நீர் யாவும் சரியான அளவில் செலுத்தப்படுகின்றன. இந்த பூமி, பசுமைக் குடிலைப் போல, கட்டுப்பாடான அமைப்பல்ல. பசுமைக் குடிலில் மலையில்லை, பனிப்பாறை இல்லை, பருவமழை இல்லை, வெள்ளமில்லை, காட்டுத் தீயில்லை, ஓடும் நதிகளில்லை, ஏரிகள் இல்லை. 

இந்த மிகச் சிக்கலான பூமி என்ற சூழலில்கரியமில வாயு செய்யும் வேதியல் மாற்றங்கள்பசுமைக் குடிலைப் பார்க்கையில்மிகவும் வேறுபட்டது. அதிகமான வெப்பநிலையில் தண்ணீரே ஒரு பிரச்சினை – வளர்ச்சி சத்துக்களை விடுங்கள். அத்துடன், நதிகள், மலைகள், பனிப்பாறைகள், கடல் எல்லாம் இந்த சிக்கலான பருவநிலையைத் தீர்மானிக்கின்றன. கரியமில வாயுவின் அதிகரிப்பு, பல்வேறு எதிர்பார்க்க முடியாத மாற்றங்களை இயற்கையில் உருவாக்குகிறது. பசுமைக்குடிலைப் போல, நம்மால் கட்டுப்படுத்த முடியாது.

50 மில்லியன் வருடங்களுக்கு முன்பூமியில்சில காலங்களுக்கு கரியமில வாயு அதிகரித்ததை விஞ்ஞானிகள் ஒப்புக் கொள்ளுகிறார்கள்இந்த காலத்தில்உயிர்கள் தழைத்தனமடியவில்லை. இதனால், கரியமில வாயு அதிகரிப்பால், நாம் தழைப்போம், மடிய மாட்டோம்!

இதுவும் அருமையான ஒரு வாதம் போலத் தோன்றும். இதற்காகத் தான், ஆரம்பத்தில் சுருக்கமாக,  பூமியின் பருவநிலை பற்றிய வரலாற்றைச் சொல்லியிருந்தேன்.  

முதலாவதாக, 50 மில்லியன் ஆண்டுகளுக்கு முன், மனிதர்கள் இந்த பூமியில் இல்லை. உயிர்கள் தழைத்தன என்பதை எதை வைத்துக் கொண்டு சொல்லுகிறார்கள் என்று தெரியவில்லை. இன்றைய தொல்லெச்ச எரிபொருள்கள் உருவாவதற்குக் காரணமே, அந்த காலங்களில் மறைந்த உயிர்களே! நாம் அறிந்தவரையில், 65 மில்லியன் ஆண்டுகளுக்கு முன், இந்த பூமியை ஆண்ட டைனோசர்கள் மறைந்தது மட்டும்தான். இந்த விளக்கப்படம் என்ன காட்டுகிறது? பூமியின் எந்த ஒரு மிகப் பெரிய புவியியல் நிகழ்விலும், கரியமில வாயு உயர்வதைக் காட்டுகிறது. 

ஆனால், இவ்வகை நிகழ்வுகள், சில மில்லியன் ஆண்டுகளுக்கு ஒரு முறை நிகழ்ந்துள்ளன. உயிரினங்களுக்குத் தங்கள் வாழ்வைச் சீரமைத்துக் கொள்ள நேரம் கிடைத்தது. நாம் இன்று எதிர்கொள்வது, வெறும் 150 ஆண்டுகளில் பெருமளவிலும், துரிதமாகவும் நடக்கும்  கரியமில வாயு அளவின் மாற்றம். இது போல வரலாற்றில் நிகழ்ந்ததில்லை. இதனால் உருவாகும் மாற்றங்களை ஓரளவே நம்மால் ஊகிக்க முடியும். 

அத்துடன் விளைவுகளை மாற்றுவதும் நம் கையில் இல்லை. அதனால், நம்மிடம் உள்ள ஒரே வழி, கரியமில வாயு, காற்றில் கலக்கும் அளவைக் குறைத்தல்.

பருவநிலை மாற்ற விளைவுகள் நம்மைத் தாக்க பல நூறு ஆண்டுகள் பிடிக்கும்நாம் ஏன் அதைப் பற்றிக் கவலைப்பட வேண்டும்?”

இவ்வாறு திரித்து விடுபவர்கள், பெரும்பாலும், தொல்லெச்ச எரிபொருள் துறையைச் சேர்ந்தவர்களாக இருக்கும். மறைமுகமாக இவர்களின் இந்த திரித்தலுக்கு உள் காரணம், தன் வாழ்நாள் வரை லாபம் பார்த்துக் கொண்டே இருக்க வேண்டும் என்பதே. மற்றபடி விஞ்ஞான ரீதியில் பார்த்தால் இவர்கள் சொல்வது, சரியான வாதமே அல்ல.

இது எதிர்காலத்தில் அல்ல,  இன்றே இப்போதே உள்ள  நிகழ்வு. உலகமெங்கும், நாம் முன்பைவிட அதிக வறட்சி, தீவிரப் புயல்கள், ராட்சச வெள்ளம்/ மழை,  கட்டுக்கடங்காத காட்டுத்தீ மற்றும் நிலச்சரிவுகளைப் பார்த்து வருகிறோம். கீழே உள்ள விளக்கப்படம் இதைத் தெளிவாக்குகிறது.

காப்பீடு நிறுவனங்கள் இவ்வகைத் தரவுகளைச் சேகரிக்கின்றன. நாம் இங்கு ‘முன்பு’ என்று சொல்லுவது, 1990 -லிருந்து என்பது நோக்கினாலே தெரியவரும். அதெல்லாம் அகஸ்மாத்தாக நிகழ்ந்த விஷயம், சும்மா பெரிது படுத்தக்கூடாது என்று திரித்தல்காரர்கள் சொல்லுவதில் அர்த்தம் இல்லை. ஏனெனில், இந்தத் தகவல், தொல்லெச்ச எரிபொருள் நிறுவனங்கள், தங்களுடைய எந்திரங்களைக் காப்பீடு செய்வதற்குப் பயன்படும் முக்கியத் தரவு!

அமெரிக்காவின் தென் பகுதியில் உள்ள மயாமி போன்ற நகரங்கள், லூயிஸியானா போன்ற மாநிலங்கள், கனடாவின் கிழக்கு மாநிலங்கள், அமெரிக்க தென்மேற்கு மாநிலங்கள் யாவும் அன்றாடப் பருவநிலை மாற்றத்தை எப்படிச் சமாளிப்பது என்று கையைப் பிசைந்து கொண்டிருக்கின்றன. இந்த முயற்சிகளுக்கு மைய அரசிடமிருந்து உதவி கேட்டு நொந்து போய், வேறு வழியில்லாமல், உள்ளூர் வரிகளைக் கூட்டுவதே வழி என்ற இன்றைய நிலை வேதனைக்குரியது.

பருவநிலை விஞ்ஞானம் தவறுகள் நிறைந்ததுதரவுகளில் ஒட்டுறவு இருப்பது (correlation), புவி சூடேற்றத்தின் தூண்டு காரணம் (causation) ஆகாது

மற்ற திரித்தல்களை விட இது கொஞ்சம் பலவீனமானது. ஆனால், இப்படிச் சொல்லிவிட்டால், சந்தேகத்தை சிலரது மனதில் எளிதாக உருவாக்க முடியும். உண்மை என்ன? கடந்த 50 ஆண்டுகளில்: 

  • மனித நடவடிக்கைகளால் உருவாகும் கரியமில வாயு இரட்டிப்பானது
  • காற்று மண்டலத்தில் கரியமில வாயுவின் அளவு 25% அதிகமானது
  • பூமியின் சராசரி மேல்பரப்பு வெபம் 1 டிகிரி அதிகரித்துள்ளது
  • நம் கடல்களில் தேக்கப்பட்ட வெப்பம் 2 x 1023 ஜூல்களாக உயர்ந்துள்ளது. உலகின் இன்றைய அளவுபடி, இது சராசரி 300 ஆண்டுகளின் வெப்ப அளவு
  • கடல்கள், சராசரியாக, 10 செ.மீ. உயர்ந்துள்ளது
  • வெள்ளம், புயல், காட்டுத்தீ, மற்றும் வறட்சி இவற்றின் தாக்கம் மூன்று மடங்கு அதிகமாகியுள்ளது.
  • ஆர்டிக் மற்றும் அண்டார்டிக் துருவங்களில் உள்ள பனிப்பாறைகள், 50 ஆண்டுகளுக்கு முன்பு இருந்ததை விட 6 மடங்கு அதிகமாக உருகி வருகின்றன.

மேலே சொன்ன விஷயங்கள் யாவும் பல விஞ்ஞானிகளாலும் துல்லியமாக அளக்கப்பட்டு, ஒப்புக் கொள்ளப்பட்ட விஷயம். 

இதைத் திரித்து, எப்படித்தான் கதை கட்டுகிறார்களோ?

அடுத்த பனியுறை பருவம் இன்னும் சில ஆண்டுகளில் தொடங்கும்எல்லாம் சரியாகிவிடும்

இப்படி திரித்து விடுபவர்களின் நோக்கம், கால்பந்தைப் பிறரிடம் தட்டி விட்டு வேடிக்கை பார்ப்பதைப் போன்றது. அதாவது, பொறுப்பைத் தட்டிக் கழிப்பது. இப்படித் திரித்து விடுபவர்களுக்கு, பனியுறை யுகத்தைப் பற்றிய வரலாற்றுப் பார்வை கூடக் கிடையாது. முதலில், எப்படி, ஏன் பனியுறை யுகம் உருவாகிறது என்று யாருக்கும் முழுவதும் விஞ்ஞான ரீதியில் தெரியாது. பனியுறை யுகங்களின் வரலாறு மற்றும் மிலன்காவிட்ச் சக்கரத்தின் (Milankavitch cycle) அடிப்படையில், இன்னும் 50,000 வருடங்களுக்கு இன்னொரு பனியுறை யுகம் ஆரம்பிக்காது என்பதே பருவநிலை விஞ்ஞானிகளின் கருத்து. இங்கு புவி சூடேற்றம் பற்றி நாம் சொல்லி வருவது, இன்னும் அடுத்த நூறு ஆண்டுகளில் நம் பூமி மனிதர்களற்ற ஒரு கிரகம் ஆகிவிடும் என்பது. இது ஒன்றும் அவ்வளவு சீக்கிரத்தில் இயற்கையால் சரி செய்யக் கூடிய ஒரு விஷயமல்ல. அவரசரப்பட்டு அழித்த பூமியை மீட்பது மனிதர்களின் கடமை.

புவிச் சூடேற்றம் – விஞ்ஞானத் திரித்தல்கள் – பகுதி 12

வாதம் செய்வது என் கடமை
அதில் வழியைக் காண்பது உன் திறமை

-கவிஞர் கண்ணதாசன்

கடந்த பதினோரு பகுதிகளில் சொன்ன விஞ்ஞான விஷயங்களை மிகச் சாதுரியமாக குழப்புவதில், பல லாப நோக்குள்ள நிறுவனங்கள், வல்லுனர்கள். இவர்களின் வாதங்களை மேல்வாரியாகப் பார்த்தால், மிகவும் சரியாக இருப்பதைப் போலத் தோன்றும். இங்கு நாம் சொல்வது, டிரம்ப் போன்றவர்களின் அபத்த வாதங்களை அல்ல. டிரம்ப் போன்ற ஆழமற்ற மனிதர்களின் வாதங்கள், அறிவு சார்ந்த வாதங்களே அல்ல. இவர்களுக்குக் கண்ணால் பார்ப்பதே புரியும். செப்டம்பர் 2020 –ல், அமெரிக்க ஜனாதிபதி தேர்தல் வாதத்தில், புவி சூடேற்றம் பற்றி டிரம்ப் இவ்வாறு கூறினார்: “நல்ல குடிநீர், மற்றும் காற்று என்பதில் நான் உடன்படுகிறேன்” – எவ்வளவு குறுகிய பார்வை! நதிகளில், அமிலமும் நச்சும் கலக்காத வரையில், இவர்கள் பார்வையில் புவி சூடேற்றம் என்ற ஒன்று இல்லவே இல்லை. இவ்வகை வாதங்கள், அபத்தமாக இருக்கும் போதிலும், அது அமெரிக்க ஜனாதிபதி என்று சர்வத்தையும் முடிவு செய்யும் மனிதர் சொல்வதால், பதிவு செய்யும் கட்டாயம் எல்லோருக்கும் உள்ளது. இந்த லட்சணத்திற்கு, கலிஃபோர்னியா மாநிலத்தில் எரியும் பயங்கர காட்டுத்தீயை பார்க்கச் சென்ற டிரம்ப், “விஞ்ஞானிகளுக்கு இன்னும் பருவநிலை மாற்றம் பற்றி, சரியாகப் புரியவே இல்லை” என்று தன் மேதாவிலாசத்தை உலகிற்குப் பறை சாற்றினார்!

சரி, புத்திசாலித்தனமாக விஞ்ஞானத்தை திரிப்பவர்களது வாதங்களை அலசுவோம். மனித விஞ்ஞான வரலாற்றில், இது போன்ற மிகப் பெரிய அளவு திரித்தல் நடந்ததில்லை. முன்பு செய்த திரித்தல் எல்லாம், ஒரு பயிற்சிக்கு என்று சொல்லும் அளவிற்கு, இந்தத் திரித்தல் வேர்கள், அவ்வளவு ஆழமானவை. இதனால் தான், பல படித்தவர்களும், இவ்வகை வாதங்களில் சிக்கி விடுகிறார்கள். நிச்சயமாக, இந்த மாயையிலிருந்து வெளிவந்த சிலரின் விளக்கங்களையும் இந்தப் பகுதிகளில் அலசுவோம். இதற்கு காரணம், இக்கட்டுரைகளைப் படிப்பவர்களுக்கு அப்படிப்பட்ட சந்தேகங்கள் வந்தாலும், முன்னர் இந்தப் பாதையில் பயணித்தவர்களின் விளக்கங்கள், சந்தேகங்களைக் குறைக்க உதவும்.

”பூமியில் பருவநிலை எப்பொழுதும் மாறிக் கொண்டுதான் இருந்து வந்துள்ளது. விஞ்ஞானிகள், இதைப் பெரிதுபடுத்தி, பூச்சாண்டி காட்டி வருகிறார்கள்”

விளக்கத்திற்குப் போகுமுன், இந்த திரித்தலில், கொஞ்சம் விஞ்ஞானத்தைத் தனக்குச் சாதகமான முறையில் கலந்து விடுவதை கவனியுங்கள். விஞ்ஞானத்தைத் தாக்குவதற்கு முன், நம்பகத்தன்மைக்காக விஞ்ஞானத்தையும் சொஞ்சம் தூவிவிட்டு வேடிக்கை பார்ப்பது இவர்களது நோக்கம். அட, இவர்கள் சொல்வது உண்மையோ என்று படிப்பவருக்கு முதலில் தோன்ற வேண்டும். அப்பொழுதுதான் கடைகட்டிக் கல்லாவைப் பார்க்க முடியும். இதைச் செய்யும் அமைப்புகள், பின்னணியில், தொல்லெச்ச எரிபொருள் நிறுவனங்களின் நன்கொடையில் இயங்கும் அமைப்புகள்.

முதலில் எல்லோரும் ஒரு உண்மையை ஒப்புக் கொள்ள வேண்டும். பூமியில் பருவநிலை எப்பொழுதும் மாறிக் கொண்டு வந்துள்ளது. இதில் சந்தேகமில்லை. விஷயம் அதுவல்ல. கடந்த 800 ஆண்டுகளாக பூமியின் சூடேற்றும் வாயுக்களின் அளவும், பூமியின் சராசரி வெப்பமும் மேலும் கீழும் மாறிய வண்ணம் இருந்து வந்துள்ளன. ஆனால், கடந்த 150 ஆண்டுகளாக, சூடேற்றும் வாயுக்களும் ஏராளமாக அதிகரித்துள்ளன; பூமியின் சராசரி வெப்பநிலையும் ஏராளமாக உயர்ந்து வருகிறது. இதைத்தான் நாம் கருத்தில் கொள்ள வேண்டும். மற்ற அதிகரிப்புகள், சில பத்தாண்டுகளில் குறையவும் செய்துள்ளது. கடந்த 150 ஆண்டுகளில், குறைவு என்பதற்கே இடமில்லை. இதைத்தான் புவி சூடேற்றம் என்று விஞ்ஞானிகள் எச்சரித்து வருகிறார்கள்.

பருவநிலை மாற்றம் பிரச்சனை அல்ல. ஏராளமான மாற்றம்தான் பிரச்சினை. இது போன்ற சாதுரியமான அரை விஞ்ஞானம், தனக்கு சாதகமான பகுதிகளை மட்டுமே எடுத்துக் கொண்டு திரித்துவிடும் முயற்சி.

”புவி சூடேற்றம் பற்றி விஞ்ஞானிகளிடம் கருத்து வேறுபாடு உள்ளது. முற்றிலும் இது ஒப்புக் கொள்ளப்படவில்லை”.

இதைப் பற்றி புத்தகமே போட்டு விட்டார்கள், விஞ்ஞானத் திரித்தல்காரர்கள்! அத்தோடு நிற்கவில்லை இவர்கள். அமெரிக்காவில் உள்ள 200,000 பன்னிரண்டாம் வகுப்பு ஆசிரியர்களுக்கு, இந்தப் புத்தகம் மற்றும் டி.வி.டி. –யை அனுப்பியுள்ளார்கள்! உண்மையான விஞ்ஞானத்திற்கு, பிரச்சாரம் தேவையில்லை.

முதலில் இந்த குற்றச்சாட்டிற்கான பதில், 97% விஞ்ஞானிகள், புவி சூடேற்றம் உண்மை என்ற விஷயத்தை ஒப்புக் கொண்டுள்ளார்கள். இந்த அளவு, விஞ்ஞான உலகில் ஒப்புமை எந்த ஒரு விஷயத்திலும் இருந்ததாகத் தெரியவில்லை.

அடுத்தபடியாக, விளக்க வரைபடத்தைக் கொண்டு மாணவர்களை சாதுரியமாக குழப்புகிறார்கள். இவர்களது பிரச்சார புத்தகத்திலிருந்து, இதோ அந்த விளக்க வரைபடம்:

பூமியில், 2000 வருடங்களாக சராசரி வெப்பநிலை மாறிக் கொண்டுதான் வந்துள்ளது. ஒன்றும் கவலைக்கிடமில்லை. இதை, உங்களை பயமுறுத்தும் விஞ்ஞானிகள் கொடுத்த விளக்க வரைபடம் என்று தான் சார்பற்ற ஒரு சங்கமாக சொல்லிக் கொண்டு, குழப்புகிறார்கள். இதில் முக்கியமான விஷயம், 1900 –க்குப் பிறகு இந்த வரைபடத்தில் இல்லை. இன்றைய பருவநிலை மாற்ற விஞ்ஞானிகள் கி.பி. 0 முதல் 1900 வரை நடந்தவற்றை ஒரு பின்னணியாகத் தான் கொண்டுள்ளார்கள். தொழில் புரட்சி, 1900 க்கு பிறகுதான் துரிதமானது. உண்மையில், இந்த விளக்க வரைபடத்தை, நடுநிலையாளர்கள் இப்படிப் பார்க்க வேண்டும்:

பல தேர்ந்த விஞ்ஞானிகள் ஒப்புக் கொள்ளும் முடிவு, 1850 –லிருந்து, பூமியின் சராசரி வெப்பநிலை இப்படித்தான் மாறி வருகிறது. 20 –ஆம் நூற்றாண்டை இந்த விளக்க வரைபடத்தில், பார்த்தால், எவ்வாறு பூமியின் சராசரி வெப்பமும், கரியமில வாயுவும் உயர்ந்துள்ளன என்பது மிகத் தெளிவாகத் தெரியும். இது peer reviewed science, அதாவது, விஞ்ஞான உலகால், ஆராயப்பட்டு, ஒப்புக் கொள்ளப்பட்ட நிஜம்.

”புவி சூடேற்றம் நின்று விட்டது. விஞ்ஞானிகள் சும்மா பயமுறுத்துகிறார்கள்”. 

டிரம்ப் அளவில் சொல்லாமல், இதற்கு ஆதாரமும் கூடவே தருவார்கள். இவர்கள் தரும் ஆதாரம் இதோ. இது போன்ற வாதங்களில், பெரும்பாலும், 1951 முதல் 1980 வரையில் எப்படி பூமி குளிரத் தொடங்கியுள்ளது, சூடேறவில்லை என்று விளக்குவார்கள். மேல்வாரியாகப் பார்த்தால், இது ஏதோ சரியாக இருப்பது போலத் தோன்றும். இந்த விளக்க வரைபடத்தைக் கூர்ந்து கவனியுங்கள்.

இதில் சொல்லப்பட்டுள்ள விஷயம், 5 ஆண்டுகளுக்கான தொடர் சராசரி வெப்பம். அதுவும், 1880 முதல் 2020 வரையிலான அளவுகள். நாம் வாட்ஸாப் பேர்விழிகள் சொல்லுவது போல, ‘நாசாவே சொல்லிவிட்டது. ஓட்டுங்கள் உங்கள் ஹம்மரை’ என்று முடிவுக்கே வந்து விடுவார்கள்! இதில் பல விஷயங்களை இவர்கள் தொடுவதே இல்லை. உதாரணத்திற்கு, 1980 முதல், வருடத்திற்கு .2 டிகிரி மாற்றம் இருந்த வண்ணம் உள்ளது. எல் நினோ, சூரிய களங்கங்கள், மற்றும் எரிமலை போன்ற விஷயங்கள் இந்த .2 டிகிரி ஏற்றம் இறக்கத்திற்கு காரணம் என்பது தெளிவாகியுள்ளது. ஆனால், 1998 முதல் கவனித்தால், புவி சூடேற்றம், வரலாற்றில் இல்லாத அளவிற்கு அதிகமாவதை இந்த விளக்க வரைபடத்தில் காணலாம். இந்த வகை அதிகரிப்பு 1980 முதல் நடந்து வருகிறது என்பதே உண்மை. இதை விட்டு விட்டு, நாசா சொல்கிறது பூமி குளிர்ந்து வருகிறது என்பதெல்லாம், விஞ்ஞானப் பிதற்றல். இது திரித்தல் குழுக்களின் தேர்ந்த ஒரு முறை – விஞ்ஞானத்தை திரித்து, நிரூபிப்பது போல, படிப்பவரைக் குழப்புவது!

”மனிதர்கள் உருவாக்கும் கரியமில வாயுவிற்கும் புவி சூடேற்றத்திற்கும் எந்த சம்பந்தமும் இல்லை”

இவ்வகை வாதம் செய்பவர்கள், மனிதர்கள், தொல்லெச்ச எரிபொருளால் உருவாக்கும் கரியமில வாயு, இயற்கையில் உருவாகும் கரியமில வாயுவிற்கு முன் எம்மாத்திரம்? எரிமலைகள், கடல் போன்ற இயற்கையின் ராட்சச அமைப்புகளைப் பார்க்கையில், மனித கரியமில வாயு உருவாக்கம் ஒரு விரல் நுனியளவு கூட இருக்காது. விஞ்ஞானிகள், நம் தொல்லெச்ச எரிபொருள் தொழிலை அழிக்க சதி செய்கிறார்கள் என்றும் வாதம் செய்கிறார்கள்.

உண்மை அதுவல்ல. எரிமலைகள் ஏராளமான கரியமில வாயுவை உருவாக்குவது உண்மை. ஆனால், அவை தொடர்ந்து வெடித்துக் கொண்டு இருப்பதில்லை. பல எரிமலைகள் என்றோ பல பத்தாண்டுகள் அல்லது நூறாண்டுகளுக்கு ஒரு முறை வெடிக்கின்றன. சில எரிமலைகளின் சாரல் மற்றும் சுற்றியுள்ள பகுதிகள் செழிப்பாக ஆக்ஸிஜனை உற்பத்தி செய்வதும் உண்மை. இந்த விளக்க வரைபடம் என்ன காட்டுகிறது? பூமியில் உள்ள சமீபத்திய (150 ஆண்டுகள்) எரிமலை நிகழ்வுகளை, சராசரி பூமியின் வெப்ப அளவோடு காட்டுகிறது.

இந்த 150 ஆண்டுகளில், 8 மிகப் பெரிய எரிமலை வெடிப்புகள் விஞ்ஞானிகளால் பதிவு செய்யப்பட்டுள்ளன. எரிமலை வெடிப்பினால், கரியமில வாயு அதிகமாகிறது என்றால், இரண்டு வெடிப்பிற்கு இடைப்பட்ட காலத்தில், பூமி குளிரவேண்டும் அல்லவா? அப்படி நிகழவில்லை. மாறாக, பூமியின் சராசரி வெப்பம், கடந்த 150 ஆண்டுகளாக, சீராக உயர்ந்து வருகிறது. மனித நடவடிக்கைகள்தான் இதற்கு காரணம் என்பது தெளிவாகிறது. இவ்வாறு முதலில் மனிதனால் உருவாகும் புவி சூடேற்றத்தை எதிர்த்தவர், பிற்காலத்தில், மனித நடவடிக்கைகள் போல, புவி சூடேற்றத்தை விளக்கக் கூடிய ஒரு காரணம் வேறு எதுவும் இல்லை என்று சொன்ன ரிச்சர்டு முல்லர் என்னும் விஞ்ஞானி. முல்லரைப் போல, பல விஞ்ஞானிகள், முதலில் இல்லை என்று ஆரம்பித்து, பிறகு, விஞ்ஞான ரீதியாக தன்னையே திருத்திக் கொண்டவர்கள் ஏராளம். இதில் தவறேதும் இல்லை.

”விஞ்ஞானிகள் பயன்படுத்தும் மாதிரியுருக்கள் நம்பத்தகுந்தவை அல்ல. இந்த மோசமான கணினி மாதிரியுருக்களை வைத்துக் கொண்டு, விஞ்ஞானிகள், இல்லாததையும் பொல்லாததையும் சொல்லி, நம்மை வீணாக பயமுறுத்துகிறார்கள்”

இது பருவநிலை மாற்றம் சார்ந்த ஒரு புதிய திரித்தல் நுட்பம். மற்ற நுட்பங்கள், பல்வேறு விஞ்ஞான திரித்தல் விஷயங்களில் பயன்படுத்தப்பட்டாலும், இது இந்தத் துறைக்கே உள்ள ஸ்பெஷல். இப்படித் திரிப்பவர்களுக்கு, பருவநிலை என்பது மிகவும் சிக்கலான விஷயம் என்பது மிகவும் தெளிவாகத் தெரியும். சிக்கலான ஒரு விஷயத்தை சரியாக அளப்பதும், கணிப்பதும், மிகவும் கடினம் என்பதும் இவர்களுக்குத் தெரியும். தெரிந்தே இப்படிச் செய்வதற்கு, லாப நோக்குள்ள எண்ணெய் நிறுவனங்கள், வாகனத் தொழில்கள், தங்களுடைய லாபத்தை தக்க வைத்துக் கொள்வதற்காக அளிக்கும் ஊக்கமே இதன் பின்புலம்.

இதற்கு பதிலளிக்கும் முன்பு, இவர்களின் குற்றச்சாட்டை சற்று விரிவாகவே பார்த்து விடுவோம். இவர்களின் முதல் ஆட்சேபணை, இந்த சிக்கலான மாதிரியுருக்களில், ஏராளமான அளபுருக்கள் (parameters on climate models) உள்ளன. இதனால், எதை வேண்டுமானாலும் கதை கட்டி விடலாம். இரண்டாவது ஆட்சேபணை, இன்று அதிகரித்து வரும் புவி சூடேற்றத்தை இந்த மாதிரியுருக்கள் சரியாக விளக்குவதில்லை. இரண்டு ஆட்சேபணைகளும் சற்று முரணாகப் பட்டாலும், அதை நாம் பெரிது படுத்த வேண்டாம்.

பிரபல பெளதிக விஞ்ஞானி ஃப்ரீமேன் டைஸனின், 1970 –களில் பருவநிலை மாற்றம் பற்றிய கருத்தையே, இந்த வகை ஆட்சேபக்காரர்கள் பயன்படுத்தி வருகிறார்கள். எப்படி பருவநிலை மாற்றம் கணிக்கப்படுகிறது என்று முன்னமே விளக்கியிருந்தேன். பருவநிலை கணிப்பு என்ற துறையில் பல சிக்கல்கள் உள்ளன:

  • பூமியின் ஒவ்வொரு சதுர அடியிலும், வானிலையை அளப்பது இயலாத காரியம்
  • கடந்த 200 ஆண்டுகளாகத்தான் நம்மிடம் வானிலை அறிக்கைகள் உலகின் பல பகுதியிலும் உள்ளன. இதிலும், போர், இயற்கை அழிவு என்று பல இடையூறுகளால், சில இடங்களில், சில ஆண்டுகள் பதிவுகள் இல்லாமலும் போய் விடுவதுண்டு
  • கடந்த 150 ஆண்டுகளாகத்தான் கடலில் செல்லும் கப்பல்கள் கடல் வானிலையை அளக்கத் தொடங்கின
  • 1960 முதல், வானிலையை அளக்கும் செயற்கை கோள்கள் நம்மிடம் இருக்கிறது

இந்தக் காரணங்களால், எந்த ஒரு பருவநிலை கணிப்பு மாதிரியுருவும் சில தோராயமான முடிவுகளை (பரப்பளவு, உயரம்) உள்வாங்கத்தான் வேண்டும். 1970 –க்குப் பிறகு, வரலாற்றில் இல்லாத அளவிற்கு நம்மிடம் கணினி சக்தி அதிகரித்துள்ளது. பருவநிலை சார்ந்த மாதிரியுருக்கள், வெகுவாக முன்னேறியுள்ளன. 1988 முதல், IPCC என்ற அமைப்பு, இவ்வகை மாதிரியுருக்களை, உலக விஞ்ஞானிகள் (எல்லா நாடுகளுக்கும் இதில் பங்கு உண்டு) மெருகேற்றி வருகிறார்கள்.

நான்கு ஆண்டுகளுக்கு ஒரு முறை முக்கிய அறிக்கையை வெளியிடும் IPCC –ன், அறிக்கைகள் சற்று விநோதமானவை. எந்த ஒரு கருத்தையும் திட்டவட்டமாக இதில் சொல்லமாட்டார்கள். உதாரணத்திற்கு:


“தென் அமெரிக்கா, ஆசிய கடற்கரையில் வாழும் ஏழை மக்களின் வாழ்வாதாரம், கடந்த 50 ஆண்டுகளாக, புவி சூடேற்றத்தால், பாதிக்கப்படுகிறது என்று 88% உறுதியாக சொல்ல முடியும். இதில் விஞ்ஞானிகளுக்கு 95% தன்னம்பிக்கை உள்ளது”. இதன் சுருக்கம் : கடற்கரையில் வாழும் ஏழை மக்கள் புவி சூடேற்றத்தால் பெரிதும் பாதிக்கப்பட்டுள்ளார்கள்.

இன்றைய பருவநிலை மாற்ற விஞ்ஞானம், ஏராளமாக வளர்ந்துள்ளது. இருக்கும் மாதிரியுருக்களை மெருகேற்றுவதோடு, கைவசம் இருக்கும் மாதிரியுருக்களை ஒருங்கிணைத்தும் வந்துள்ளார்கள். இது CMIP அல்லது Coupled Model Intercomparison Project என்று அழைக்கப்படுகிறது. கடந்த 700 வருடங்களாக பூமியின் சராசரி வெப்பநிலையை கணிக்கும் பணியை இந்த மாதிரியுரு செய்துள்ளது என்பது 97% விஞ்ஞானிகளின் கருத்து (IPCC –யின் கட்டுரைகளைப் படித்ததால் வந்த வினை இது என்று நினைக்கிறேன் ). மேற்கொண்டு, சந்தேகத்தைத் தூண்டி வேடிக்கை பார்க்கும் திரிப்பாளர்களுக்கு, சந்தேகத்திற்கு இடமே இல்லாத வகையில் கடந்த 700 ஆண்டுகளை துல்லியமாக மேலும் பிரித்து, பிரித்து, ஆய்ந்துள்ளது. இதில், முதல் படம், கடந்த ஆயிரம் ஆண்டுகளாக, பூமியின் சராசரி வெப்பநிலையில் எரிமலை வெடிப்புகளின் பாதிப்பை காட்டுகிறது. பெரும்பாலும், இது மிகக் குறைவு (0.05 டிகிரி கூட இருக்காது). அடுத்த படம், கடந்த ஆயிரம் ஆண்டுகளாக, பூமியின் சராசரி வெப்பநிலையில், சூரிய வெப்பத்தின் தாக்கத்தைக் காட்டுகிறது. இதுவும் .5 டிகிரியை விடக் குறைவுதான்.

கடைசி படம், கடந்த ஆயிரம் ஆண்டுகளாக, பூமியின் சராசரி வெப்பநிலையில், மனித நடவடிக்கைகளின் தாக்குதலைக் காட்டுகிறது. மனித நடவடிக்கைகளின் தாக்குதலைக் காட்டுகிறது. இது 1.5 டிகிரி என்பது 2019 –ல் மிகத் தெளிவு (இந்தப் படம் 2000 வரைதான்). இந்தப் படங்களிலிருந்து ஒன்று மிகவும் தெளிவாக நிரூபணம் ஆகிறது. எரிமலை, சூரிய வெப்பம் என்பதெல்லாம் பூமியின் சராசரி வெப்ப அளவை பெரிதாக மாற்றவில்லை. மனித நடவடிக்கைகள் இன்று கிட்டத் தட்ட 2 டிகிரி அளவிற்கு உயர்த்தி விட்து. இது இப்படி இருக்கையில், லாப நோக்குள்ள பல தொல்லெச்ச எரிபொருள் அமைப்புகள் கிளப்பி விடும் பொய் திரித்தல்கள் பல. விஞ்ஞானத்தை எள்ளி நகையாடும் லாபநோக்குடைய வியாபாரங்கள், மேலும் பல வகையிலும் திரித்து கதை கட்டி வெற்றிப் பெற்றுள்ளார்கள்.